木星 ê 爍爁

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Lightning on Jupiter
• 影像來源：NASA/JPL-Caltech/SwRI/MSSS; 資料處理 kah 許可: Kevin M. Gill
• 台文翻譯：An-Li Tsai (NCU)

[漢羅] 木星 ê 爍爁

敢干焦地球有爍爁？ 毋但喔！ 咱太陽系內底 ê 太空船捌量著其他行星 ê 爍爁，包括 火星、木星、kah 土星。 嘛捌 tī 金星、天王星、kah 海王星 頂懸量著可能是爍爁 ê 物件。 爍爁是紮電粒子 忽然間 ùi 一位 走去另外一位 ê 現象。 Tī 地球，相挵 ê 冰 kah 水滴定定會造成 產生爍爁 ê 電分開。 毋過 tī 木星 ê 情形是啥款？ Ùi NASA 踅木星 ê Juno 太空船 提著 ê 影像 kah 資料，有支持 科學家進前 ê 想法。 木星 ê 爍爁 嘛是 tī 有水 kah 冰 ê 雲內底生出來–ê。 這張 Juno 翕–ê 相片 有翕著可見光 ê 爍光，這是 tī 木星北極 附近 ê 大型雲旋內底翕著–ê。 紲落來幾若個月，Juno 太空船會 tī 木星暗暝彼爿進行幾若擺 ê 近距離掃描，按呢就會當予 機器人探測器 去提閣較濟 木星爍爁 ê 資料 kah 影像。

[POJ] Bo̍k-chheⁿ ê Sih-nah

Kám kan-na Tē-kiû ū sih-nah? M̄-nā o͘h! Lán Thài-iông-hē lāi-té ê thài-khong-chûn bat niû-tio̍h kî-tha kiâⁿ-chheⁿ ê sih-nah, pau-koat hóe-chheⁿ, Bo̍k-chheⁿ, kah Thó͘-chheⁿ. Mā bat tī Kim-chheⁿ, Thian-ông-chheⁿ, kah Hái-ông-chheⁿ téng-koân niû-tio̍h khó-lêng sī sih-nah ê mi̍h-kiāⁿ. Sih-nah sī chah-tiān lia̍p-chú hut-jiân-kan ùi chi̍t-ūi cháu-khì lēng-gōa chi̍t-ūi ê hiān-siōng. Tī Tē-kiû, sio-lòng ê peng kah chúi-tih tiāⁿ-tiāⁿ ē chō-sêng sán-seng sih-nah ê tiān pun–khui. M̄-koh tī Bo̍k-chheⁿ ê chêng-hêng sī siáⁿ-khoán? Ùi NASA se̍h Bo̍k-chheⁿ ê Juno thài-khong-chûn the̍h-tio̍h ê iáⁿ-siōng kah chu-liāu, ū chi-chhî kho-ha̍k-ka chìn-chêng ê siūⁿ-hoat. Bo̍k-chheⁿ ê sih-nah mā-sī tī ū chúi kah peng ê hûn lāi-té seⁿ–chhut-lâi–ê. Chit-tiuⁿ Juno hip–ê siòng-phìⁿ ū hip-tio̍h khó-kiàn-kng ê sih-kng, che sī tī Bo̍k-chheⁿ pak-ke̍k hù-kīn ê tōa-hêng hûn-chn̄g lāi-té hip–tio̍h–ê. Sòa-lo̍h-lâi kúi-nā kò goe̍h, Juno thài-khong-chûn ē tī Bo̍k-chheⁿ àm-mî hit-pêng chìn-hêng kúi-nā pái ê kīn kū-lī sàu-biâu, án-ne tō ē-tàng hō͘ ke-khì-lâng thàm-chhek-khì khì the̍h koh khah chē Bo̍k-chheⁿ sih-nah ê chu-liāu kah iáⁿ-siōng.

