天龍座 ê 三个星系

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Three Galaxies in Draco
• 影像來源 kah 版權：David Vernet , Jean-François Bax , Serge Brunier, C2PU
• 台文翻譯：An-Li Tsai (NCU)

[漢羅] 天龍座 ê 三个星系

這个媠甲會觸舌 ê 三重星系有當時仔嘛叫做天龍星群，就 chhāi tī 北天 ê 天龍座 遐。 Ùi 倒爿到正爿是：正向 捲螺仔星系 NGC 5985，長株圓 星系 NGC 5982，kah 側向 捲螺仔星系 NGC 5981。 In 攏 tī 仝一个望遠鏡視野內底，in tī 天頂佔 ê 範圍是比一粒月娘 tī 天頂佔 ê 閣較大淡薄仔。 雖罔講這陣星系傷細矣，無法度叫做 星系團，而且嘛無去予 編入去 實密 ê 星系群內底，毋過這寡星系攏 tī 離咱地球 1 億光年遠 ê 所在。 咱若是用 光譜儀 斟酌 kā 檢查，就會看著這个引人注目 ê 正向捲螺仔星系 NGC 5985 ê 中心，有光爍爍 ê 星系核。 這个核心 tī 特別波段有 足強 ê 發射線，驅動天文學家 kā 伊分類做 Seyfert 星系，這是一款活跳星系。 雖罔講這陣星系無其他較實密 ê 星系群 遐爾出名，毋過 in 視覺上看起來猶是一組三隻，成做三重奏，所以對天文攝影師來講 in 就是足讚 ê 目標。 Tī 這張 予人印象足深 ê 深度感光相片 內底，長株圓星系 NGC 5982 ê 四箍圍仔有暗淡 ê 星系暈 kah 清楚 ê 星系殼，這是過去星系合併 ê 證據。 相片內底閣有足濟閣較 遙遠 ê 背景星系。

[POJ] Thian-liông-chō ê saⁿ ê seng-hē

Chit-ê súi kah ē tak-chi̍h ê saⁿ-têng seng-hē ū-tang-sî-á mā kiò-chò Thian-liông-seng-kûn, to̍h chhāi tī pak-thian ê Thian-liông-chō hiah. Ùi tò-pêng kàu chiàⁿ-pêng sī: chiàⁿ-hiòng kńg-lê-á seng-hē NGC 5985, tn̂g-tu-îⁿ seng-hē NGC 5982, kah chhek-hiòng kńg-lê-á seng-hē NGC 5981. In lóng tī kāng chi̍t-ê bōng-oán-kiàⁿ sī-iá lāi-té, in tī thiⁿ-téng chiàm ê hoān-ûi sī pí chi̍t-lia̍p goe̍h-niû tī thiⁿ-téng chiàm ê koh-khah tōa tām-po̍h-á. Sui-bóng kóng chit-tīn seng-hē siuⁿ sè ah, bô-hoat-tō͘ kiò-chò seng-hē-thoân, jî-chhiáⁿ mā bô khì hō͘ pian ji̍p-khì cha̍t-ba̍t ê seng-hē-kûn lāi-té, m̄-koh chit-kóa seng-hē lóng tī lī lán Tē-kiû 1 ek kng-nî hn̄g ê só͘-chāi. Lán nā-sī iōng kng-phó͘-gî chim-chiok kā kiám-cha, to̍h ē khòaⁿ-tio̍h chit-ê ín-lâng-chù-bo̍k ê chiàⁿ-hiòng kńg-lê-á seng-hē NGC 5985 ê tiong-sim, ū kng-sih-sih ê seng-hē-he̍k. Chit-ê he̍k-sim tī te̍k-pia̍t pho-tōaⁿ ū chiok kiông ê hoat-siā-sòaⁿ, khu-tōng thian-bûn ha̍k-ka kā i hun-lūi chò Seyfert seng-hē, che sī chi̍t-khoán oa̍h-thiàu-seng-hē. Sui-bóng kóng chit-tīn seng-hē bô kî-thaⁿ khah cha̍t-ba̍t ê seng-hē-kûn hiah-nī chhut-miâ, m̄-koh in sī-kak siōng khòaⁿ–khí-lâi iáu-sī chi̍t-cho͘ saⁿ chiah, chiâⁿ-chò saⁿ-têng-chàu, só͘-í tùi thian-bûn liap-iáⁿ-su lâi-kóng in to̍h sī chiok chán ê bo̍k-piau. Tī chit-tiuⁿ hō͘ lâng ìn-siōng chiok chhim ê chhim-tō͘ kám-kng siòng-phìⁿ lāi-té, tn̂g-tu-îⁿ seng-hē NGC 5982 ê sì-kho͘-ûi-á ū àm-tām ê seng-hē-n̄g kah chheng-chhó ê seng-hē-khak, che sī kòe-khì seng-hē ha̍p-pèng ê chèng-kù. Siòng-phìⁿ lāi-té koh ū chiok chē koh-khah iâu-oán ê pōe-kéng seng-hē.

