Akatsuki 號 太空船 翕--ê 金星 ê 紫外光影像

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Venus in Ultraviolet from Akatsuki
• 影像來源 kah 版權：JAXA, Planet-C Project Team; h/t: Mehmet Hakan Özsaraç
• 台文翻譯：An-Li Tsai (NCU)

[漢羅] Akatsuki 號太空船 翕--ê 金星 ê 紫外光影像

是按怎金星 kah 地球遮爾無仝？ 為著欲揣出這个答案，日本 進前發射 ê 機器人太空船 Akatsuki 號 tī 2015 年底 飛入去金星軌道。 伊進前有 5 年 ê 時間是無照計畫 tī 內太陽系 內底賴賴趖。 就算 Akatsuki ê 性命長度已經超過本底 ê 計畫，毋過因為太空船 kah 儀器攏運作甲好勢好勢，所以大部份 ê 任務總算是 有繼續完成。 Akatsuki ê 儀器嘛叫做 金星 氣候軌道衛星，是 leh 調查咱 ê 姊妹仔行星 金星 頂懸 一寡咱猶無了解 ê 代誌，包括火山是毋是猶活跳跳、實密 ê 大氣內底是毋是會產生爍爁、風速是按怎會超過火星自轉 ê 速度 遐爾濟。 這張影像 是 Akatsuki ê UVI kha-mé-lah 翕--ê。 咱看會著日時彼爿 ê 金星 有 行星尺度 ê V-形雲。 影像內底有三款無仝色 ê 紫外光，閣有淺藍色 ê 二酸化硫，伊 ê 量是有變較少。 分析 Akatsuki ê 影像 kah 資料了後，除了 一寡發現以外，閣知影講金星有親像 地球高速氣流 仝款 ê 赤道噴流。

[POJ] Akatsuki hō Thài-khong-chûn hip--ê Kim-chheⁿ ê Chí-gōa-kng iáⁿ-siōng

Sī-án-chóaⁿ Kim-chheⁿ kah tē-kiû chiah-nī bô-kâng? Ūi-tio̍h beh chhōe-chhut chit-ê tap-àn, Ji̍t-pún chìn-chêng hoat-siā ê ki-khì-lâng thài-khong-chûn Akatsuki hō tī 2015 nî-té poe ji̍p-khì Kim-chheⁿ kúi-tō. I chìn-chêng ū 5 nî ê sî-kan sī bô chiàu kè-ōe tī Lōe Thài-iông-hē lāi-té lōa-lōa-sô. Tō-sǹg Akatsuki ê sìⁿ-miā tn̂g-tō͘ í-keng chhiau-kòe pún-té ê kè-ōe, m̄-koh in-ūi thài-khong-chûn kah gî-khì lóng ūn-chok kah hó-sè-hó-sè, só͘-í tōa-pō͘-hūn ê jīm-bū chóng-sǹg sī ū kè-sio̍k oân-sêng. Akatsuki ê gî-khì mā kiò-chò Kim-chheⁿ Khì-hāu Kúi-tō-ūi-chheⁿ, sī leh tiâu-cha lán ê chí-mōe-á kiâⁿ-chhiⁿ Kim-chheⁿ téng-koân chi̍t-kóa lán iáu bô liáu-kái ê tāi-chì, pau-koat hóe-soaⁿ sī-m̄-sī iáu oa̍h-thiàu-thiàu, cha̍t-ba̍t ê tāi-khì lāi-té sī-m̄-sī ē sán-seng sih-nah, hong-sok sī-án-chóaⁿ ē chhiau-kòe Hóe-chheⁿ chū-choán ê sok-tō͘ hiah-nī chē. Chit-tiuⁿ iáⁿ-siōng sī Akatsuki ê UVI kha-mé-lah hip--ê. Lán khòaⁿ-ē-tio̍h ji̍t-sî hit-pêng ê Kim-chheⁿ ū kiâⁿ-chhiⁿ chhioh-tō͘ ê V-hêng hûn. Iáⁿ-siōng lāi-té ū saⁿ-khoán bô-kâng-sek ê chí-gōa-kng, koh-ū chhián-nâ-sek ê jī-sng-hòa-liû, i ê liōng sī ū piàn khah chió. Hun-sek Akatsuki ê iáⁿ-siōng kah chu-liāu liáu-āu, tû-liáu chi̍t-kóa hoat-hiān í-gōa, koh chai-iáⁿ kóng Kim-chheⁿ ū chhin-chhiūⁿ Tē-kiû ko-sok-khì-liû kāng-khoán ê chhek-tō khì-liû.

