行到近日點附近 ê 彗星 C/2023 E1 ATLAS

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet C/2023 E1 ATLAS near Perihelion
• 影像來源 kah 版權：Dan Bartlett
• 台文翻譯：An-Li Tsai (NCU)

[漢羅] 行到近日點附近 ê 彗星 C/2023 E1 ATLAS

咱 3 月才開始注意著 彗星 C/2023 E1 (ATLAS 彗星)，伊是 NASA 小行星攏地球 ê 最後警報系統 揣著 ê 另外一粒彗星。 ATLAS 彗星 會 tī 7 月 1 號行到近日點，就是伊 kah 太陽上倚彼位。 這張望遠鏡視野 內底 ê 彗星，是幾若工後 向 北天 ê 小熊座方向翕--ê。 內底有足媠 ê 青色彗鬚、較暗較狹 ê 離子尾溜、kah 背景 ê 恆星。 這粒彗星猶未行到伊 kah 地球上倚彼位。 8 月 18 彼工，這位欲參觀內太陽系 ê 人客，會行到 kah 咱地球差 3 光分左右 ê 距離。 照伊 leh 行 ê 軌道面 kah 黃道面 之間差 ê 角度，閣有伊 ê 軌道週期 85 年來看，彗星 C/2023 E1 (ATLAS 彗星) 應該 是 哈雷型彗星。

[POJ] Kiâⁿ kàu Kīn-ji̍t-tiám hù-kīn ê Hūi-chheⁿ C/2023 E ATLAS

Lán 3 goe̍h chiah khai-sí chù-ì-tio̍h Hūi-chheⁿ C/2023 E (ATLAS hūi-chheⁿ), i sī NASA Sió-kiâⁿ-chheⁿ lóng Tē-kiû ê Chòe-āu Kéng-pò Hē-thóng chhōe-tio̍h ê lēng-gōa chi̍t-lia̍p hūi-chheⁿ. ATLAS hūi-chheⁿ ē tī 7 goe̍h 1 hō kiâⁿ kàu kīn-ji̍t-tiám, tio̍h-sī i kah Thài-iông siōng óa hit ūi. Chit-tiuⁿ bōng-oán-kiàⁿ sī-iá lāi-té ê hūi-chheⁿ, sī kúi-nā kang āu hiòng pak-thian ê Sió-hîm-chō hong-hiòng hip--ê. Lāi-té ū chiok súi ê chheⁿ-sek hūi-chhiu, khah àm khah e̍h ê lī-chú bóe-liu, kah pōe-kéng ê hêng-chheⁿ. Chit-lia̍p hūi-chheⁿ iáu-bōe kiâⁿ kàu i kah Tē-kiû siōng óa hit ūi. 8 goe̍h 18 hit-kang, chit-ūi beh chham-koan Lōe-thài-iông-hē ê lâng-kheh, ē kiâⁿ kàu kah lán Tē-kiû chha 3 kng-hun chó-iū ê kū-lī. Chiàu i leh kiâⁿ ê kúi-tō-bīn kah n̂g-tō-bīn chi-kan chha ê kak-tō͘, koh-ū i ê kúi-tō chiu-kî 85 nî lâi-khòaⁿ, Hūi-chheⁿ C/2023 E (ATLAS hūi-chheⁿ) eng-kai sī Ha-lûi-hêng hūi-chheⁿ.

[KIP] Kiânn kàu Kīn-ji̍t-tiám hù-kīn ê Huī-tshenn C/2023 E ATLAS

Lán 3 gue̍h tsiah khai-sí tsù-ì-tio̍h Huī-tshenn C/2023 E (ATLAS huī-tshenn), i sī NASA Sió-kiânn-tshenn lóng Tē-kiû ê Tsuè-āu Kíng-pò Hē-thóng tshuē-tio̍h ê līng-guā tsi̍t-lia̍p huī-tshenn. ATLAS huī-tshenn ē tī 7 gue̍h 1 hō kiânn kàu kīn-ji̍t-tiám, tio̍h-sī i kah Thài-iông siōng uá hit uī. Tsit-tiunn bōng-uán-kiànn sī-iá lāi-té ê huī-tshenn, sī kuí-nā kang āu hiòng pak-thian ê Sió-hîm-tsō hong-hiòng hip--ê. Lāi-té ū tsiok suí ê tshenn-sik huī-tshiu, khah àm khah e̍h ê lī-tsú bué-liu, kah puē-kíng ê hîng-tshenn. Tsit-lia̍p huī-tshenn iáu-buē kiânn kàu i kah Tē-kiû siōng uá hit uī. 8 gue̍h 18 hit-kang, tsit-uī beh tsham-kuan Luē-thài-iông-hē ê lâng-kheh, ē kiânn kàu kah lán Tē-kiû tsha 3 kng-hun tsó-iū ê kū-lī. Tsiàu i leh kiânn ê kuí-tō-bīn kah n̂g-tō-bīn tsi-kan tsha ê kak-tōo, koh-ū i ê kuí-tō tsiu-kî 85 nî lâi-khuànn, Huī-tshenn C/2023 E (ATLAS huī-tshenn) ing-kai sī Ha-luî-hîng huī-tshenn.

[English] Comet C/2023 E1 ATLAS near Perihelion

Comet C/2023 E1 (ATLAS) was just spotted in March, another comet found by the NASA funded Asteroid Terrestrial-impact Last Alert System. On July 1 this Comet ATLAS reached perihelion, its closest approach to the Sun. Days later the telescopic comet was captured in this frame sporting a pretty greenish coma and faint, narrow ion tail against a background of stars in the far northern constellation Ursa Minor. This comet's closest approach to Earth is still to come though. On August 18 this visitor to the inner Solar System will be a mere 3 light-minutes or so from our fair planet. Based on its inclination to the ecliptic plane and orbital period of about 85 years C/2023 E1 (ATLAS) is considered a Halley-type comet.

詞彙學習