八月 ê 月圓

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Full Moons of August
• 影像來源 kah 版權：Gianni Tumino
• 台文翻譯：An-Li Tsai (NSYSU)

[漢羅] 八月 ê 月圓

8 月 1 號 日落了後，月娘就隨 peh 起來矣。 這工 ê 月球行到月球軌道 近地點附近，近地點就是月球 kah 咱地球上近彼點。 這張戲劇性 ê 月出相片，是 tī 意大利 Sicily 島 Ragusa 翕–ê。 月娘 就 ùi 東爿地平線 ê 厚雲後壁出現，伊是比平常時 ê 月盤閣較光。 相片內底這粒 tī 地球夜空 閃閃爍爍 ê 月娘，是 2023 年 ê 第二擺超級月娘。 伊猶 tī 近地點附近，會 tī 8 月份閣一个暗暝 出現，誠做 2023 年 ê 第三擺超級月娘。 就是今仔日，日落了後，這粒 tī 8 月份 第二擺出現 ê 月圓，就隨 peh 起來矣。 有一寡人知影伊叫做藍月，毋過日光散射 tī 月娘頂懸，予伊看起來較紅講，毋是藍色–ê。 這其實是西方文化 kā 一個月內底 ê 第二擺月圓 定義做 藍月，這差不多 2、3 年才會發生一擺。 這是因為一擺完整 ê 月相週期是 29.5 工，差不多是一个曆日月。 咱下暗會當 tī 光爍爍 ê 土星邊仔揣著 八月藍月。

[POJ] Peh-goe̍h ê Goe̍h-îⁿ

8 goe̍h 1 hō ji̍t-lo̍h liáu-āu, goe̍h-niû to̍h sûi peh–khí-lâi–ah. Chit kang ê goe̍h-kiû kiâⁿ kàu Goe̍h-kiû kúi-tō kīn-tē-tiám hù-kīn, kīn-tē-tiám to̍h-sī Goe̍h-kiû kah lán Tē-kiû siōng kīn hit tiám. Chit-tiuⁿ hì-kio̍k-sèng ê goe̍h-chhut siòng-phìⁿ, sī tī I-ta-lī Sicily tó Ragusa hip–ê. Goe̍h-niû to̍h ùi tang-pêng tē-pêng-sòaⁿ ê kāu-hûn āu-piah chhut-hiān, i sī pí pêng-siông-sî ê goe̍h-pôaⁿ koh-khah kng. Siòng-phìⁿ lāi-té chit lia̍p tī Tē-kiû iā-khong siám-siám-sih-sih ê goe̍h-niû, sī 2023 nî ê tē-jī pái chhiau-kip goe̍h-niû. I iáu tī kīn-tē-tiám hù-kīn, ē tī 8 goe̍h-hūn koh chi̍t-ê àm-mê chhut-hiān, chiâⁿ-chò 2023 nî ê tē-saⁿ pái chhiau-kip goe̍h-niû. To̍h sī kin-á-ji̍t, ji̍t-lo̍h liáu-āu, chit lia̍p tī 8 goe̍h-hūn tē-jī pái chhut-hiān ê goe̍h-îⁿ, to̍h sûi peh–khí-lâi–ah. Ū chi̍t kóa lâng chai-iáⁿ i kiò-chò nâ-goe̍h, m̄-koh ji̍t-kng sàn-siā tī goe̍h-niû téng-koân, hō͘ i khòaⁿ–khí-lâi khah âng kóng, m̄-sī nâ-sek–ê. Che kî-si̍t sī se-hong bûn-hòa kā chi̍t kò goe̍h lāi-té ê tē-jī pái goe̍h-îⁿ tēng-gī chò nâ-goe̍h, che chha-put-to 2, 3 nî chiah-ē hoat-seng chi̍t-pái. Che-sī in-ūi chi̍t-pái oân-chéng ê goe̍h-siòng chiu-kî sī 29.5 kang, chha-put-to sī chi̍t-ê la̍h-ji̍t-goe̍h. Lán e-àm ē-tàng tī kng-sih-sih ê Thó͘-chheⁿ piⁿ-á chhōe-tio̍h Peh-goe̍h Nâ-goe̍h.

