三條日頭路線

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Three Sun Paths
• 影像來源 kah 版權：Marcella Giulia Pace & Giuseppe De Donà
• 台文翻譯：An-Li Tsai (NCU)

[漢羅] 三條日頭路線

日頭逐工 tī 天頂 leh 行 ê 路線敢會相 siâng？ 袂呢！ 一冬內，日頭 tī 天頂行 ê 路線逐工攏會無仝，而且熱天行 ê 路線比寒天行 ê 路線閣較長。 相片內底 ê 日頭路線 是 ùi 中晝翕到日落。 3 條線是 3 工 ê 路線，ùi 上頂懸到上下底是：夏至、春秋分、冬至。 這張相片 是 2020 年 到 2021 年 tī 意大利 Sicily 島 ê Gatto Corvino 庄附近翕–ê。 日頭 tī 天頂 ê 路線 kah 出現 ê 長短，是 決定地球季節 上重要 ê 原因。 太陽 kah 地球有偌近，就較無遐爾重要。 實際上，地球是 tī 一月份 ê 時陣 kah 太陽上倚，彼陣是北半球 ê 寒天。 今仔日是 夏至，所以 今仔日 ê 日頭 tī 天頂 ê 路線，tùi 蹛 tī 地球 北半球 ê 人來講，是今年上長–ê。 毋過 tùi 南半球 ê 人來講，是今年上短–ê。

[POJ] Saⁿ-tiâu Ji̍t-thâu lō͘-sòaⁿ

Ji̍t-thâu ta̍k-kang tī thiⁿ-téng leh kiâⁿ ê lō͘-sòaⁿ kám-ē sio-siâng? Bē neh! Chi̍t-tang lāi, ji̍t-thâu tī thiⁿ-téng kiâⁿ ê lō͘-sòaⁿ ta̍k-kang lóng ē bô-kâng, jî-chhiáⁿ joa̍h-thiⁿ kiâⁿ ê lō͘-sòaⁿ pí kôaⁿ-thiⁿ kiâⁿ ê lō͘-sòaⁿ koh-khah tn̂g. Siòng-phìⁿ lāi-té ê ji̍t-thâu lō͘-sòaⁿ sī ùi tiong-tàu hip kàu ji̍t-lo̍h. 3 tiâu sòaⁿ sī 3 kang ê lō͘-sòaⁿ, ùi siōng téng-koân kàu siōng ē-té sī: hē-chì, chhun-chhiu-hun, tang-chì. Chit-tiuⁿ siòng-phìⁿ sī 2020 nî kàu 2021 nî tī I-tá-lī Sicily tó ê Gatto Corvino chng hù-kīn hip–ê. Ji̍t-thâu tī thiⁿ-téng ê lō͘-sòaⁿ kah chhut-hiān ê tn̂g-té, sī koat-tēng Tē-kiû kùi-chiat siōng tiōng-iàu ê goân-in. Thài-iông kah Tē-kiû ū gōa kīn, to̍h khah bô hiah-nī tiōng-iàu. Si̍t-chè-siōng, Tē-kiû sī tī it goe̍h-hūn ê sî-chūn kah Thài-iông siōng óa, hit-chūn sī pak-pòaⁿ-kiû ê kôaⁿ-thiⁿ. Kin-á-ji̍t sī hē-chì, só͘-í kin-á-ji̍t ê ji̍t-thâu tī thiⁿ-téng ê lō͘-sòaⁿ, tùi tòa tī Tē-kiû pak-pòaⁿ-kiû ê lâng lâi-kóng, sī kin-nî siōng tn̂g–ê. M̄-koh tùi lâm-pòaⁿ kiû-ê lâng lâi-kóng, sī kin-nî siōng té–ê.

[KIP] Sann-tiâu Ji̍t-thâu lōo-suànn

Ji̍t-thâu ta̍k-kang tī thinn-tíng leh kiânn ê lōo-suànn kám-ē sio-siâng? Bē neh! Tsi̍t-tang lāi, ji̍t-thâu tī thinn-tíng kiânn ê lōo-suànn ta̍k-kang lóng ē bô-kâng, jî-tshiánn jua̍h-thinn kiânn ê lōo-suànn pí kuânn-thinn kiânn ê lōo-suànn koh-khah tn̂g. Siòng-phìnn lāi-té ê ji̍t-thâu lōo-suànn sī uì tiong-tàu hip kàu ji̍t-lo̍h. 3 tiâu suànn sī 3 kang ê lōo-suànn, uì siōng tíng-kuân kàu siōng ē-té sī: hē-tsì, tshun-tshiu-hun, tang-tsì. Tsit-tiunn siòng-phìnn sī 2020 nî kàu 2021 nî tī I-tá-lī Sicily tó ê Gatto Corvino tsng hù-kīn hip–ê. Ji̍t-thâu tī thinn-tíng ê lōo-suànn kah tshut-hiān ê tn̂g-té, sī kuat-tīng Tē-kiû kuì-tsiat siōng tiōng-iàu ê guân-in. Thài-iông kah Tē-kiû ū guā kīn, to̍h khah bô hiah-nī tiōng-iàu. Si̍t-tsè-siōng, Tē-kiû sī tī it gue̍h-hūn ê sî-tsūn kah Thài-iông siōng uá, hit-tsūn sī pak-puànn-kiû ê kuânn-thinn. Kin-á-ji̍t sī hē-tsì, sóo-í kin-á-ji̍t ê ji̍t-thâu tī thinn-tíng ê lōo-suànn, tuì tuà tī Tē-kiû pak-puànn-kiû ê lâng lâi-kóng, sī kin-nî siōng tn̂g–ê. M̄-koh tuì lâm-puànn kiû-ê lâng lâi-kóng, sī kin-nî siōng té–ê.

[English] Three Sun Paths

Does the Sun follow the same path every day? No. The Sun’s path changes during the year, tracing a longer route during the summer than the winter. Pictured here, the Sun’s arc was captured from noon to sunset on three days, from highest in the sky to lowest: summer solstice, equinox, and winter solstice. The images were taken near Gatto Corvino Village in Sicily, Italy in 2020 and 2021. The path and time the Sun spends in the sky is more important in determining the season than how close the Earth is to the Sun. In fact, the Earth is closest to the Sun in January, during northern winter. Today is a solstice, so today the Sun is taking its longest path of the year across the sky in Earth’s northern hemisphere, but the shortest path in the southern hemisphere.

詞彙學習（漢羅/POJ/KIP/華語/English）

• 【夏至】hē-chì/hē-tsì/夏至/summer solstice
• 【夏至】hā-chì/hā-tsì/夏至/summer solstice
• 【春秋分】chhun-chhiu-hun/tshun-tshiu-hun/春秋分/equinox
• 【冬至】tang-chì/tang-tsì/冬至/winter solstice
• 【北半球】pak-pòaⁿ-kiû/pak-puànn-kiû/北半球/northern hemisphere
• 【南半球】lâm-pòaⁿ-kiû/lâm-puànn-kiû/南半球/southern hemisphere
• 【季節】kùi-chiat/kuì-tsiat/季節/season
• 【意大利】I-tá-lī/I-tá-lī/義大利/Italy