美國 Wisconsin 州 天頂 ê 捲𩛩雲 (捲軸雲)

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Roll Cloud Over Wisconsin
• 影像來源：Megan Hanrahan (Pierre cb), Wikipedia
• 台文翻譯：An-Li Tsai (NSYSU)

[漢羅] 美國 Wisconsin 州 天頂 ê 捲𩛩雲 (捲軸雲)

這是啥物雲？ 是 弧形雲 ê 其中一款雲，叫做 捲𩛩雲 (捲軸雲)。 這款真罕得看著--ê 長雲，一般來講攏是出現 tī 冷鋒頭前。 尤其是 向前推捒 ê 風暴 頭前若是有 下降氣流，就會造成較澹較燒熱 ê 空氣 peh 升，等伊溫度降到 露點 以下，就會堅做 雲。 這个現象若是 tī 大範圍 綴 鋒面 出現，就有可能會形成 捲𩛩雲 (捲軸雲)。 捲𩛩雲 (捲軸雲) 實際上可能真正有 空氣 綴 雲 ê 長水平軸 leh 踅。 一般講來，科學家認為 捲𩛩雲 (捲軸雲) 袂變做 捲螺仔風。 捲𩛩雲 (捲軸雲) kah 弧形雲 ê 另外一款雲，涼棚雲 (灘雲)，無仝。 伊 kah 伊 ê 母雲 烏跤雲 (積雨雲) 是完全分開--ê。 這張相片 是 2007 年 tī 美國 Wisconsin 州 Racine 市 翕--ê，彼陣有風暴欲來，捲𩛩雲 (捲軸雲) 就湠到足遠 ê 所在 去。

註：感謝 王珩博士 提供 雲 ê 台語翻譯名詞。

[POJ] Bí-kok Wisconsin chiu thiⁿ-téng ê Kńg-kauh-hûn

Che-sī siáⁿ-mih hûn? Sī hô͘-hêng-hûn ê kî-tiong chi̍t-khoán hûn, kiò-chò kńg-kauh-hûn. Chit-khoán chin hán-tit khòaⁿ--tio̍h--ê tn̂g-hûn, it-poaⁿ lâi-kóng lóng sī chhut-hiān tī léng-hong thâu-chêng. Iû-kî sī hiòng-chiân chhui-sak ê hong-pō thâu-chêng nā-sī ū hā-kàng khì-liû, to̍h ē chō-sêng khah tâm khah sio-joa̍h ê khong-khì peh-seng, tán i un-tō͘ kàng kàu lō͘-tiám í-hā, to̍h ē kian chò hûn. Chit-ê hiān-siōng nā-sī tī tōa hoān-ûi tòe hong-bīn chhut-hiān, to̍h ū khó-lêng ē hêng-sêng kńg-kauh-hûn. Kńg-kauh-hûn si̍t-chè-siōng khó-lêng chin-chiàⁿ ū khong-khì tòe hûn ê tn̂g chúi-pêng-te̍k leh se̍h. It-poaⁿ kóng--lâi, kho-ha̍k-ka jīn-ûi kńg-kauh-hûn bē piàn-chò kńg-lê-á-hong. Kńg-kauh-hûn kah hô͘-hêng-hûn ê lēng-gōa chi̍t-khoán hûn, liâng-pêⁿ-hûn, bô-kâng. I kah i ê bú-hûn o͘-kha-hûn sī oân-choân hun-khui--ê. Chit-tiuⁿ siòng-phìⁿ sī 2007 nî tī Bí-kok Wisconsin chiu Racine chhī hip--ê, hit-chūn ū hong-pō beh lâi, kńg-kauh-hûn tō thòaⁿ kàu chiok hn̄g ê só͘-chāi khì.

[KIP] Bí-kok Wisconsin tsiu thinn-tíng ê Kńg-kauh-hûn

Tse-sī siánn-mih hûn? Sī hôo-hîng-hûn ê kî-tiong tsi̍t-khuán hûn, kiò-tsò kńg-kauh-hûn. Tsit-khuán tsin hán-tit khuànn--tio̍h--ê tn̂g-hûn, it-puann lâi-kóng lóng sī tshut-hiān tī líng-hong thâu-tsîng. Iû-kî sī hiòng-tsiân tshui-sak ê hong-pō thâu-tsîng nā-sī ū hā-kàng khì-liû, to̍h ē tsō-sîng khah tâm khah sio-jua̍h ê khong-khì peh-sing, tán i un-tōo kàng kàu lōo-tiám í-hā, to̍h ē kian tsò hûn. Tsit-ê hiān-siōng nā-sī tī tuā huān-uî tuè hong-bīn tshut-hiān, to̍h ū khó-lîng ē hîng-sîng kńg-kauh-hûn. Kńg-kauh-hûn si̍t-tsè-siōng khó-lîng tsin-tsiànn ū khong-khì tuè hûn ê tn̂g tsuí-pîng-ti̍k leh se̍h. It-puann kóng--lâi, kho-ha̍k-ka jīn-uî kńg-kauh-hûn bē piàn-tsò kńg-lê-á-hong. Kńg-kauh-hûn kah hôo-hîng-hûn ê līng-guā tsi̍t-khuán hûn, liâng-pênn-hûn, bô-kâng. I kah i ê bú-hûn oo-kha-hûn sī uân-tsuân hun-khui--ê. Tsit-tiunn siòng-phìnn sī 2007 nî tī Bí-kok Wisconsin tsiu Racine tshī hip--ê, hit-tsūn ū hong-pō beh lâi, kńg-kauh-hûn tō thuànn kàu tsiok hn̄g ê sóo-tsāi khì.

[English] A Roll Cloud Over Wisconsin

What kind of cloud is this? A type of arcus cloud called a roll cloud. These rare long clouds may form near advancing cold fronts. In particular, a downdraft from an advancing storm front can cause moist warm air to rise, cool below its dew point, and so form a cloud. When this happens uniformly along an extended front, a roll cloud may form. Roll clouds may actually have air circulating along the long horizontal axis of the cloud. A roll cloud is not thought to be able to morph into a tornado. Unlike a similar shelf cloud, a roll cloud is completely detached from their parent cumulonimbus cloud. Pictured here, a roll cloud extends far into the distance as a storm approaches in 2007 in Racine, Wisconsin, USA.

詞彙學習