來介紹 Nishimura 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Introducing Comet Nishimura
• 影像來源 kah 版權：Dan Bartlett
• 台文翻譯：An-Li Tsai (NSYSU)

[漢羅] 來介紹 Nishimura 彗星

Nishimura 彗星敢會光甲咱會使直接用目睭看著？ 一般講來，彗星 ê 預測是足困難--ê，無人知影伊未來會按怎。 毋過這馬這个時期應該是會使臆看覓 leh。 這粒彗星是 10 工前 Hideo Nishimura 用一般 ê 數位 kha-mé-lah 開 30 秒 ê 感光時間翕了後 揣著--ê。 Ùi 彼陣開始，這粒 C/2023 P1 Nishimura 彗星就愈來愈光，而且伊 ê 路線應該是會飛到 內太陽系。 等這粒彗星飛倚太陽 ê 時陣，伊一定會變甲足光--ê。 而且咱真有可能 tī 9 月初 ê 時陣，直接用目睭看著伊。 毋過有一个問題，時到 這粒彗星 ê 視角度會 kah 太陽傷倚，按呢咱干焦會當 tī 日出 抑是 日落 前後 看著伊。 這粒彗星會行到 水星 軌道內底，kah 太陽是足倚--ê。 按呢伊 ê 彗核真有可能會 崩去。 這張相片 ê Nishimura 彗星 是 3 工前 tī 美國 加州 ê 六月湖 翕--ê，有翕著青色 ê 彗鬚 kah 狹狹 ê 彗尾。

[POJ] Lâi kài-siāu Nishimura Hūi-chheⁿ

Nishimura Hūi-chheⁿ kám-ē kng kah lán ē-sái ti̍t-chiap iōng ba̍k-chiu khòaⁿ-tio̍h? It-poaⁿ kóng-lâi, hūi-chheⁿ ê ū-chhek sī chiok khùn-lân--ê, bô-lâng chai-iáⁿ i bī-lâi ē án-chóaⁿ. M̄-koh chit-má chit-ê sî-kî eng-kai sī ē-sái ioh khòaⁿ-māi leh. Chit lia̍p hūi-chheⁿ sī 10 kang chêng Hideo Nishimura iōng it-poaⁿ ê sò͘-ūi kha-mé-lah khui 30 bió ê kám kng sî-kan hip liáu-āu chhōe-tio̍h--ê. Ùi hit-chūn khai-sí, chi̍t-lia̍p C/2023 P1 Nishimura hūi-chheⁿ to̍h lú-lâi-lú kng, jî-chhiáⁿ i ê lō͘-sòaⁿ èng-kai sī ē poe-kàu Lōe Thài-iông-hē. Tán chit lia̍p hūi-chheⁿ poe óa Thài-iông ê sî-chūn, i it-tēng ē piàn-kah chiok kng--ê. Jî-chhiáⁿ lán chin ū khó-lêng tī 9 goe̍h-chhe ê sî-chūn, ti̍t-chiap iōng ba̍k-chiu khòaⁿ-tio̍h i. M̄-koh ū chi̍t-ê būn-tê, sî-kàu chit lia̍p hūi-chheⁿ ê sī-kak-tō͘ ē kah Thài-iông siuⁿ óa, án-ne lán kan-na ē-tàng tī ji̍t-chhut ia̍h-sī ji̍t-lo̍h chêng-āu khòaⁿ-tio̍h i. Chit lia̍p hūi-chheⁿ ē kiâⁿ kàu Chúi-chheⁿ kúi-tō lāi-té, kah Thài-iông sī chiok óa--ê. Án-ne i ê hūi-he̍k chin ū khó-lêng ē pang--khì. Chit-tiuⁿ siòng-phìⁿ ê Nishimura hūi-chheⁿ sī 3 kang chêng tī Bí-kok Ka-chiu ê La̍k-goe̍h-ô͘ hip--ê, ū hip-tio̍h chheⁿ-sek ê hūi-chhiu kah e̍h-e̍h ê hūi-bóe.

[KIP] Lâi kài-siāu Nishimura Huī-tshenn

Nishimura Huī-tshenn kám-ē kng kah lán ē-sái ti̍t-tsiap iōng ba̍k-tsiu khuànn-tio̍h? It-puann kóng-lâi, huī-tshenn ê ū-tshik sī tsiok khùn-lân--ê, bô-lâng tsai-iánn i bī-lâi ē án-tsuánn. M̄-koh tsit-má tsit-ê sî-kî ing-kai sī ē-sái ioh khuànn-māi leh. Tsit lia̍p huī-tshenn sī 10 kang tsîng Hideo Nishimura iōng it-puann ê sòo-uī kha-mé-lah khui 30 bió ê kám kng sî-kan hip liáu-āu tshuē-tio̍h--ê. Uì hit-tsūn khai-sí, tsi̍t-lia̍p C/2023 P1 Nishimura huī-tshenn to̍h lú-lâi-lú kng, jî-tshiánn i ê lōo-suànn ìng-kai sī ē pue-kàu Luē Thài-iông-hē. Tán tsit lia̍p huī-tshenn pue uá Thài-iông ê sî-tsūn, i it-tīng ē piàn-kah tsiok kng--ê. Jî-tshiánn lán tsin ū khó-lîng tī 9 gue̍h-tshe ê sî-tsūn, ti̍t-tsiap iōng ba̍k-tsiu khuànn-tio̍h i. M̄-koh ū tsi̍t-ê būn-tê, sî-kàu tsit lia̍p huī-tshenn ê sī-kak-tōo ē kah Thài-iông siunn uá, án-ne lán kan-na ē-tàng tī ji̍t-tshut ia̍h-sī ji̍t-lo̍h tsîng-āu khuànn-tio̍h i. Tsit lia̍p huī-tshenn ē kiânn kàu Tsuí-tshenn kuí-tō lāi-té, kah Thài-iông sī tsiok uá--ê. Án-ne i ê huī-hi̍k tsin ū khó-lîng ē pang--khì. Tsit-tiunn siòng-phìnn ê Nishimura huī-tshenn sī 3 kang tsîng tī Bí-kok Ka-tsiu ê La̍k-gue̍h-ôo hip--ê, ū hip-tio̍h tshenn-sik ê huī-tshiu kah e̍h-e̍h ê huī-bué.

[English] Introducing Comet Nishimura

Will Comet Nishimura become visible to the unaided eye? Given the unpredictability of comets, no one can say for sure, but it currently seems like a good bet. The comet was discovered only ten days ago by Hideo Nishimura during 30-second exposures with a standard digital camera. Since then, C/2023 P1 Nishimura has increased in brightness and its path across the inner Solar System determined. As the comet dives toward the Sun, it will surely continue to intensify and possibly become a naked-eye object in early September. A problem is that the comet will also be angularly near the Sun, so it will only be possible to see it near sunset or sunrise. The comet will get so close to the Sun -- inside the orbit of planet Mercury -- that its nucleus may break up. Pictured, Comet Nishimura was imaged three days ago from June Lake, California, USA while sporting a green coma and a thin tail.

詞彙學習