獨創號直升機 ê 3D 相片

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：3D Ingenuity
• 影像來源：NASA, JPL-Caltech, MSSS, ASU
• 台文翻譯：An-Li Tsai (NCU)

[漢羅] 獨創號直升機 ê 3D 相片

Tī 毅力號探測車 頂懸，有一台會當翕多彩立體影像 ê 相機 Mastcam-Z。 伊 tī 火星任務 火星日第 45 工（就是地球時間 ê 2021 年 4 月 5 號）ê 時陣，翕著 火星獨創號直升機 ê 3D 特寫相片。 你會使 kā 你 ê 3D 目鏡提來看覓 leh。 獨創號 ê 烏影投影 tī 火星表面，伊 ê 4 支跤就停 tī 探測車 ê 車輪痕跡邊仔。 實驗直升機 ê 太陽能枋就 tī 獨創號 彼 2 个 1.2 公尺長、倒剾踅 ê 車葉仔 頂懸。 伊這馬當 leh kā 電池充電，按呢就會當 tī 遮爾寒 ê 火星暗暝 保持溫暖，閣會使提供動力予直升機飛。 Ùi 火星日 第 13 工開始，抑是地球時間 4 月 19 以後，獨創號 就變做頭一个 人類 tī 地球以外行星控制 ê 飛行器。 伊到今已經 tī 火星薄縭絲 ê 大氣層內底，完成 50 改以上 ê 飛行矣。

[POJ] To̍k-chhòng-hō ti̍t-seng-ki ê 3D siòng-phìⁿ

Tī Gē-le̍k-hō thàm-chhek-chhia téng-koân, ū chi̍t-tâi ē-tàng hip to-chhái li̍p-thé iáⁿ-siōng ê siòng-ki Mastcam-Z. I tī Hóe-chheⁿ jīm-bū Hóe-chheⁿ-ji̍t tē 45 kang (tio̍h-sī Tē-kiû sî-kan 2021 nî 4 goe̍h 5 hō) ê sî-chūn, hip-tio̍h Hóe-chheⁿ To̍k-chhòng-hō ti̍t-seng-ki ê 3D te̍k-siá siòng-phìⁿ. Lí ē-sái kā lí ê 3D ba̍k-kiàⁿ the̍h-lâi khòaⁿ-māi leh. To̍k-chhòng-hō ê o͘-iáⁿ tâu-iáⁿ tī Hóe-chheⁿ piáu-bīn, i ê 4 ki kha tō thêng tī thàm-chhek-chhia ê chhia-lián-hûn piⁿ-á. Si̍t-giām ti̍t-seng-ki ê thài-iông-lêng-pang tō tī To̍k-chhòng-hō hit 2 ê 1.2 kong-chhioh tn̂g, tò-khau-se̍h ê chhia-hio̍h-á téng-koân. I chit-má tng leh kā tiān-tî chhiong-tiān, án-ne tō ē-tàng tī chiah-nī kôaⁿ ê Hóe-chheⁿ àm-mî pó-chhî un-loán, koh ē-sái thê-kiong tōng-le̍k hō͘ ti̍t-seng-ki poe. Ùi Hóe-chheⁿ-ji̍t tē 13 kang khai-sí, a̍h-sī Tē-kiû sî-kan 4 goe̍h 19 í-āu, To̍k-chhòng-hō tō piàn-chò jîn-lūi tī Tē-kiû í-gōa kiâⁿ-chhiⁿ thâu-chi̍t-ê khòng-chè ê hui-hêng-khì. I kàu-taⁿ í-keng tī Hóe-chheⁿ po̍h-li-si ê tāi-khì-chân lāi-té, oân-sêng 50 kái í-siōng ê hui-hêng ah.

