新墨西哥州 天頂 ê 金環日食

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：An Annular Solar Eclipse over New Mexico
• 影像來源 kah 版權：Colleen Pinski
• 台文翻譯：An-Li Tsai (NSYSU)

[漢羅] 新墨西哥州 天頂 ê 金環日食

這个人是 tī 遐 leh 創啥？ 2012 年 ê 時陣，咱會當 tī 美國西部幾若州 kah 北太平洋 狹狹 ê 全食帶 內底，看著金環日食（日環食）。 金環 日食 是月娘 離 地球 傷遠矣，煞無法度 kā 規粒太陽攏閘去，所以太陽才會 tī 月盤後壁出現一輾火環。 為著欲翕著這款 無四常 ê 太陽活動，有一个骨力 ê 攝影師 ùi Arizona 州 駛車到 新墨西哥州，看會當揣著上讚 ê 翕相地點無。 等伊撨好勢，食日 ùi 半公里遠 ê 山脊拄欲落去 ê 時陣，有一个人煞無拄好行到鏡頭內底。 是講真感謝這位意外 ê 人客，毋過攝影師猶是毋知這位走到鏡頭內底，產生 剪影 ê 人是 siáng。 這个人敢若是提一个圓圓 ê 物件，欲看日食 ê 款。 這張相片 是 當地時間 2012 年 5 月 20 暗時 7:36 ê 時陣 tī Albuquerque 附近 一个公園 翕--ê。 後個月，10 月 14，會有另外一个狹狹 ê 全食帶 迒 tī 北美洲 kah 南美洲 頂懸。 天氣若是袂䆀，應該有機會閣看著 另外一个日環食。 仝一个時間，美洲大陸頂懸若是無雲，tī 遐 ê 人攏有機會看著 日偏食。

[POJ] Sin Be̍k-se-ko chiu thiⁿ-téng ê Kim-khoân Ji̍t-si̍t

Chit-ê lâng sī tī-hia leh chhòng-siáⁿ? 2012 nî ê sî-chūn, lán ē-tàng tī Bí-kok se-pō͘ kúi-nā chiu kah Pak Thài-pêng-iûⁿ e̍h-e̍h ê choân-si̍t-tòa lāi-té, khòaⁿ-tio̍h kim-khoân ji̍t-si̍t (ji̍t-khoân-si̍t). Kim-khoân ji̍t-si̍t sī goe̍h-niû lī Tē-kiû siuⁿ hn̄g ah, soah bô-hoat-tō͘ kā kui-lia̍p Thài-iông lóng cha̍h khì, só͘-í Thài-iông chiah-ē tī goe̍h-pôaⁿ āu-piah chhut-hiān chi̍t liàn hóe-khoân. Ūi tio̍h-beh hip-tio̍h chit-khoán bô sù-siông ê Thài-iông oa̍h-tōng, ū chi̍t-ê kut-la̍t ê liap-iáⁿ-su ùi Arizona chiu sái-chhia kàu Sin Be̍k-se-ko chiu, khòaⁿ ē-tàng chhōe-tio̍h siōng chán ê hip-siòng tē-tiám bô. Tán i chhiâu hó-sè, si̍t-ji̍t ùi pòaⁿ kong-lí hn̄g ê soaⁿ-chi̍t tú-beh lo̍h-khì ê sî-chūn, ū chi̍t-ê-lâng soah bô-tú-hó kiâⁿ kàu kiàⁿ-thâu lāi-té. Sī-kóng chin kám-siā chit-ūi ì-gōa ê lâng-kheh, m̄-koh liap-iáⁿ-su iáu-sī m̄-chai chit-ūi cháu kàu kiàⁿ-thâu lāi-té, sán-seng chián-iáⁿ ê lâng sī siáng. Chit-ê lâng káⁿ-ná sī the̍h chi̍t-ê îⁿ-îⁿ ê mi̍h-kiāⁿ, beh khòaⁿ ji̍t-si̍t ê khoán. Chit-tiuⁿ siòng-phìⁿ sī tong-tē sî-kan 2012 nî 5 goe̍h 20 àm-sî 7:36 ê sî-chūn tī Albuquerque hù-kīn chi̍t-ê kong-hn̂g hip--ê. Āu kò goe̍h, 10 goe̍h 14, ē ū lēng-gōa chi̍t-ê e̍h-e̍h ê choân-si̍t-tòa hāⁿ tī Pak Bí-chiu kah Lâm Bí-chiu téng-koân. Thiⁿ-khì nā-sī bē-bái, eng-kai ū ki-hōe koh khòaⁿ-tio̍h lēng-gōa chi̍t-ê ji̍t-khoân-si̍t. Kāng chi̍t-ê sî-kan, Bí-chiu-tāi-lio̍k téng-koân nā-sī bô hûn, tī hiah ê lâng lóng-ū ki-hōe khòaⁿ-tio̍h ji̍t-phian-si̍t.

