草帽仔星系 ê 紅外線影像

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Sombrero Galaxy in Infrared
• 影像來源：R. Kennicutt (Steward Obs.) et al., SSC, JPL, Caltech, NASA
• 台文翻譯：An-Li Tsai (NSYSU)

[漢羅] 草帽仔星系 ê 紅外線影像

這个浮 tī 空中 ê 環，其實 kah 星系平大。 實際上，伊是一个星系，上無嘛是星系 ê 一部份。 這个足媠 ê 草帽仔星系，是 室女座星系團 內底 上大粒 ê 星系。 Tī 可見光影像內底，烏暗 塗粉 帶 kā 草帽仔星系 中央閘去矣，毋過 tī 紅外線煞光爍爍。 這張 tī 紅外線 波段發光 ê 相片，是踅地球 leh 飛 ê Spitzer 太空望遠鏡 翕–ê 紅外線波段 假色 影像，kah NASA ê Hubble 太空望遠鏡 可見光 影像 疊做伙 ê 結果。 影像經過數位處理了後有較清楚。 草帽仔星系 嘛 叫做 M104，差不多有 5 萬 光年 闊，就 tī 2800 萬光年遠 ê 所在。 M104 用細台望遠鏡就看會著，伊就 tī 室女座 ê 方向遐。

[POJ] Chháu-bō-á Seng-hē ê Âng-gōa-sòaⁿ Iáⁿ-siōng

Chit-ê phû tī khong-tiong ê khoân, kî-si̍t kah seng-hē pêⁿ tōa. Si̍t-chè-siōng, i sī chi̍t-ê seng-hē, siōng-bô mā-sī seng-hē ê chi̍t-pō͘-hūn. Chit-ê chiok súi ê Chháu-bō-á seng-hē, sī Sek-lú-chō seng-hē-thoân lāi-té siōng tōa-lia̍p ê seng-hē. Tī khó-kiàn-kng iáⁿ-siōng lāi-té, o͘-àm thô͘-hún-tòa kā Chháu-bō-á seng-hē tiong-ng cha̍h khì–ah, m̄-koh tī âng-gōa-sòaⁿ soah kng-sih-sih. Chit-tiuⁿ tī âng-gōa-sòaⁿ pho-tōaⁿ hoat-kng ê siòng-phìⁿ, sī se̍h Tē-kiû leh poe ê Spitzer Thài-khong Bōng-oán-kiàⁿ hip–ê âng-gōa-sòaⁿ pho-tōaⁿ ká-sek iáⁿ-siōng, kah NASA ê Hubble Thài-khong Bōng-oán-kiàⁿ khó-kiàn-kng iáⁿ-siōng tha̍h chò-hóe ê kiat-kó. Iáⁿ-siōng keng-kòe sò͘-ūi chhú-lí liáu-āu ū khah chheng-chhó. Chháu-bō-á seng-hē mā kiò-chò M104, chha-put-to ū 5 bān kng-nî khoah, to̍h tī 2800 bān kng-nî hn̄g ê só͘-chāi. M104 iōng sè-tâi bōng-oán-kiàⁿ tiō khòaⁿ-ē-tio̍h, i to̍h tī Sek-lú-chō ê hong-hiòng hia.

[KIP] Tsháu-bō-á Sing-hē ê Âng-guā-suànn Iánn-siōng

Tsit-ê phû tī khong-tiong ê khuân, kî-si̍t kah sing-hē pênn tuā. Si̍t-tsè-siōng, i sī tsi̍t-ê sing-hē, siōng-bô mā-sī sing-hē ê tsi̍t-pōo-hūn. Tsit-ê tsiok suí ê Tsháu-bō-á sing-hē, sī Sik-lú-tsō sing-hē-thuân lāi-té siōng tuā-lia̍p ê sing-hē. Tī khó-kiàn-kng iánn-siōng lāi-té, oo-àm thôo-hún-tuà kā Tsháu-bō-á sing-hē tiong-ng tsa̍h khì–ah, m̄-koh tī âng-guā-suànn suah kng-sih-sih. Tsit-tiunn tī âng-guā-suànn pho-tuānn huat-kng ê siòng-phìnn, sī se̍h Tē-kiû leh pue ê Spitzer Thài-khong Bōng-uán-kiànn hip–ê âng-guā-suànn pho-tuānn ká-sik iánn-siōng, kah NASA ê Hubble Thài-khong Bōng-uán-kiànn khó-kiàn-kng iánn-siōng tha̍h tsò-hué ê kiat-kó. Iánn-siōng king-kuè sòo-uī tshú-lí liáu-āu ū khah tshing-tshó. Tsháu-bō-á sing-hē mā kiò-tsò M104, tsha-put-to ū 5 bān kng-nî khuah, to̍h tī 2800 bān kng-nî hn̄g ê sóo-tsāi. M104 iōng sè-tâi bōng-uán-kiànn tiō khuànn-ē-tio̍h, i to̍h tī Sik-lú-tsō ê hong-hiòng hia.

[English] The Sombrero Galaxy in Infrared

This floating ring is the size of a galaxy. In fact, it is a galaxy – or at least part of one: the photogenic Sombrero Galaxy, one of the largest galaxies in the nearby Virgo Cluster of Galaxies. The dark band of dust that obscures the mid-section of the Sombrero Galaxy in optical light actually glows brightly in infrared light. The featured image, digitally sharpened, shows the infrared glow, recently recorded by the orbiting Spitzer Space Telescope, superposed in false-color on an existing image taken by NASA’s Hubble Space Telescope in visible light. The Sombrero Galaxy, also known as M104, spans about 50,000 light years across and lies 28 million light years away. M104 can be seen with a small telescope in the direction of the constellation Virgo.

詞彙學習（漢羅/POJ/KIP/華語/English）

• 【草帽仔星系】Chháu-bō-á seng-hē/Tsháu-bō-á sing-hē/草帽星系/Sombrero Galaxy
• 【室女座】Sek-lú-chō/Sik-lú-tsō/室女座/Virgo
• 【室女座星系團】Sek-lú-chō seng-hē-thoân/Sik-lú-tsō sing-hē-thuân/室女座星系團/Virgo Cluster of Galaxies
• 【假色影像】ká-sek iáⁿ-siōng/ká-sik iánn-siōng/假色影像/false-color image
• 【M104】M it-khòng-sù/M it-khòng-sù/M104/M104
• 【Hubble 太空望遠鏡】Hubble Thài-khong bōng-oán-kiàⁿ/Hubble Thài-khong bōng-uán-kiànn/哈伯太空望遠鏡/Hubble Space Telescope
• 【Spitzer 太空望遠鏡】Spitzer Thài-khong bōng-oán-kiàⁿ/Spitzer Thài-khong bōng-uán-kiànn/史匹哲太空望遠鏡/Spitzer Space Telescope