恆星工場 Messier 17

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Star Factory Messier 17
• 影像來源 kah 版權：Kim Quick, Terry Hancock, and Tom Masterson (Grand Mesa Observatory)
• 台文翻譯：An-Li Tsai (NSYSU)

[漢羅] 恆星工場 Messier 17

這个叫做 Messier 17 ê 恆星工場，是去予恆星風 kah 輻射 kā 雕出來–ê，伊就 tī 5500 光年遠 ê 人馬座 內底，遮有足濟星雲。 Tī 這个距離， 1/3 度闊 ê 視野 差不多是 30 光年闊。 這張清楚 ê 彩色組合影像，主要是欲翕 這寡較暗 ê 氣體塗粉雲 ê 細節，相片 ê 背景是 銀河 中央 ê 恆星。 Tī M17 內底，有 ùi 宇宙雲 kah 塗粉做出來 ê 高溫大質量恆星。 In 所產生 ê 恆星風 kah 高能光，沓沓仔 kā 賰 ê 星際物質 吹走，產生這款海綿質外形 kah 彎彎曲曲 ê 形體。 M17 嘛叫做 Omega 星雲，抑是 天鵝星雲。

[POJ] Hêng-chheⁿ Kang-tiûⁿ Messier 17

Chit-ê kiò-chò Messier 17 ê hêng-chheⁿ kang-tiûⁿ, sī khì hō͘ hêng-chheⁿ-hong kah hok-siā kā tiau–chhut-lâi–ê, i to̍h tī 5500 kng-nî hn̄g ê Jîn-má-chō lāi-té, chia ū chiok chē seng-hûn. Tī chit-ê kū-lī, 1/3 tō͘ khoah ê sī-iá chha-put-to sī 30 kng-nî khoah. Chit-tiuⁿ chheng-chhó ê chhái-sek cho͘-ha̍p iáⁿ-siōng, chú-iàu sī beh hip chit kóa khah àm ê khì-thé thô͘-hún hûn ê sè-chiat, siòng-phìⁿ ê pōe-kéng sī Gîn-hô tiong-ng ê hêng-chheⁿ. Tī M̄ lāi-té, ū ùi ú-tiū hûn kah thô͘-hún chò-chhut-lâi ê ko-un tōa chit-liōng hêng-chheⁿ. In só͘ sán-seng ê hêng-chheⁿ-hong kah ko-lêng-kng, tau̍h-tau̍h-á kā chhun ê sinng-chè bu̍t-chit chhoe-cháu, sán-seng chit-khoán hái-mî-chit gōa-hêng kah oan-oan-khiau-khiau ê hêng-thé. M̄ mā kiò-chò Omega Seng-hûn, ia̍h-sī Thian-gô Seng-hûn.

[KIP] Hîng-tshenn Kang-tiûnn Messier 17

Tsit-ê kiò-tsò Messier 17 ê hîng-tshenn kang-tiûnn, sī khì hōo hîng-tshenn-hong kah hok-siā kā tiau–tshut-lâi–ê, i to̍h tī 5500 kng-nî hn̄g ê Jîn-má-tsō lāi-té, tsia ū tsiok tsē sing-hûn. Tī tsit-ê kū-lī, 1/3 tōo khuah ê sī-iá tsha-put-to sī 30 kng-nî khuah. Tsit-tiunn tshing-tshó ê tshái-sik tsoo-ha̍p iánn-siōng, tsú-iàu sī beh hip tsit kuá khah àm ê khì-thé thôo-hún hûn ê sè-tsiat, siòng-phìnn ê puē-kíng sī Gîn-hô tiong-ng ê hîng-tshenn. Tī M17 lāi-té, ū uì ú-tiū hûn kah thôo-hún tsò-tshut-lâi ê ko-un tuā tsit-liōng hîng-tshenn. In sóo sán-sing ê hîng-tshenn-hong kah ko-lîng-kng, ta̍uh-ta̍uh-á kā tshun ê sinng-tsè bu̍t-tsit tshue-tsáu, sán-sing tsit-khuán hái-mî-tsit guā-hîng kah uan-uan-khiau-khiau ê hîng-thé. M17 mā kiò-tsò Omega Sing-hûn, ia̍h-sī Thian-gô Sing-hûn.

[English] Star Factory Messier 17

Sculpted by stellar winds and radiation, the star factory known as Messier 17 lies some 5,500 light-years away in the nebula-rich constellation Sagittarius. At that distance, this 1/3 degree wide field of view spans over 30 light-years. The sharp composite, color image highlights faint details of the region’s gas and dust clouds against a backdrop of central Milky Way stars. Stellar winds and energetic light from hot, massive stars formed from M17’s stock of cosmic gas and dust have slowly carved away at the remaining interstellar material, producing the cavernous appearance and undulating shapes. M17 is also known as the Omega Nebula or the Swan Nebula.

詞彙學習（漢羅/POJ/KIP/華語/English）

• 【恆星風】hêng-chheⁿ-hong/hîng-tshenn-hong/恆星風/stellar wind
• 【輻射】hok-siā/hok-siā/輻射/radiation
• 【人馬座】Jîn-má-chō/Jîn-má-tsō/人馬座/Sagittarius
• 【視野】sī-iá/sī-iá/視野/field of view
• 【大質量恆星】tōa-chit-liōng hêng-chheⁿ/tuā-tsit-liōng hîng-tshenn/大質量恆星/massive star
• 【高能光】ko-lêng-kng/ko-lîng-kng/高能光/energetic light
• 【星際物質】seng-chè-bu̍t-chit/sing-tsè-bu̍t-tsit/星際物質/interstellar material
• 【海綿質】hái-mî-chit/hái-mî-tsit/海綿質/cavernous
• 【Omega 星雲】Oemga Seng-hûn/Oemga Sing-hûn/歐米茄星雲/Omega Nebula
• 【天鵝星雲】Thian-gô Seng-hûn/Thian-gô Sing-hûn/天鵝星雲/Swan Nebula
• 【1/3】saⁿ hun it/sann hun it/ 1/3 / 1/3