三重輝光 ê 冰島夜空

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Triply Glowing Night Sky over Iceland
• 影像來源 kah 版權：Wioleta Gorecka; 文稿：Natalia Lewandowska (SUNY Oswego)
• 台文翻譯：An-Li Tsai (NSYSU)

[漢羅] 三重輝光 ê 冰島夜空

這日頭看起來敢若 毋是遐爾平靜。 伊 會噴出 太陽風，就是 無穩定 ê 高能 電子 流 kah 質子 流。 閘電粒子會改變 地球磁層 ê 形體，而且粒子 ê 路線改變了後，會 kah 地球大氣 內底原子相挵，產生 極光，像相片倒爿 ê 青光 就是。 地球本身 ê 地質活動力 算強–ê，地表有袂少 火山。 比論講，冰島 ê Fagradalsfjall 火山，就相片中央 leh 噴 柑仔色燒氣體彼搭就是。 冰島是地球面頂 地質活動上濟 ê 所在。 相片上正爿 leh 衝白煙 ê 是 Svartsengi 地熱發電廠，就是創出彼个有名 ê 人造 藍色內海仔 ê 所在。 這張相片 有翕著 天頂三項無仝款 ê 現象，包括自然現象 kah 人造現象。

[POJ] Saⁿ-têng Hui-kng ê Peng-tó Iā-khong

Che ji̍t-thâu khòaⁿ–khí-lâi káⁿ-ná m̄-sī hiah-nī pêng-chēng. I ē phùn-chhut thài-iông-hong, to̍h sī bô ún-tēng ê ko-lêng tiān-chú-liû kah chit-chí-liû. Cha̍h-tiān lia̍p-chú ē kái-piàn Tē-kiû chû-chân ê hêng-thé, jî-chhiáⁿ lia̍p-chú ê lō͘-sòaⁿ kái-piàn liáu-āu, ē kah Tē-kiû tāi-khì lāi-té goân-chú sio-lòng, sán-seng ke̍k-kng, chhiūⁿ siòng-phìⁿ tò-pêng ê chheⁿ-kng tio̍h-sī. Tē-kiû pún-sin ê tē-chit oa̍h-tōng-le̍k sǹg kiông–ê, tē-piáu ū bē-chió hóe-soaⁿ. Pí-lūn-kóng, Peng-tó ê Fagradalsfjall hóe-soaⁿ, to̍h siòng-phìⁿ tiong-ng leh phùn kam-á-sek sio khì-thé hit-tah tio̍h-sī. Peng-tó sī Tē-kiû bīn-téng tē-chit oa̍h-tāng siōng-chē ê só͘-chāi. Siòng-phìⁿ siōng chiàⁿ-pêng leh chhiong pe̍h-ian ê sī Svartsengi Tē-jia̍t Hoat-tiān-chhiúⁿ, to̍h sī chhong chhut hit-ê ū-miâ ê jîn-chō Nâ-sek Lāi-hái-á ê só͘-chāi. Chit-tiuⁿ siòng-phìⁿ ū hip-tio̍h thiⁿ-téng saⁿ hāng bô-kâng-khoán ê hiān-siōng, pau-koat chū-jiân hiān-siōng kah jîn-chō hiān-siōng.

[KIP] Sann-tîng Hui-kng ê Ping-tó Iā-khong

Tse ji̍t-thâu khuànn–khí-lâi kánn-ná m̄-sī hiah-nī pîng-tsīng. I ē phùn-tshut thài-iông-hong, to̍h sī bô ún-tīng ê ko-lîng tiān-tsú-liû kah tsit-tsí-liû. Tsa̍h-tiān lia̍p-tsú ē kái-piàn Tē-kiû tsû-tsân ê hîng-thé, jî-tshiánn lia̍p-tsú ê lōo-suànn kái-piàn liáu-āu, ē kah Tē-kiû tāi-khì lāi-té guân-tsú sio-lòng, sán-sing ki̍k-kng, tshiūnn siòng-phìnn tò-pîng ê tshenn-kng tio̍h-sī. Tē-kiû pún-sin ê tē-tsit ua̍h-tōng-li̍k sǹg kiông–ê, tē-piáu ū bē-tsió hué-suann. Pí-lūn-kóng, Ping-tó ê Fagradalsfjall hué-suann, to̍h siòng-phìnn tiong-ng leh phùn kam-á-sik sio khì-thé hit-tah tio̍h-sī. Ping-tó sī Tē-kiû bīn-tíng tē-tsit ua̍h-tāng siōng-tsē ê sóo-tsāi. Siòng-phìnn siōng tsiànn-pîng leh tshiong pe̍h-ian ê sī Svartsengi Tē-jia̍t Huat-tiān-tshiúnn, to̍h sī tshong tshut hit-ê ū-miâ ê jîn-tsō Nâ-sik Lāi-hái-á ê sóo-tsāi. Tsit-tiunn siòng-phìnn ū hip-tio̍h thinn-tíng sann hāng bô-kâng-khuán ê hiān-siōng, pau-kuat tsū-jiân hiān-siōng kah jîn-tsō hiān-siōng.

[English] A Triply Glowing Night Sky over Iceland

The Sun is not the quiet place it seems. It expels an unsteady stream of energetic electrons and protons known as the solar wind. These charged particles deform the Earth’s magnetosphere, change paths, and collide with atoms in Earth’s atmosphere, causing the generation of light in auroras like that visible in green in the image left. Earth itself is also geologically active and covered with volcanoes. For example, Fagradalsfjall volcano in Iceland, seen emitting hot gas in orange near the image center. Iceland is one of the most geologically active places on Earth. On the far right is the Svartsengi geothermal power plant which creates the famous human-made Blue Lagoon, shown emitting white gas plumes. The featured composition therefore highlights three different sky phenomena, including both natural and human-made phenomena.

詞彙學習（漢羅/POJ/KIP/華語/English）

• 【輝光】hui-kng/hui-kng/輝光/glow
• 【太陽風】thài-iông-hong/thài-iông-hong/太陽風/solar wind
• 【電子流】tiān-chú-liû/tiān-tsú-liû/電子流/stream of electron
• 【質子流】chit-chú-liû/tsit-tsú-liû/質子流/stream of proton
• 【閘電粒子】chah-tiān lia̍p-chú/tsah-tiān lia̍p-tsú/帶電粒子/charged particles
• 【電子】tiān-chú/tiān-tsú/電子/electron
• 【質子】chit-chú/tsit-tsú/質子/proton
• 【粒子】lia̍p-chú/lia̍p-tsú/粒子/particle
• 【原子】goân-chú/guân-tsú/原子/atom
• 【磁層】chû-chân/tsû-tsân/磁層/magnetosphere
• 【地熱發電廠】tē-jia̍t hoat-tiān-chhiúⁿ/tē-jia̍t huat-tiān-tshiúnn/地熱發電廠/geothermal power plant
• 【藍色內海仔】Nâ-sek Lāi-hái-á/Nâ-sik Lāi-hái-á/藍色瀉湖/Blue Lagoon
• 【極光】ke̍k-kng/ki̍k-kng/極光/auroras