[KIP] Peh-gue̍h ê Gue̍h-înn

8 gue̍h 1 hō ji̍t-lo̍h liáu-āu, gue̍h-niû to̍h suî peh–khí-lâi–ah. Tsit kang ê gue̍h-kiû kiânn kàu Gue̍h-kiû kuí-tō kīn-tē-tiám hù-kīn, kīn-tē-tiám to̍h-sī Gue̍h-kiû kah lán Tē-kiû siōng kīn hit tiám. Tsit-tiunn hì-kio̍k-sìng ê gue̍h-tshut siòng-phìnn, sī tī I-ta-lī Sicily tó Ragusa hip–ê. Gue̍h-niû to̍h uì tang-pîng tē-pîng-suànn ê kāu-hûn āu-piah tshut-hiān, i sī pí pîng-siông-sî ê gue̍h-puânn koh-khah kng. Siòng-phìnn lāi-té tsit lia̍p tī Tē-kiû iā-khong siám-siám-sih-sih ê gue̍h-niû, sī 2023 nî ê tē-jī pái tshiau-kip gue̍h-niû. I iáu tī kīn-tē-tiám hù-kīn, ē tī 8 gue̍h-hūn koh tsi̍t-ê àm-mê tshut-hiān, tsiânn-tsò 2023 nî ê tē-sann pái tshiau-kip gue̍h-niû. To̍h sī kin-á-ji̍t, ji̍t-lo̍h liáu-āu, tsit lia̍p tī 8 gue̍h-hūn tē-jī pái tshut-hiān ê gue̍h-înn, to̍h suî peh–khí-lâi–ah. Ū tsi̍t kuá lâng tsai-iánn i kiò-tsò nâ-gue̍h, m̄-koh ji̍t-kng sàn-siā tī gue̍h-niû tíng-kuân, hōo i khuànn–khí-lâi khah âng kóng, m̄-sī nâ-sik–ê. Tse kî-si̍t sī se-hong bûn-huà kā tsi̍t kò gue̍h lāi-té ê tē-jī pái gue̍h-înn tīng-gī tsò nâ-gue̍h, tse tsha-put-to 2, 3 nî tsiah-ē huat-sing tsi̍t-pái. Tse-sī in-uī tsi̍t-pái uân-tsíng ê gue̍h-siòng tsiu-kî sī 29.5 kang, tsha-put-to sī tsi̍t-ê la̍h-ji̍t-gue̍h. Lán e-àm ē-tàng tī kng-sih-sih ê Thóo-tshenn pinn-á tshuē-tio̍h Peh-gue̍h Nâ-gue̍h.

[English] Full Moons of August

Near perigee, the closest point in its almost moonthly orbit, a Full Moon rose as the Sun set on August 1. Its brighter than average lunar disk was captured in this dramatic moonrise sequence over dense cloud banks along the eastern horizon from Ragusa, Sicily. Illuminating night skies around planet Earth it was the second supermoon of 2023. Yet again near perigee, the third supermoon of 2023 will also shine on an August night. Rising as the Sun sets tonight this second Full Moon in August will be known to some as a Blue Moon, even though scattered sunlight gives the lunar disk a reddened hue. Defined as the second full moon in a calendar month, blue moons occur only once every 2 or 3 years. That’s because lunar phases take 29.5 days, almost a calendar month, to go through a complete cycle. Tonight an August Blue Moon will find itself beside bright planet Saturn.

詞彙學習（漢羅/POJ/KIP/華語/English）

• 【藍月】Nâ-goe̍h/Nâ-gue̍h/藍月/Blue Moon
• 【近地點】kīn-tē-tiám/kīn-tē-tiám/近地點/perigee
• 【地平線】tē-pêng-sòaⁿ/tē-pîng-suànn/地平線/horizon
• 【月盤】goe̍h-pôaⁿ/gue̍h-puânn/月盤/lunar disk
• 【超級月娘】chhiau-kip goe̍h-niû/tshiau-kip gue̍h-niû/超級月娘/supermoon
• 【散射】sàn-siā/sàn-siā/散射/scatter
• 【月相】goe̍h-siòng/gue̍h-siòng/月相/moon phase
• 【土星】Thó͘-chhiⁿ/Thóo-tshinn/土星/Saturn
• 【曆日月】lā-ji̍t-goe̍h/lā-ji̍t-gue̍h/日曆月/calendar month