土星 ê 一季

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Season of Saturn
• 影像來源 kah 版權：Andy Casely
• 台文翻譯：An-Li Tsai (NSYSU)

[漢羅] 土星 ê 一季

有環 ê 土星 會 tī 2023 年 8 月 27 行到「土星衝」ê 位置，就是 tī 地球天頂看著太陽 kah 土星 差 180 度。 這粒離太陽第 6 遠 ê 行星 tī 這工 會上光，嘛是咱上好觀測 ê 角度。 毋過咱猶是無法度直接用目睭看著伊美麗 ê 環系統。 是講，這个系列相片是 ùi 內行星 地球 ê 角度來翕土星 kah 土星環。 1 年翕 1 張，攏總有 6 張望遠鏡影像。 這粒氣態巨行星 ê 環平面 tī 2018 年 ê 時陣 是正面向咱，到 2023 年 ê 時陣 已經是側面向咱矣（ùi 頂懸到下跤）。 土星 ê 北半球 嘛 ùi 熱天 行到 秋分。 Tī 這組清楚 ê 行星肖像內底，土星北半球 ê 六角雲 kah 大型 風暴 系統 嘛 tī 2018 年 ê 影像內底看甲足清楚–ê。 Tī 2023 年 ê 時陣，冰衛星 土衛三 Tethys 發生 凌土現象，就是 ùi 土星面頭前行過，伊 ê 烏影就投影 tī 土星南半球 ê 雲帶。 土星南極 是 冷閣藍，這馬才拄欲結束伊 10 年長 ê 寒天 kah 暗暝。

[POJ] Thó͘-chhiⁿ ê Chi̍t-kùi

Ū khoân ê Thó͘-chhiⁿ ē tī 2023 nî 8 goe̍h 27 kiâⁿ kàu “Thó͘-chhiⁿ-chhiong” ê ūi-tì, to̍h-sī tī Tē-kiû thiⁿ-téng khòaⁿ-tio̍h Thài-iông kah Thó͘-chhiⁿ chha 180 tō͘. Chit lia̍p lī Thài-iông tē 6 hn̄g ê kiâⁿ-chhiⁿ tī chit kang ē siōng kng, mā-sī lán siōng-hó koan-chhek ê kak-tō͘. M̄-koh lán iáu-sī bô-hoat-tō͘ ti̍t-chiap iōng ba̍k-chiu khòaⁿ-tio̍h i bí-lē ê khoân hē-thóng. Sī-kóng, chit-ê hē-lia̍t siòng-phìⁿ sī ùi lōe-kiâⁿ-chhiⁿ Tē-kiû ê kak-tō͘ lâi hip Thó͘-chhiⁿ kah Thó͘-chhiⁿ-khoân. 1 nî hip 1 tiuⁿ, lóng-chóng ū 6 tiuⁿ bōng-oán-kiàⁿ iáⁿ-siōng. Chit lia̍p khì-thài kū-kiâⁿ-chhiⁿ ê khoân pîⁿ-bīn tī 2018 nî ê sî-chūn sī chiàⁿ-bīn hiòng lán, kàu 2023 nî ê sî-chūn í-keng sī chhek-bīn hiòng lán–ah (ùi téng-koân kàu ē-kha). Thó͘-chhiⁿ ê Pak-pòaⁿ-kiû mā ùi joa̍h-thiⁿ kiâⁿ kàu chhiu-hun. Tī chit cho͘ chheng-chhó ê kiàn-chhiⁿ siàu-siōng lāi-té, Thó͘-chhiⁿ pak-pòaⁿ-kiû ê la̍k-kak-hûn kah tōa-hêng hong-pō hē-thóng mā tī 2018 nî ê iáⁿ-siōng lāi-té khòaⁿ kah chiok chheng-chhó–ê. Tī 2023 nî ê sî-chūn, peng-ūi-chhiⁿ Thó͘-ūi saⁿ Tethys hoat-seng lêng-thó͘ hiān-siōng, to̍h sī ùi Thó͘-chhiⁿ bīn-thâu-chêng kiâⁿ-kòe, i ê o͘-iáⁿ to̍h tâu-iáⁿ tī Thó͘-chhiⁿ lâm-pòaⁿ-kiû ê hûn-tòa. Thó͘-chhiⁿ lâm-ke̍k sī léng koh nâ, chit-má chiah tú-beh kiat-sok i 10 nî tn̂g ê kôaⁿ-thiⁿ kah àm-mê.

