流星崩去 會發出化學光

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Chemicals Glow as a Meteor Disintegrates
• 影像來源 kah 版權：Michael Kleinburger
• 台文翻譯：An-Li Tsai (NCU)

[漢羅] 流星崩去 會發出化學光

流星有可能有足濟色。 是講 人類 ê 目睭 通常是無法度看著遐爾濟色，毋過 kha-mé-lah 是會使。 這張圖 是一粒 火流星，是一粒當咧崩去 ê 流星。 伊毋但是攝影師 看過 上光 ê 流星，嘛是上濟色 ê 流星。 這粒流星是 7 月中 tī 奧地利 Hochkar 山頂 chhāi kha-mé-lah 欲翕銀河系中央帶 ê 時陣，順紲翕著–ê。 這寡 輻射沙塗，真有可能是 彗星 抑是 小行星 tī 足久以前擲出來–ê。 是講 in 嘛誠衰，煞落落來 地球 ê 大氣層。 流星 ê 色光 定定是 流星 崩去 ê 時陣，放出來 ê 離子化 化學元素。 青藍色 ê 通常是 ùi 鎂 來–ê，kha-lú-sìm-muh 會輻射出茄仔色 ê 光，白銅 會發出青光。 毋過，紅光通常是 ùi 地球大氣層內底 ê 高能 窒素 kah 酸素 來–ê。 這个遮爾光 ê 火流星 一目𥍉 就無去矣，猶無到 1 秒咧。 毋過伊有留一條 去予風吹振動 ê 離子痕跡，這咱就看會著啊，差不多有 1 分鐘久。

[POJ] Liû-chhiⁿ pang–khì ē hoat-chhut Hòa-ha̍k-kng

Liû-chhiⁿ ū khó-lêng ū chiok chē sek. Sī-kóng jîn-lūi ê ba̍k-chiu thong-siông sī bô-hoat-tō͘ khòaⁿ-tio̍h hiah-nī chē sek, m̄-koh kha-mé-lah sī ē-sái. Chit-tiuⁿ tô͘ sī chi̍t-lia̍p hóe-liû-chhiⁿ, sī chi̍t-lia̍p tng-teh pang–khì ê liû-chhiⁿ. I m̄ tān sī liap-iáⁿ-su khòaⁿ–kòe siōng kng ê liû-chhiⁿ, mā-sī siōng chē sek ê liû-chhiⁿ. Chit lia̍p liû-chhiⁿ sī 7 goe̍h-tiong tī Ò-tē-lī Hochkar soaⁿ-téng chhāi kha-mé-lah beh hip Gîn-hô-hē tiong-ng-tòa ê sî-chūn, sūn-sòa hip-tio̍h–ê. Chit-kóa hok-siā soa-thô͘, chin ū khó-lêng sī hūi-chhiⁿ ia̍h-sī sió-kiâⁿ-chhiⁿ tī chiok kú í-chêng tàn–chhut-lâi–ê. Sī-kóng in mā chiâⁿ soe, soah lak-lo̍h-lâi Tē-kiû ê tāi-khì-chân. Liû-chhiⁿ ê sek-kng tiāⁿ-tiāⁿ sī liû-chhiⁿ pang–khì ê sî-chūn, pàng–chhut-lâi ê lī chí-hòa hòa-ha̍k goân-sò͘. Chhiⁿ-nâ-sek ê thong-siông sī ùi bí lâi–ê, kha-lú-sìm-muh ē hok-siā chhut kiô-á-sek ê kng, pe̍h-tâng ē hoat-chhut chhiⁿ-kng. M̄-koh, âng-kng thong-siông sī ùi Tē-kiû tāi-khì-chân lāi-té ê ko-lêng chit-sò͘ kah sàng-sò͘ lâi–ê. Chit-ê chiah-nī kng ê hóe-liû-chhiⁿ chi̍t-ba̍k-nih tō bô–khì–ah, iáu bô-kàu 1 bió leh. M̄-koh i ū lâu chi̍t-tiâu khì hō͘ hong chhoe tín-tāng ê lī-chú hûn-jiah, che lán to̍h khòaⁿ-ē-tio̍h–ah, chha-put-to ū 1 hun-cheng kú.

