孔雀座內底 ê 大型星系

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Giant Galaxies in Pavo
• 影像來源 kah 版權：Mike Selby, Observatorio El Sauce
• 台文翻譯：An-Li Tsai (NCU)

[漢羅] 孔雀座內底 ê 大型星系

正爿頂懸 ê NGC 6872 直徑超過 50 萬光年，是一个 足大 ê 棍螺仔星系，上無嘛有咱銀河系 ê 五倍以上。 這个 大型星系 去予扭曲 kah 搝長 ê 捲螺仔手骨，予伊看起來敢若是大隻鳥仔 美麗 ê 翼股。 是講伊有一个較有名 ê 外號，叫做臭頭鳥星系。 伊就 tī 南天星座 孔雀座方向 2 億光年遠 ê 所在。 這个變形 ê 捲螺仔手骨 頂懸有足濟 恆星形成區，會變形是因為 NGC 6872 kah 附近較細 ê 星系 IC 4970 產生重力交互作用造成–ê，就是大型星系核 頂懸彼个。 孔雀星系群 內底上主要 ê 成員，大型長株圓星系 NGC 6876，就 tī leh 飛 ê 臭頭鳥星系倒爿下跤遐。

[POJ] Khóng-chhiok-chō lāi-té ê tōa-hêng seng-hē

Chiàⁿ-pêng téng-koân ê NGC 6872 ti̍t-kèng chhiau-kòe 50 bān kng-nî, sī chi̍t-ê chiok tōa ê kùn-lê-á seng-hē, siōng-bô mā ū lán gîn-hô-hē ê gō͘ pōe í-siōng. Chit-ê tōa-hêng seng-hē khì hō͘ niú-khiok kah khiú-tn̂g ê kńg-lê-á chhiú-kut, hō͘ i khòaⁿ–khí-lâi ká-ná sī tōa-chiah chiáu-á bí-lē ê si̍t-kó͘. Sī-kóng i ū chi̍t-ê khah ū-miâ ê gōa-hō, kiò-chò Chhàu-thâu-chiáu seng-hē. I tō tī lâm-thian seng-chō Khóng-chhiok-chō hong-hiòng 2 ek kng-nî hn̄g ê só͘-chāi. Chit-ê piàn-hêng ê kńg-lê-á chhiú-kut téng-koân ū chiok chē hêng-chhiⁿ hêng-sêng-khu, ē piàn-hêng sī in-ūi NGC 6872 kah hù-kīn khah sè ê seng-hē IC 4970 sán-seng tiōng-le̍k kau-hō͘ chok-iōng chō-sêng–ê, to̍h sī tōa-hêng seng-hēhi̍k téng-koân hit-ê. khóng-chhiok seng-hē-kûn lāi-té siōng chú-iàu ê sêng-goân, tōa-hêng tn̂g-tu-îⁿ seng-hē NGC 6876, to̍h tī leh poe ê Chhàu-thâu-chiáu seng-hē tò-pêng ē-kha hiah.

[KIP] Khóng-tshiok-tsō lāi-té ê tuā-hîng sing-hē

Tsiànn-pîng tíng-kuân ê NGC 6872 ti̍t-kìng tshiau-kuè 50 bān kng-nî, sī tsi̍t-ê tsiok tuā ê kùn-lê-á sing-hē, siōng-bô mā ū lán gîn-hô-hē ê gōo puē í-siōng. Tsit-ê tuā-hîng sing-hē khì hōo niú-khiok kah khiú-tn̂g ê kńg-lê-á tshiú-kut, hōo i khuànn–khí-lâi ká-ná sī tuā-tsiah tsiáu-á bí-lē ê si̍t-kóo. Sī-kóng i ū tsi̍t-ê khah ū-miâ ê guā-hō, kiò-tsò Tshàu-thâu-tsiáu sing-hē. I tō tī lâm-thian sing-tsō Khóng-tshiok-tsō hong-hiòng 2 ik kng-nî hn̄g ê sóo-tsāi. Tsit-ê piàn-hîng ê kńg-lê-á tshiú-kut tíng-kuân ū tsiok tsē hîng-tshinn hîng-sîng-khu, ē piàn-hîng sī in-uī NGC 6872 kah hù-kīn khah sè ê sing-hē IC 4970 sán-sing tiōng-li̍k kau-hōo tsok-iōng tsō-sîng–ê, to̍h sī tuā-hîng sing-hēhi̍k tíng-kuân hit-ê. khóng-tshiok sing-hē-kûn lāi-té siōng tsú-iàu ê sîng-guân, tuā-hîng tn̂g-tu-înn sing-hē NGC 6876, to̍h tī leh pue ê Tshàu-thâu-tsiáu sing-hē tò-pîng ē-kha hiah.

[English] Giant Galaxies in Pavo

Over 500,000 light years across, NGC 6872 (top right) is a truly enormous barred spiral galaxy, at least 5 times the size of our own very large Milky Way. The appearance of this giant galaxy’s distorted and stretched out spiral arms suggests the magnificent wings of a giant bird. Of course its popular moniker is the Condor galaxy. It lies about 200 million light-years distant toward the southern constellation Pavo, the Peacock. Lined with star-forming regions, the distorted spiral arms are due to NGC 6872’s gravitational interaction with the nearby smaller galaxy IC 4970, seen just above the giant galaxy’s core. The Pavo galaxy group’s dominant giant elliptical galaxy, NGC 6876 is below and left of the soaring Condor galaxy.

詞彙學習（漢羅/POJ/KIP/華語/English）

• 【孔雀座】Khóng-chhiok-chō/Khóng-tshiok-tsō/孔雀座/the constellation Pavo
• 【臭頭鳥星系】Chhàu-thâu-chiáu seng-hē/Tshàu-thâu-tsiáu sing-hē/禿鷹星系/the Condor galaxy
• 【棍螺仔星系】kún-lê-á seng-hē/kún-lê-á sing-hē/棒旋星系/barred spiral galaxy
• 【捲螺仔手骨】kńg-lê-á chhiú-kut/kńg-lê-á tshiú-kut/旋臂/spiral arm
• 【恆星形成區】hêng-chheⁿ hêng-sêng-khu/hîng-tshenn hîng-sîng-khu/恆星形成區/star-forming region
• 【重力交互作用】tiōng-le̍k kau-hō͘ chok-iōng/tiōng-li̍k kau-hōo tsok-iōng/重力交互作用/gravitational interaction
• 【星系核】seng-hē-he̍k/sing-hē-hi̍k/星系核/galaxy’s core
• 【孔雀星系群】Khóng-chhiok seng-hē-kûn/Khóng-tshiok sing-hē-kûn/孔雀星系群/Pavo galaxy group
• 【長株圓星系】tn̂g-tu-îⁿ seng-hē/tn̂g-tu-înn sing-hē/橢圓星系/elliptical galaxy
• 【NGC 6876】NGC lio̍k-pat-chhit-lio̍k/NGC lio̍k-pat-tshit-lio̍k/NGC 6876/NGC 6876
• 【IC 4970】 IC sù-kiú-chhit-khòng/IC sù-kiú-tshit-khòng/IC 4970/IC 4970
• 【NGC 6872】NGC lio̍k-pat-chhit-jī/NGC lio̍k-pat-tshit-jī/NGC 6872/NGC 6872