[KIP] Thóo-tshinn ê Tsi̍t-kuì

Ū khuân ê Thóo-tshinn ē tī 2023 nî 8 gue̍h 27 kiânn kàu “Thóo-tshinn-tshiong” ê uī-tì, to̍h-sī tī Tē-kiû thinn-tíng khuànn-tio̍h Thài-iông kah Thóo-tshinn tsha 180 tōo. Tsit lia̍p lī Thài-iông tē 6 hn̄g ê kiânn-tshinn tī tsit kang ē siōng kng, mā-sī lán siōng-hó kuan-tshik ê kak-tōo. M̄-koh lán iáu-sī bô-huat-tōo ti̍t-tsiap iōng ba̍k-tsiu khuànn-tio̍h i bí-lē ê khuân hē-thóng. Sī-kóng, tsit-ê hē-lia̍t siòng-phìnn sī uì luē-kiânn-tshinn Tē-kiû ê kak-tōo lâi hip Thóo-tshinn kah Thóo-tshinn-khuân. 1 nî hip 1 tiunn, lóng-tsóng ū 6 tiunn bōng-uán-kiànn iánn-siōng. Tsit lia̍p khì-thài kū-kiânn-tshinn ê khuân pînn-bīn tī 2018 nî ê sî-tsūn sī tsiànn-bīn hiòng lán, kàu 2023 nî ê sî-tsūn í-king sī tshik-bīn hiòng lán–ah (uì tíng-kuân kàu ē-kha). Thóo-tshinn ê Pak-puànn-kiû mā uì jua̍h-thinn kiânn kàu tshiu-hun. Tī tsit tsoo tshing-tshó ê kiàn-tshinn siàu-siōng lāi-té, Thóo-tshinn pak-puànn-kiû ê la̍k-kak-hûn kah tuā-hîng hong-pō hē-thóng mā tī 2018 nî ê iánn-siōng lāi-té khuànn kah tsiok tshing-tshó–ê. Tī 2023 nî ê sî-tsūn, ping-uī-tshinn Thóo-uī sann Tethys huat-sing lîng-thóo hiān-siōng, to̍h sī uì Thóo-tshinn bīn-thâu-tsîng kiânn-kuè, i ê oo-iánn to̍h tâu-iánn tī Thóo-tshinn lâm-puànn-kiû ê hûn-tuà. Thóo-tshinn lâm-ki̍k sī líng koh nâ, tsit-má tsiah tú-beh kiat-sok i 10 nî tn̂g ê kuânn-thinn kah àm-mê.

[English] A Season of Saturn

Ringed planet Saturn will be at its 2023 opposition, opposite the Sun in Earth’s skies, on August 27. While that puts the sixth planet from the Sun at its brightest and well-placed for viewing, its beautiful ring system isn’t visible to the unaided eye. Still, this sequence of six telescopic images taken a year apart follows both Saturn and rings as seen from inner planet Earth. The gas giant’s ring plane tilts from most open in 2018 to approaching edge-on in 2023 (top to bottom). That’s summer to nearly the autumn equinox for Saturn’s northern hemisphere. In the sharp planetary portraits Saturn’s northern hexagon and a large storm system are clearly visible in 2018. In 2023 ice moon Tethys is transiting, casting its shadow across southern hemisphere cloud bands while Saturn’s cold blue south pole is emerging from almost a decade of winter darkness.

詞彙學習（漢羅/POJ/KIP/華語/English）

• 【土星衝】Thó͘-chhiⁿ-chhiong/Thóo-tshinn-tshiong/土星衝/Saturn’s opposition
• 【土星環】Thó͘-chhiⁿ-khoân/Thóo-tshinn-khuân/土星環/Ring of Saturn
• 【環系統】khoân hē-thóng/khuân hē-thóng/環系統/ring system
• 【氣態巨行星】khì-thài kū-kiâⁿ-chhiⁿ/khì-thài kū-kiânn-tshinn/氣態巨行星/gas giant planet
• 【環平面】khoân pîⁿ-bīn/khuân pînn-bīn/環平面/ring plane
• 【內行星】lŏe-kiâⁿ-chhiⁿ/luē-kiânn-tshinn/內行星/inner planet
• 【六角雲】la̍k-kak-hûn/la̍k-kak-hûn/六角雲/hexagon
• 【北半球】pak-pòaⁿ-kiû/pak-puànn-kiû/北半球/northern hemisphere
• 【南半球】lâm-pòaⁿ-kiû/lâm-puànn-kiû/南半球/southern hemisphere
• 【南極】lâm-ke̍k/lâm-ki̍k/南極/south pole
• 【雲帶】hûn-tòa/hûn-tuà/雲帶/cloud bands
• 【凌土現象】lêng-thó͘ hiān-siōng/lîng-thóo hiān-siōng/凌土現象/Saturn transit
• 【冰衛星】peng-ūi-chheⁿ/ping-uī-tshenn/冰衛星/ice moon
• 【土衛三 Tethys】Thó͘-ūi-saⁿ/Thóo-uī-sann/土衛三特堤斯/Tethys
• 【秋分】chhiu-hun/tshiu-hun/秋分/autumn equinox