[KIP] Liû-tshinn pang–khì ē huat-tshut Huà-ha̍k-kng

Liû-tshinn ū khó-lîng ū tsiok tsē sik. Sī-kóng jîn-luī ê ba̍k-tsiu thong-siông sī bô-huat-tōo khuànn-tio̍h hiah-nī tsē sik, m̄-koh kha-mé-lah sī ē-sái. Tsit-tiunn tôo sī tsi̍t-lia̍p hué-liû-tshinn, sī tsi̍t-lia̍p tng-teh pang–khì ê liû-tshinn. I m̄ tān sī liap-iánn-su khuànn–kuè siōng kng ê liû-tshinn, mā-sī siōng tsē sik ê liû-tshinn. Tsit lia̍p liû-tshinn sī 7 gue̍h-tiong tī Ò-tē-lī Hochkar suann-tíng tshāi kha-mé-lah beh hip Gîn-hô-hē tiong-ng-tuà ê sî-tsūn, sūn-suà hip-tio̍h–ê. Tsit-kuá hok-siā sua-thôo, tsin ū khó-lîng sī huī-tshinn ia̍h-sī sió-kiânn-tshinn tī tsiok kú í-tsîng tàn–tshut-lâi–ê. Sī-kóng in mā tsiânn sue, suah lak-lo̍h-lâi Tē-kiû ê tāi-khì-tsân. Liû-tshinn ê sik-kng tiānn-tiānn sī liû-tshinn pang–khì ê sî-tsūn, pàng–tshut-lâi ê lī tsí-huà huà-ha̍k guân-sòo. Tshinn-nâ-sik ê thong-siông sī uì bí lâi–ê, kha-lú-sìm-muh ē hok-siā tshut kiô-á-sik ê kng, pe̍h-tâng ē huat-tshut tshinn-kng. M̄-koh, âng-kng thong-siông sī uì Tē-kiû tāi-khì-tsân lāi-té ê ko-lîng tsit-sòo kah sàng-sòo lâi–ê. Tsit-ê tsiah-nī kng ê hué-liû-tshinn tsi̍t-ba̍k-nih tō bô–khì–ah, iáu bô-kàu 1 bió leh. M̄-koh i ū lâu tsi̍t-tiâu khì hōo hong tshue tín-tāng ê lī-tsú hûn-jiah, tse lán to̍h khuànn-ē-tio̍h–ah, tsha-put-to ū 1 hun-tsing kú.

[English] Chemicals Glow as a Meteor Disintegrates

Meteors can be colorful. While the human eye usually cannot discern many colors, cameras often can. Pictured here is a fireball, a disintegrating meteor that was not only one of the brightest the photographer has ever seen, but colorful. The meteor was captured by chance in mid-July with a camera set up on Hochkar Mountain in Austria to photograph the central band of our Milky Way galaxy. The radiant grit, likely cast off by a comet or asteroid long ago, had the misfortune to enter Earth’s atmosphere. Colors in meteors usually originate from ionized chemical elements released as the meteor disintegrates, with blue-green typically originating from magnesium, calcium radiating violet, and nickel glowing green. Red, however, typically originates from energized nitrogen and oxygen in the Earth’s atmosphere. This bright meteoric fireball was gone in a flash – less than a second – but it left a wind-blown ionization trail that remained visible for almost a minute.

詞彙學習（漢羅/POJ/KIP/華語/English）

• 【流星】liû-chhiⁿ/liû-tshinn/流星/meteor
• 【化學光】hòa-ha̍k-kng/huà-ha̍k-kng/化學光/chemicals glow
• 【火流星】hóe-liû-chhiⁿ/hué-liû-tshinn/火流星/fireball
• 【銀河系】Gîn-hô-hē/Gîn-hô-hē/銀河系/Milky Way galaxy
• 【中央帶】tiong-ng-tòa/tiong-ng-tuà/中央帶/central band
• 【彗星】hūi-chhiⁿ/huī-tshinn/彗星/comet
• 【小行星】sió-kiâⁿ-chhiⁿ/sió-kiânn-tshinn/小行星/asteroid
• 【kha-lú-sìm-muh】kha-lú-sìm-muh/kha-lú-sìm-muh/鈣/calcium
• 【鎂】bí/bí/鎂/magnesium
• 【白銅】pe̍h-tâng/pe̍h-tâng/鎳/nickel
• 【窒素】chit-sò͘/tsit-sòo/氮/nitrogen
• 【酸素】sàng-sò͘/sàng-sòo/氧/oxygen
• 【奧地利】Ò-tē-lī/Ò-tē-lī/奧地利/Austria