[KIP] Bo̍k-tshenn ê Sih-nah

Kám kan-na Tē-kiû ū sih-nah? M̄-nā ooh! Lán Thài-iông-hē lāi-té ê thài-khong-tsûn bat niû-tio̍h kî-tha kiânn-tshenn ê sih-nah, pau-kuat hué-tshenn, Bo̍k-tshenn, kah Thóo-tshenn. Mā bat tī Kim-tshenn, Thian-ông-tshenn, kah Hái-ông-tshenn tíng-kuân niû-tio̍h khó-lîng sī sih-nah ê mi̍h-kiānn. Sih-nah sī tsah-tiān lia̍p-tsú hut-jiân-kan uì tsi̍t-uī tsáu-khì līng-guā tsi̍t-uī ê hiān-siōng. Tī Tē-kiû, sio-lòng ê ping kah tsuí-tih tiānn-tiānn ē tsō-sîng sán-sing sih-nah ê tiān pun–khui. M̄-koh tī Bo̍k-tshenn ê tsîng-hîng sī siánn-khuán? Uì NASA se̍h Bo̍k-tshenn ê Juno thài-khong-tsûn the̍h-tio̍h ê iánn-siōng kah tsu-liāu, ū tsi-tshî kho-ha̍k-ka tsìn-tsîng ê siūnn-huat. Bo̍k-tshenn ê sih-nah mā-sī tī ū tsuí kah ping ê hûn lāi-té senn–tshut-lâi–ê. Tsit-tiunn Juno hip–ê siòng-phìnn ū hip-tio̍h khó-kiàn-kng ê sih-kng, tse sī tī Bo̍k-tshenn pak-ki̍k hù-kīn ê tuā-hîng hûn-tsn̄g lāi-té hip–tio̍h–ê. Suà-lo̍h-lâi kuí-nā kò gue̍h, Juno thài-khong-tsûn ē tī Bo̍k-tshenn àm-mî hit-pîng tsìn-hîng kuí-nā pái ê kīn kū-lī sàu-biâu, án-ne tō ē-tàng hōo ke-khì-lâng thàm-tshik-khì khì the̍h koh khah tsē Bo̍k-tshenn sih-nah ê tsu-liāu kah iánn-siōng.

[English] Lightning on Jupiter

Does lightning occur only on Earth? No. Spacecraft in our Solar System have detected lightning on other planets, including Mars, Jupiter and Saturn, and lightning is likely on Venus, Uranus, and Neptune. Lightning is a sudden rush of electrically charged particles from one location to another. On Earth, drafts of colliding ice and water droplets usually create lightning-generating charge separation, but what happens on Jupiter? Images and data from NASA’s Jupiter-orbiting Juno spacecraft bolster previous speculation that Jovian lightning is also created in clouds containing water and ice. In the featured Juno photograph, an optical flash was captured in a large cloud vortex near Jupiter’s north pole. During the next few months, Juno will perform several close sweeps over Jupiter’s night side, likely allowing the robotic probe to capture more data and images of Jovian lightning.

詞彙學習（漢羅/POJ/KIP/華語/English）

• 【爍爁】sih-nah/sih-nah/閃電/lightning
• 【木星】Bo̍k-chheⁿ/Bo̍k-tshenn/木星/Jupiter
• 【火星】Hóe-chheⁿ/Hué-tshenn/火星/Mars
• 【土星】Thó͘-chheⁿ/Thóo-tshenn/土星/Saturn
• 【金星】Kim-chheⁿ/Kim-tshenn/金星/Venus
• 【天王星】Thian-ông-chheⁿ/Thian-ông-tshenn/天王星/Uranus
• 【海王星】Hái-ông-chheⁿ/Hái-ông-tshenn/海王星/Neptune
• 【Juno 太空船】Juno thài-khong-chûn/Juno thài-khong-tsûn/朱諾號太空船/Juno spacecraft
• 【紮電粒子】chah-tiān lia̍p-chú/tsah-tiān lia̍p-tsú/帶電粒子/electrically charged particles
• 【爍光】sih-kng/sih-kng/閃光/flash
• 【北極】pak-ke̍k/pak-ki̍k/北極/north pole
• 【雲旋】hûn-chn̄g/hûn-tsn̄g/雲渦/cloud vortex