[KIP] Thian-liông-tsō ê sann ê sing-hē

Tsit-ê suí kah ē tak-tsi̍h ê sann-tîng sing-hē ū-tang-sî-á mā kiò-tsò Thian-liông-sing-kûn, to̍h tshāi tī pak-thian ê Thian-liông-tsō hiah. Uì tò-pîng kàu tsiànn-pîng sī: tsiànn-hiòng kńg-lê-á sing-hē NGC 5985, tn̂g-tu-înn sing-hē NGC 5982, kah tshik-hiòng kńg-lê-á sing-hē NGC 5981. In lóng tī kāng tsi̍t-ê bōng-uán-kiànn sī-iá lāi-té, in tī thinn-tíng tsiàm ê huān-uî sī pí tsi̍t-lia̍p gue̍h-niû tī thinn-tíng tsiàm ê koh-khah tuā tām-po̍h-á. Sui-bóng kóng tsit-tīn sing-hē siunn sè ah, bô-huat-tōo kiò-tsò sing-hē-thuân, jî-tshiánn mā bô khì hōo pian ji̍p-khì tsa̍t-ba̍t ê sing-hē-kûn lāi-té, m̄-koh tsit-kuá sing-hē lóng tī lī lán Tē-kiû 1 ik kng-nî hn̄g ê sóo-tsāi. Lán nā-sī iōng kng-phóo-gî tsim-tsiok kā kiám-tsa, to̍h ē khuànn-tio̍h tsit-ê ín-lâng-tsù-bo̍k ê tsiànn-hiòng kńg-lê-á sing-hē NGC 5985 ê tiong-sim, ū kng-sih-sih ê sing-hē-hi̍k. Tsit-ê hi̍k-sim tī ti̍k-pia̍t pho-tuānn ū tsiok kiông ê huat-siā-suànn, khu-tōng thian-bûn ha̍k-ka kā i hun-luī tsò Seyfert sing-hē, tse sī tsi̍t-khuán ua̍h-thiàu-sing-hē. Sui-bóng kóng tsit-tīn sing-hē bô kî-thann khah tsa̍t-ba̍t ê sing-hē-kûn hiah-nī tshut-miâ, m̄-koh in sī-kak siōng khuànn–khí-lâi iáu-sī tsi̍t-tsoo sann tsiah, tsiânn-tsò sann-tîng-tsàu, sóo-í tuì thian-bûn liap-iánn-su lâi-kóng in to̍h sī tsiok tsán ê bo̍k-piau. Tī tsit-tiunn hōo lâng ìn-siōng tsiok tshim ê tshim-tōo kám-kng siòng-phìnn lāi-té, tn̂g-tu-înn sing-hē NGC 5982 ê sì-khoo-uî-á ū àm-tām ê sing-hē-n̄g kah tshing-tshó ê sing-hē-khak, tse sī kuè-khì sing-hē ha̍p-pìng ê tsìng-kù. Siòng-phìnn lāi-té koh ū tsiok tsē koh-khah iâu-uán ê puē-kíng sing-hē.

[English] Three Galaxies in Draco

This tantalizing trio of galaxies is sometimes called the Draco Group, located in the northern constellation of (you guessed it) Draco, the Dragon. From left to right are face-on spiral NGC 5985 – elliptical galaxy NGC 5982, and edge-on spiral NGC 5981, all within a single telescopic field of view that spans a little more than the width of the full moon. While the group is far too small to be a galaxy cluster and has not been catalogued as a compact galaxy group, these galaxies all do lie roughly 100 million light-years from planet Earth. On close examination with spectrographs, the bright core of the striking face-on spiral NGC 5985 shows prominent emission in specific wavelengths of light, prompting astronomers to classify it as a Seyfert, a type of active galaxy. Not as well known as other tight groupings of galaxies, the contrast in visual appearance still makes this triplet an attractive subject for astrophotographers. This impressively deep exposure hints at a faint dim halo along with sharp-edged shells surrounding elliptical NGC 5982, evidence of past galactic mergers. It also reveals many even more distant background galaxies.

詞彙學習（漢羅/POJ/KIP/華語/English）

• 【三重星系】saⁿ-têng-seng-hē/sann-tîng-sing-hēhong-hiòng ê kî-thann thôo-hún hûn kah huat-kng ê sing-hûn. /三重星系/trio of galaxies
• 【天龍星群】Thian-liông-seng-kûn/Thian-liông-sing-kûn/天龍星群/the Draco Group
• 【天龍座】Thian-liông-chō/Thian-liông-tsō/天龍座/the Drago
• 【正向星系】chiàⁿ-hiòng-seng-hē/tsiànn-hiòng-sing-hē/正向星系/face-on galaxy
• 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
• 【NGC 5985】NGC ngó͘-kiú-pat-ngó͘/NGC ngóo-kiú-pat-ngóo/NGC 5985/NGC 5985
• 【長株圓星系】tn̂g-tu-îⁿ seng-hē/tn̂g-tu-înn sing-hē/橢圓星系/elliptical galaxy
• 【NGC 5982】NGC ngó͘-kiú-pat-jī/NGC ngóo-kiú-pat-jī/NGC 5982/NGC 5982
• 【側向星系】chhek-hiòng-seng-hē/tshik-hiòng-sing-hē/側向星系/edge-on galaxy
• 【NGC 5981】NGC ngó͘-kiú-pat-it/NGC ngóo-kiú-pat-it/NGC 5981/NGC 5981
• 【星系群】seng-hē-kûn/sing-hē-kûn/星系群/galaxy group
• 【光譜儀】kng-phó͘-gî/kng-phóo-gî/光譜儀/spectrographs
• 【發射線】hoat-siā-sòaⁿ/huat-siā-suànn/發射線/emission
• 【星系團】seng-hē-thoân/sing-hē-thuân/星系團/galaxy cluster
• 【Seyfert 星系】Seyfert seng-hē/Seyfert sing-hē/西佛星系/Seyfert galaxy
• 【活跳星系】oa̍h-thiàu-seng-hē/ua̍h-thiàu-sing-hē/活躍星系/active galaxy
• 【星系核】seng-hē-he̍k/sing-hē-hi̍k/星系核/galactic core
• 【星系暈】seng-hē-n̄g/sing-hē-n̄g/星系暈/galactic halo
• 【星系殼】seng-hē-khak/sing-hē-khak/星系殼/galactic shell
• 【星系合併】seng-hē ha̍p-pèng/sing-hē ha̍p-pìng/星系合併/galactic mergers