三个星系 kah 一粒彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Three Galaxies and a Comet
• 影像來源 kah 版權：Miloslav Druckmuller (Brno University of Technology)
• 台文翻譯：An-Li Tsai (NSYSU)

[漢羅] 三个星系 kah 一粒彗星

注意看這張壯麗夜景 ê 對角線方向，地平線頂懸有銀河弧，銀河 內底 有霧霧 ê 恆星光 kah 烏暗星雲。 這張 媠甲 hŏng 袂喘氣 ê 拼鬥圖 有 100 度闊，伊 ê 前景是 阿根廷 Patagonia 地區 敧敧曲曲 ê 地形。 咱是徛 tī 銀河 內底 leh 看這个景色，毋過這張相片嘛看會著 銀河外口 ê 兩个不規則衛星星系，大 小 麥哲倫星雲。 這个景色嘛有翕著 2007 年 ê 大彗星，McNaught 彗星 ê 闊彗尾 kah 光爍爍 ê 彗鬚。

[POJ] Saⁿ ê Seng-hē kah Chi̍t-lia̍p Hūi-chheⁿ

Chù-ì khòaⁿ chit-tiuⁿ chòng-lē iā-kéng ê tùi-kak-sòaⁿ hong-hiòng, tē-pêng-sòaⁿ téng-koân ū Gîn-hô-hô͘, Gîn-hô lāi-té ū bū-bū ê hêng-chheⁿ-kng kah o͘-àm seng-hûn. Chit-tiuⁿ súi kah hőng bē chhoán-khùi ê pheng-tàu-tô͘ ū 100 tō͘ khoah, i ê chiân-kéng sī A-kun-têng Patagonia tē-khu khi-khi-khiau-khiau ê tē-hêng. Lán sī khiā tī Gîn-hô lāi-tóe leh khòaⁿ chit-ê kéng-sek, m̄-koh chit-tiuⁿ siòng-phìⁿ mā khòaⁿ-ē-tio̍h Gîn-hô gōa-kháu ê nn̄g-ê put-kui-chek ūi-chheⁿ seng-hē, Tōa Sió Be̍h-tiat-lûn seng-hûn. Chit-ê kéng-sek mā ū hip-tio̍h 2007 nî ê Tōa-hūi-chheⁿ, McNaught hūi-chheⁿ ê khoah hūi-bóe kah kng-sih-sih ê hūi-chhiu.

[KIP] Sann ê Sing-hē kah Tsi̍t-lia̍p Huī-tshenn

Tsù-ì khuànn tsit-tiunn tsòng-lē iā-kíng ê tuì-kak-suànn hong-hiòng, tē-pîng-suànn tíng-kuân ū Gîn-hô-hôo, Gîn-hô lāi-té ū bū-bū ê hîng-tshenn-kng kah oo-àm sing-hûn. Tsit-tiunn suí kah hőng bē tshuán-khuì ê phing-tàu-tôo ū 100 tōo khuah, i ê tsiân-kíng sī A-kun-tîng Patagonia tē-khu khi-khi-khiau-khiau ê tē-hîng. Lán sī khiā tī Gîn-hô lāi-tué leh khuànn tsit-ê kíng-sik, m̄-koh tsit-tiunn siòng-phìnn mā khuànn-ē-tio̍h Gîn-hô guā-kháu ê nn̄g-ê put-kui-tsik uī-tshenn sing-hē, Tuā Sió Be̍h-tiat-lûn sing-hûn. Tsit-ê kíng-sik mā ū hip-tio̍h 2007 nî ê Tuā-huī-tshenn, McNaught huī-tshenn ê khuah huī-bué kah kng-sih-sih ê huī-tshiu.

[English] Three Galaxies and a Comet

Diffuse starlight and dark nebulae along the southern Milky Way arc over the horizon and sprawl diagonally through this gorgeous nightscape. The breath-taking mosaic spans a wide 100 degrees, with the rugged terrain of the Patagonia, Argentina region in the foreground. Along with the insider’s view of our own galaxy, the image features our outside perspective on two irregular satellite galaxies - the Large and Small Magellanic Clouds. The scene also captures the broad tail and bright coma of Comet McNaught, the Great Comet of 2007.

詞彙學習（漢羅/POJ/KIP/華語/English）

• 【星系】seng-hē/sing-hē/星系/galaxy
• 【彗星】hūi-chheⁿ/huī-tshenn/彗星/comet
• 【銀河弧】Gîn-hô-hô͘/Gîn-hô-hôo/銀河弧/Milky Way arc
• 【拼鬥圖】pheng-tàu-tô͘/phing-tàu-tôo/馬賽克圖/mosaic
• 【不規則星系】put-kui-chek seng-hē/put-kui-tsik sing-hē/不規則星系/irregular galaxy
• 【衛星星系】ūi-chheⁿ/uī-tshenn/衛星星系/satellite galaxy
• 【大小麥哲倫星雲】Tōa Sió Be̍h-tiat-lûn seng-hûn/Tuā Sió Be̍h-tiat-lûn sing-hûn/大小麥哲倫星雲/the Large and Small Magellanic Clouds
• 【2007 年大彗星】2007 nî Tōa-hūi-chheⁿ/2007 nî Tuā-huī-tshenn/2007 年大彗星/the Great Comet of 2007
• 【McNaught 彗星】McNaught hūi-chheⁿ/McNaught huī-tshenn/McNaught 彗星/Comet McNaught
• 【彗尾】hūi-bóe/huī-bué/彗尾/comet tail
• 【彗鬚】hūi-chhiu/huī-tshiu/彗髮/coma
• 【地形】tē-hêng/tē-hîng/地形/terrain
• 【對角線】tùi-kak-sòaⁿ/tuì-kak-suànn/對角線/diagonally
• 【地平線】tē-pêng-sòaⁿ/tē-pîng-suànn/地平線/horizon
• 【阿根廷】A-kun-têng/A-kun-tîng/阿根廷/Argentina