波江座內底 ê 星系對

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Galaxies in the River
• 影像來源 kah 許可：CTIO/NOIRLab/DOE/NSF/AURA; R. Colombari, M. Zamani & D. de Martin (NSF’s NOIRLab)
• 台文翻譯：An-Li Tsai (NCU)

[漢羅] 波江座內底 ê 星系對

大粒星系是 kā 細粒星系食去，才會愈來愈大粒。 就算是咱家己 ê 銀河嘛是有 leh 進行 仝一類星系互食 ê 行為，kā 傷倚、去予銀河重力搝牢 ê 一寡較細粒 ê 星系 吸入來。 實際上，這款行為 tī 宇宙內底是 足四常–ê。 像這對 tī 南天星座 波江座 溪邊 引人注目 ê 交互作用星系 就是這款星系。 In 就 tī 5000 萬光年遠 ê 所在，這个大型變形 ê 捲螺仔星系 NGC 1532 kah 矮星系 NGC 1531 ê 引力 leh 相戰，毋過較細 ê 星系 落尾會輸去。 捲螺仔星系 NGC 1532 是側向星系，大細差不多有 10 萬光年大。 這張翕甲足清楚 ê 合併星系，是 chhāi tī 智利 Cerro Tololo ê 美洲洲際天文台 ê 美國國家科學基金會 ê Blanco 4 公尺望遠鏡 頂懸 鬥 ê 暗能量相機 翕–ê。 科學家認為講，NGC 1532 kah 1531 這組 星系對，應該 kah 進前研究足深 ê 正向捲螺仔星系對 M51 kah 伊 ê 星系伴 欲仝欲仝。

[POJ] Pho-kang-chō lāi-té ê Seng-hē-tùi

Tōa-lia̍p seng-hē sī kā sè-lia̍p seng-hē chia̍h khì, chiah-ē lú-lâi-lú tōa-lia̍p. Tiō-sǹg-sī lán ka-kī ê Gîn-hô mā-sī ū leh chìn-hêng kāng chi̍t-lūi seng-hē hō͘-chia̍h ê hêng-ûi, kā siuⁿ óa, khì hō͘ Gîn-hô tiōng-le̍k khiú-tiâu ê chi̍t-kóa khah sè-lia̍p ê seng-hē khip–li̍p-lâi. Si̍t-chè-siōng, chit-khoán hêng-ûi tī ú-tiū lāi-té sī chok sù-siông–ê. Chhiūⁿ chit-tùi tī lâm-thian seng-chō Pho-kang-chō khe-piⁿ ín-lâng-chù-bo̍k ê kau-hō͘ chok-iōng seng-hē to̍h-sī chit-khoán seng-hē. In tō tī 5000 bān kng-nî hn̄g ê só͘-chāi, chit-ê tōa-hêng piàn-hêng ê kńg-lê-á seng-hē NGC 1532 kah é-seng-hē NGC 1531 ê ín-le̍k leh sio-chiàn, m̄-koh khah sè ê seng-hē lo̍h-bóe ē su–khì. Kńg-lê-á seng-hē NGC 1532 sī chhek-hiòng seng-hē, tōa-sè chha-put-to ū 10 bān kng-nî tōa. Chit-tiuⁿ hip kah chiok chheng-chhó ê ha̍p-pèng seng-hē, sī chhāi tī Tì-lī Cerro Tololo ê Bí-chiu Chiu-chè Thian-bûn-tâi ê Bí-kok Kok-ka Kho-ha̍k Ki-kim-hōe ê Blanco 4 kong-chhioh bōng-oán-kiàⁿ téng-koân tàu ê àm-lêng-liōng siòng-ki hip–ê. Kho-ha̍k-ka jīn-ûi kóng, NGC 1532 kah 1531 chit-cho͘ seng-hē-tùi, eng-kai kah chìn-chêng gián-kiù chiok chhim ê chiàⁿ-hiòng kńg-lê-á seng-hē-tùi M̂1 kah i ê seng-hē-phōaⁿ beh-kǎng-beh kǎng.

