獵鷹火箭 kah 紅石火箭

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Falcon and the Redstone
• 影像來源 kah 版權：Matt Haskell
• 台文翻譯：An-Li Tsai (NSYSU)

[漢羅] 獵鷹火箭 kah 紅石火箭

世界協調時間 7 月 29 透早 tiàm Canaveral 角 5 號發射台 翕 ê 這張相片內底，有紅石火箭 kah 金星太空艙。 除了紅石火箭，8 分鐘長 ê 感光嘛有翕著 SpaceX 獵鷹重型火箭 發射 ê 弧形軌跡。 獵鷹火箭有裝重型 通訊衛星，這台重 9 噸，是歷史紀錄上重–ê。 伊按算欲飛到 3 萬 5400 公里懸 ê 地球仝步軌道去。 紅石火箭 ê 歷史記錄，就是 tī 1961 年 5 月彼擺 ê 發射，kā 太空人 Alan Shepard 送去 次軌道，差不多飛到海拔 187 公里懸 ê 所在。 畫面頂懸附近，獵鷹火箭有一組 2 个會當重複使用 ê 雙爿推進器，in 會 kah 火箭分開，進行目𥍉仔久 ê 燃燒。 In 會做伙轉來 地球，降落 tī 遠方 ê Canaveral 降落區 1 號 kah 2 號遐。

[POJ] La̍h-eng Hóe-chìⁿ kah Âng-chio̍h Hóe-chìⁿ

Sè-kài hia̍p-tiau sî-kan 7 goe̍h 29 thàu-chá tiàm Canaveral kak 5 hō hoat-siā-tâi hip–ê chit tiuⁿ siòng-phìⁿ lāi-té, ū Âng-chio̍h hóe-chìⁿ kah Kim-chhiⁿ thài-khong-chhng. Tû-liáu Âng-chio̍h hóe-chìⁿ, 8 hun-cheng tn̂g ê kám-kng mā ū hip-tio̍h SpaceX La̍h-eng tāng-hêng hóe-chìⁿ hoat-siā ê hô͘-hêng khúi-jiah. La̍h-eng hóe-chìⁿ ū chng tāng-hêng thong-sìn ūi-chhiⁿ, chit-tâi tāng 9 tùn, sī le̍k-sú kì-lo̍k siōng tāng–ê. I àn-sǹg beh poe-kàu 3 bān 5400 kong-lí koân ê Tē-kiû kāng-pō͘ kúi-tō khì. Âng-chio̍h hóe-chìⁿ ê le̍k-sú kì-lo̍k, tio̍h-sī tī 1961 nî 5 goe̍h hit pái ê hoat-siā, kā thài-khong-jîn Alan Shepard sàng-khì chhù-kúi-tō, chha-put-to poe-kàu hái-poa̍t 187 kong-lí koân ê só͘-chāi. Ōe-bīn téng-koân hù-kīn, La̍h-eng hóe-chìⁿ ū chi̍t cho͘ 2 ê ē-tàng tiông-ho̍k sú-iōng ê siang-pêng thui-chìn-khì, in ē kah hóe-chìⁿ hun-khui, chìn-hêng ba̍k-nih-á-kú ê jiân-sio. In ē chò-hóe tńg-lâi Tē-kiû, kàng-lo̍h tī oán-hong ê Canaveral kàng-lo̍h khu 1 hō kah 2 hō hia.

[KIP] La̍h-ing Hué-tsìnn kah Âng-tsio̍h Hué-tsìnn

Sè-kài hia̍p-tiau sî-kan 7 gue̍h 29 thàu-tsá tiàm Canaveral kak 5 hō huat-siā-tâi hip–ê tsit tiunn siòng-phìnn lāi-té, ū Âng-tsio̍h hué-tsìnn kah Kim-tshinn thài-khong-tshng. Tû-liáu Âng-tsio̍h hué-tsìnn, 8 hun-tsing tn̂g ê kám-kng mā ū hip-tio̍h SpaceX La̍h-ing tāng-hîng hué-tsìnn huat-siā ê hôo-hîng khuí-jiah. La̍h-ing hué-tsìnn ū tsng tāng-hîng thong-sìn uī-tshinn, tsit-tâi tāng 9 tùn, sī li̍k-sú kì-lo̍k siōng tāng–ê. I àn-sǹg beh pue-kàu 3 bān 5400 kong-lí kuân ê Tē-kiû kāng-pōo kuí-tō khì. Âng-tsio̍h hué-tsìnn ê li̍k-sú kì-lo̍k, tio̍h-sī tī 1961 nî 5 gue̍h hit pái ê huat-siā, kā thài-khong-jîn Alan Shepard sàng-khì tshù-kuí-tō, tsha-put-to pue-kàu hái-pua̍t 187 kong-lí kuân ê sóo-tsāi. Uē-bīn tíng-kuân hù-kīn, La̍h-ing hué-tsìnn ū tsi̍t tsoo 2 ê ē-tàng tiông-ho̍k sú-iōng ê siang-pîng thui-tsìn-khì, in ē kah hué-tsìnn hun-khui, tsìn-hîng ba̍k-nih-á-kú ê jiân-sio. In ē tsò-hué tńg-lâi Tē-kiû, kàng-lo̍h tī uán-hong ê Canaveral kàng-lo̍h khu 1 hō kah 2 hō hia.

[English] The Falcon and the Redstone

In a photo from the early hours of July 29 (UTC), a Redstone rocket and Mercury capsule are on display at Cape Canaveral Launch Complex 5. Beyond the Redstone, the 8 minute long exposure has captured the arcing launch streak of a SpaceX Falcon Heavy rocket. The Falcon’s heavy communications satellite payload, at a record setting 9 metric tons, is bound for geosynchronous orbit some 22,000 miles above planet Earth. The historic launch of a Redstone rocket carried astronaut Alan Shepard on a suborbital spaceflight in May 1961 to an altitude of about 116 miles. Near the top of the frame, this Falcon rocket’s two reusable side boosters separate and execute brief entry burns. They returned to land side by side at Canaveral’s Landing Zone 1 and 2 in the distance.

詞彙學習（漢羅/POJ/KIP/華語/English）

• 【獵鷹火箭】La̍h-eng hóe-chìⁿ/La̍h-ing hué-tsìnn/獵鷹火箭/fhe Falcon rocket
• 【紅石火箭】Âng-chioh hóe-chìⁿ/Âng-tsioh hué-tsìnn/紅石火箭/the Redstone rocket
• 【金星太空艙】Kim-chhiⁿ thài-khong-chhng/Kim-tshinn thài-khong-tshng/金星太空艙/Mercury capsule
• 【通訊衛星】thong-sìn ūi-chhiⁿ/thong-sìn uī-tshinn/通訊衛星/communications satellite
• 【雙爿推進器】siang-pêng thui-chìn-khì/siang-pîng thui-tsìn-khì/雙邊推進器/side boosters
• 【次軌道】chhù-kúi-tō/tshù-kuí-tō/次軌道/suborbital
• 【仝步軌道】kāng-pō͘ kúi-tō/kāng-pōo kuí-tō/同步軌道/geosynchronous orbit
• 【海拔】hái-poa̍t/hái-pua̍t/海拔/altitude