[KIP] To̍k-tshòng-hō ti̍t-sing-ki ê 3D siòng-phìnn

Tī Gē-li̍k-hō thàm-tshik-tshia tíng-kuân, ū tsi̍t-tâi ē-tàng hip to-tshái li̍p-thé iánn-siōng ê siòng-ki Mastcam-Z. I tī Hué-tshenn jīm-bū Hué-tshenn-ji̍t tē 45 kang (tio̍h-sī Tē-kiû sî-kan 2021 nî 4 gue̍h 5 hō) ê sî-tsūn, hip-tio̍h Hué-tshenn To̍k-tshòng-hō ti̍t-sing-ki ê 3D ti̍k-siá siòng-phìnn. Lí ē-sái kā lí ê 3D ba̍k-kiànn the̍h-lâi khuànn-māi leh. To̍k-tshòng-hō ê oo-iánn tâu-iánn tī Hué-tshenn piáu-bīn, i ê 4 ki kha tō thîng tī thàm-tshik-tshia ê tshia-lián-hûn pinn-á. Si̍t-giām ti̍t-sing-ki ê thài-iông-lîng-pang tō tī To̍k-tshòng-hō hit 2 ê 1.2 kong-tshioh tn̂g, tò-khau-se̍h ê tshia-hio̍h-á tíng-kuân. I tsit-má tng leh kā tiān-tî tshiong-tiān, án-ne tō ē-tàng tī tsiah-nī kuânn ê Hué-tshenn àm-mî pó-tshî un-luán, koh ē-sái thê-kiong tōng-li̍k hōo ti̍t-sing-ki pue. Uì Hué-tshenn-ji̍t tē 13 kang khai-sí, a̍h-sī Tē-kiû sî-kan 4 gue̍h 19 í-āu, To̍k-tshòng-hō tō piàn-tsò jîn-luī tī Tē-kiû í-guā kîann-tshinn thâu-tsi̍t-ê khòng-tsè ê hui-hîng-khì. I kàu-tann í-king tī Hué-tshenn po̍h-li-si ê tāi-khì-tsân lāi-té, uân-sîng 50 kái í-siōng ê hui-hîng ah.

[English] 3D Ingenuity

The multicolor, stereo imaging Mastcam-Z on the Perseverance rover zoomed in to capture this 3D close-up (get out your red/blue glasses) of the Mars Ingenuity helicopter on mission sol 45. That’s Earth-date 2021 April 5. Casting a shadow on the Martian surface, Ingenuity is standing alone on its four landing legs next to the rover’s wheel tracks. The experimental helicopter’s solar panel, charging batteries that keep it warm through the cold Martian nights and power its flight, sits just above Ingenuity’s two 1.2 meter (4 foot) long counter-rotating blades. Thirteen sols later, on April 19, Ingenuity became the first aircraft to perform powered, controlled flight on another planet. It has since gone on to complete more than 50 flights through the thin atmosphere of Mars.

詞彙學習（漢羅/POJ/KIP/華語/English）

• 【獨創號】To̍k-chhòng-hō/To̍k-tshòng-hō/獨創號/Ingenuity
• 【直升機】ti̍t-seng-ki/ti̍t-sing-ki/直升機/helicopter
• 【毅力號】Gē-le̍k-hō/Gē-li̍k-hō/毅力號/Perseverance
• 【探測車】thàm-chhek-chhia/thàm-tshik-tshia/探測車/rover
• 【3D 目鏡】3D ba̍k-kiàⁿ/3D ba̍k-kiànn/3D 眼鏡/red-blue glasses
• 【立體影像】li̍p-thé iáⁿ-siōng/li̍p-thé iánn-siōng/立體影像/stereo imaging
• 【火星任務】Hóe-chheⁿ jīm-bū/Hué-tshenn jīm-bū/火星任務/Mars mission
• 【太陽能枋】thài-iông-lêng-pang/thài-iông-lîng-pang/太陽能板/solar panel
• 【倒剾踅】tò-khau-se̍h/tò-khau-se̍h/逆時針/counter-rotating
• 【車葉仔】chhiah-hio̍h-á/tshiah-hio̍h-á/葉片/blades
• 【大氣層】tāi-khì-chân/tāi-khì-tsân/大氣層/atmosphere
• 【飛行器】hui-hêng-khì/hui-hîng-khì/飛行器/aircraft
• 【火星日】hóe-chhiⁿ-ji̍t/hué-tshinn-ji̍t/火星日/Sol