[KIP] Akatsuki hō Thài-khong-tsûn hip--ê Kim-tshenn ê Tsí-guā-kng iánn-siōng

Sī-án-tsuánn Kim-tshenn kah tē-kiû tsiah-nī bô-kâng? Uī-tio̍h beh tshuē-tshut tsit-ê tap-àn, Ji̍t-pún tsìn-tsîng huat-siā ê ki-khì-lâng thài-khong-tsûn Akatsuki hō tī 2015 nî-té pue ji̍p-khì Kim-tshenn kuí-tō. I tsìn-tsîng ū 5 nî ê sî-kan sī bô tsiàu kè-uē tī Luē Thài-iông-hē lāi-té luā-luā-sô. Tō-sǹg Akatsuki ê sìnn-miā tn̂g-tōo í-king tshiau-kuè pún-té ê kè-uē, m̄-koh in-uī thài-khong-tsûn kah gî-khì lóng ūn-tsok kah hó-sè-hó-sè, sóo-í tuā-pōo-hūn ê jīm-bū tsóng-sǹg sī ū kè-sio̍k uân-sîng. Akatsuki ê gî-khì mā kiò-tsò Kim-tshenn Khì-hāu Kuí-tō-uī-tshenn, sī leh tiâu-tsa lán ê tsí-muē-á kîann-tshinn Kim-tshenn tíng-kuân tsi̍t-kuá lán iáu bô liáu-kái ê tāi-tsì, pau-kuat hué-suann sī-m̄-sī iáu ua̍h-thiàu-thiàu, tsa̍t-ba̍t ê tāi-khì lāi-té sī-m̄-sī ē sán-sing sih-nah, hong-sok sī-án-tsuánn ē tshiau-kuè Hué-tshenn tsū-tsuán ê sok-tōo hiah-nī tsē. Tsit-tiunn iánn-siōng sī Akatsuki ê UVI kha-mé-lah hip--ê. Lán khuànn-ē-tio̍h ji̍t-sî hit-pîng ê Kim-tshenn ū kîann-tshinn tshioh-tōo ê V-hîng hûn. Iánn-siōng lāi-té ū sann-khuán bô-kâng-sik ê tsí-guā-kng, koh-ū tshián-nâ-sik ê jī-sng-huà-liû, i ê liōng sī ū piàn khah tsió. Hun-sik Akatsuki ê iánn-siōng kah tsu-liāu liáu-āu, tû-liáu tsi̍t-kuá huat-hiān í-guā, koh tsai-iánn kóng Kim-tshenn ū tshin-tshiūnn Tē-kiû ko-sok-khì-liû kāng-khuán ê tshik-tō khì-liû.

[English] Venus in Ultraviolet from Akatsuki

Why is Venus so different from Earth? To help find out, Japan launched the robotic Akatsuki spacecraft which entered orbit around Venus late in 2015 after an unplanned five-year adventure around the inner Solar System. Even though Akatsuki was past its original planned lifetime, the spacecraft and instruments were operating so well that much of its original mission was reinstated. Also known as the Venus Climate Orbiter, Akatsuki's instruments investigated unknowns about Earth's sister planet, including whether volcanoes are still active, whether lightning occurs in the dense atmosphere, and why wind speeds greatly exceed the planet's rotation speed. In the featured image taken by Akatsuki's UVI camera, the day-side of Venus is seen shown with planet-scale V-shaped cloud pattern. The image displays three ultraviolet colors and indicates a dip in the relative abundance of sulfur dioxide shown in faint blue. Analyses of Akatsuki images and data has shown, among other discoveries, that Venus has equatorial jet similar to Earth's jet stream.

詞彙學習