[KIP] Sin Bi̍k-se-ko tsiu thinn-tíng ê Kim-khuân Ji̍t-si̍t

Tsit-ê lâng sī tī-hia leh tshòng-siánn? 2012 nî ê sî-tsūn, lán ē-tàng tī Bí-kok se-pōo kuí-nā tsiu kah Pak Thài-pîng-iûnn e̍h-e̍h ê tsuân-si̍t-tuà lāi-té, khuànn-tio̍h kim-khuân ji̍t-si̍t (ji̍t-khuân-si̍t). Kim-khuân ji̍t-si̍t sī gue̍h-niû lī Tē-kiû siunn hn̄g ah, suah bô-huat-tōo kā kui-lia̍p Thài-iông lóng tsa̍h khì, sóo-í Thài-iông tsiah-ē tī gue̍h-puânn āu-piah tshut-hiān tsi̍t liàn hué-khuân. Uī tio̍h-beh hip-tio̍h tsit-khuán bô sù-siông ê Thài-iông ua̍h-tōng, ū tsi̍t-ê kut-la̍t ê liap-iánn-su uì Arizona tsiu sái-tshia kàu Sin Bi̍k-se-ko tsiu, khuànn ē-tàng tshuē-tio̍h siōng tsán ê hip-siòng tē-tiám bô. Tán i tshiâu hó-sè, si̍t-ji̍t uì puànn kong-lí hn̄g ê suann-tsi̍t tú-beh lo̍h-khì ê sî-tsūn, ū tsi̍t-ê-lâng suah bô-tú-hó kiânn kàu kiànn-thâu lāi-té. Sī-kóng tsin kám-siā tsit-uī ì-guā ê lâng-kheh, m̄-koh liap-iánn-su iáu-sī m̄-tsai tsit-uī tsáu kàu kiànn-thâu lāi-té, sán-sing tsián-iánn ê lâng sī siáng. Tsit-ê lâng kánn-ná sī the̍h tsi̍t-ê înn-înn ê mi̍h-kiānn, beh khuànn ji̍t-si̍t ê khuán. Tsit-tiunn siòng-phìnn sī tong-tē sî-kan 2012 nî 5 gue̍h 20 àm-sî 7:36 ê sî-tsūn tī Albuquerque hù-kīn tsi̍t-ê kong-hn̂g hip--ê. Āu kò gue̍h, 10 gue̍h 14, ē ū līng-guā tsi̍t-ê e̍h-e̍h ê tsuân-si̍t-tuà hānn tī Pak Bí-tsiu kah Lâm Bí-tsiu tíng-kuân. Thinn-khì nā-sī bē-bái, ing-kai ū ki-huē koh khuànn-tio̍h līng-guā tsi̍t-ê ji̍t-khuân-si̍t. Kāng tsi̍t-ê sî-kan, Bí-tsiu-tāi-lio̍k tíng-kuân nā-sī bô hûn, tī hiah ê lâng lóng-ū ki-huē khuànn-tio̍h ji̍t-phian-si̍t.

[English] An Annular Solar Eclipse over New Mexico

What is this person doing? In 2012, an annular eclipse of the Sun was visible over a narrow path that crossed the northern Pacific Ocean and several western US states(several western US states]. In an annular solar eclipse, the Moon is too far from the Earth to block out the entire Sun, leaving the Sun peeking out over the Moon's disk in a ring of fire. To capture this unusual solar event, an industrious photographer drove from Arizona to New Mexico to find just the right vista. After setting up and just as the eclipsed Sun was setting over a ridge about 0.5 kilometers away, a person unknowingly walked right into the shot. Although grateful for the unexpected human element, the photographer never learned the identity of the silhouetted interloper. It appears likely that the person is holding a circular device that would enable them to get their own view of the eclipse. The shot was taken at sunset on 2012 May 20 at 7:36 pm local time from a park near Albuquerque. Next month, on October 14, a different narrow swath across North and South America will be exposed to a different annular solar eclipse, if the sky is clear. Simultaneously, cloud-free observers almost anywhere on either continent will be able to see a partial solar eclipse.

詞彙學習