[KIP] Pho-kang-tsō lāi-té ê Sing-hē-tuì

Tuā-lia̍p sing-hē sī kā sè-lia̍p sing-hē tsia̍h khì, tsiah-ē lú-lâi-lú tuā-lia̍p. Tiō-sǹg-sī lán ka-kī ê Gîn-hô mā-sī ū leh tsìn-hîng kāng tsi̍t-luī sing-hē hōo-tsia̍h ê hîng-uî, kā siunn uá, khì hōo Gîn-hô tiōng-le̍k khiú-tiâu ê tsi̍t-kuá khah sè-lia̍p ê sing-hē khip–li̍p-lâi. Si̍t-tsè-siōng, tsit-khuán hîng-uî tī ú-tiū lāi-té sī tsok sù-siông–ê. Tshiūnn tsit-tuì tī lâm-thian sing-tsō Pho-kang-tsō khe-pinn ín-lâng-tsù-bo̍k ê kau-hōo tsok-iōng sing-hē to̍h-sī tsit-khuán sing-hē. In tō tī 5000 bān kng-nî hn̄g ê sóo-tsāi, tsit-ê tuā-hîng piàn-hîng ê kńg-lê-á sing-hē NGC 1532 kah é-sing-hē NGC 1531 ê ín-le̍k leh sio-tsiàn, m̄-koh khah sè ê sing-hē lo̍h-bué ē su–khì. Kńg-lê-á sing-hē NGC 1532 sī tshik-hiòng sing-hē, tuā-sè tsha-put-to ū 10 bān kng-nî tuā. Tsit-tiunn hip kah tsiok tshing-tshó ê ha̍p-pìng sing-hē, sī tshāi tī Tì-lī Cerro Tololo ê Bí-tsiu Tsiu-tsè Thian-bûn-tâi ê Bí-kok Kok-ka Kho-ha̍k Ki-kim-huē ê Blanco 4 kong-tshioh bōng-uán-kiànn tíng-kuân tàu ê àm-lîng-liōng siòng-ki hip–ê. Kho-ha̍k-ka jīn-uî kóng, NGC 1532 kah 1531 tsit-tsoo sing-hē-tuì, ing-kai kah tsìn-tsîng gián-kiù tsiok tshim ê tsiànn-hiòng kńg-lê-á sing-hē-tuì M51 kah i ê sing-hē-phuānn beh-kǎng-beh kǎng.

[English] Galaxies in the River

Large galaxies grow by eating small ones. Even our own galaxy engages in a sort of galactic cannibalism, absorbing small galaxies that are too close and are captured by the Milky Way’s gravity. In fact, the practice is common in the universe and illustrated by this striking pair of interacting galaxies from the banks of the southern constellation Eridanus, The River. Located over 50 million light years away, the large, distorted spiral NGC 1532 is seen locked in a gravitational struggle with dwarf galaxy NGC 1531 a struggle the smaller galaxy will eventually lose. Seen nearly edge-on, spiral NGC 1532 spans about 100,000 light-years. The merging galaxies are captured in this sharp image from the Dark Energy Camera mounted on the National Science Foundation’s Blanco 4-meter Telescope at Cerro Tololo Inter-American Observatory in Chile. The NGC 1532/1531 pair is thought to be similar to the well-studied system of face-on spiral and small companion known as M51.

詞彙學習（漢羅/POJ/KIP/華語/English）

• 【波江座】Pho-kang-chō/Pho-kang-tsō/波江座/Eridanus
• 【星系對】seng-hē-tùi/sing-hē-tuì/星系對/galaxy pair
• 【星系伴】seng-hē-phōaⁿ/sing-hē-puann/伴星系/companion galaxy
• 【星系互食】seng-hē hō͘-chia̍h/sing-hē hōo-tsia̍h/星系互食/galactic cannibalism
• 【交互作用星系】kau-hō͘-chok-iōng seng-hē/kau-hōo-tsok-iōng sing-hē/交互作用星系/interacting galaxies
• 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
• 【NGC 1532】NGC it-ngó͘-sam-jī/NGC it-ngóo-sam-jī/NGC 1532/NGC 1532
• 【NGC 1531】NGC it-ngó͘-sam-it/NGC it-ngóo-sam-it/NGC 1531/NGC 1531
• 【矮星系】é-seng-hē/é-sing-hē/矮星系/dwarf galaxy
• 【側向星系】chhek-hiòng seng-hē/tshik-hiòng sing-hē/側向星系/edge-on galaxy
• 【正向星系】chiàⁿ-hiòng seng-hē/tsiànn-hiòng sing-hē/正向星系/face-on galaxy
• 【合併星系】ha̍p-pèng seng-hē/ha̍p-pìng sing-hē/合併星系/merging galaxies
• 【美洲洲際天文台】Bí-chiu Chiu-chè Thian-bûn-tâi/Bí-tsiu Tsiu-tsè Thian-bûn-tâi/美洲洲際天文台/Inter-American Observatory
• 【美國國家科學基金會】Bí-kok Kok-ka Kho-ha̍k Ki-kim-hōe/Bí-kok Kok-ka Kho-ha̍k Ki-kim-huē/美國國家科學基金會/the National Science Foundation
• 【暗能量相機】Àm-lêng-liōng Siòng-ki/Àm-lîng-liōng Siòng-ki/暗能量相機/the Dark Energy Camera