內海仔星雲 無閒𩑾插 ê 中心

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Busy Center of the Lagoon Nebula
• 影像來源：NASA, ESA, Hubble; 資料處理：Francisco Javier Pobes Serrano
• 台文翻譯：An-Li Tsai (NCU)

[漢羅] 內海仔星雲 無閒𩑾插 ê 中心

內海仔星雲中心是一个壯觀 ê 恆星形成 爆發區。 咱會當 tī 影像中心附近看著 2 个以上 長長 ê 漏仔形雲，逐个差不多攏有 半 光年 長。 In 是 極端 ê 恆星風 kah 能量足強 ê 恆星光 造成–ê。 附近有一粒足光 ê 恆星，Herschel 36，kā 這區照甲 足光–ê。 大型 ê 塗粉牆 kā 其他高溫少年恆星崁 leh、予 ín 看起來 變較紅。 這寡恆星 ê 能量 流 tùi 低溫塗粉 氣體 ê 時陣，相迵 ê 兩區 會有足大 ê 溫度差，按呢就會產生 風剪，造成 漏仔形 ê 雲。 這張相片 ê 大細 有 15 光年闊，是 kā 踅地球 leh 飛 ê Hubble 太空望遠鏡 翕著 ê 4 款無仝色 ê 影像，合成做一張–ê。 內海仔星雲 嘛 叫做 M8，就 tī 射手座 (人馬座) 方向差不多 5000 光年 遠 ê 所在。

[POJ] Lāi-hái-á seng-hûn bô-êng-chhih-chhah ê Tiong-sim

Lāi-hái-á seng-hûn tiong-sim sī chi̍t-ê chòng-koan ê hêng-chheⁿ hêng-sêng po̍k-hoat-khu. Lán ē-tàng tī iáⁿ-siōng tiong-sim hù-kīn khòaⁿ-tio̍h 2 ê í-siōng tn̂g-tn̂g ê lāu-á-hêng hûn,ta̍k-ê chha-put-to lóng-ū pòaⁿ kng-nî tn̂g. In sī ke̍k-toan ê hêng-chheⁿ hong kah lêng-liōng chiok kiông ê hêng-chheⁿ-kng chō-sêng–ê. Hù-kīn ū chi̍t-lia̍p chiok kng ê hêng-chheⁿ, Herschel 36, kā chit-khu chiò kah chiok kng–ê. Tōa-hêng ê thô͘-hún-chhiûⁿ kā kî-thaⁿ ko-un siàu-liân hêng-chheⁿ khàm leh, hō͘ ín khòaⁿ–khí-lâi piàn khah âng. Chit-kóa hêng-chheⁿ ê lêng-liōng lâu tùi kē-un thô͘-hún khì-thé ê sî-chūn, sio-thàng ê nn̄g khu ē ū chiok tōa ê un-tō͘ chha, án-ne tō ē sán-seng hong-chián, chō-sêng lāu-á-hêng ê hûn. Chit-tiuⁿ siòng-phìⁿ ê tōa-sè ū 15 kng-nî khoah, sī kā se̍h Tē-kiû leh poe ê Hubble thài-khong bōng-oán-kiàⁿ hip-tio̍h ê 4 khoán bô-kâng sek ê iáⁿ-siōng, ha̍p-sêng chò chi̍t-tiuⁿ–ê. Lāi-hái-á seng-hûn mā kiò-chò M8, tō tī Siā-chhiú-chō (Jîn-má-chō) hong-hiòng chha-put-to 5000 kng-nî hn̄g ê só͘-chāi.

[KIP] Lāi-hái-á sing-hûn bô-îng-tshih-tshah ê Tiong-sim

Lāi-hái-á sing-hûn tiong-sim sī tsi̍t-ê tsòng-kuan ê hîng-tshenn hîng-sîng po̍k-huat-khu. Lán ē-tàng tī iánn-siōng tiong-sim hù-kīn khuànn-tio̍h 2 ê í-siōng tn̂g-tn̂g ê lāu-á-hîng hûn,ta̍k-ê tsha-put-to lóng-ū puànn kng-nî tn̂g. In sī ki̍k-tuan ê hîng-tshenn hong kah lîng-liōng tsiok kiông ê hîng-tshenn-kng tsō-sîng–ê. Hù-kīn ū tsi̍t-lia̍p tsiok kng ê hîng-tshenn, Herschel 36, kā tsit-khu tsiò kah tsiok kng–ê. Tuā-hîng ê thôo-hún-tshiûnn kā kî-thann ko-un siàu-liân hîng-tshenn khàm leh, hōo ín khuànn–khí-lâi piàn khah âng. Tsit-kuá hîng-tshenn ê lîng-liōng lâu tuì kē-un thôo-hún khì-thé ê sî-tsūn, sio-thàng ê nn̄g khu ē ū tsiok tuā ê un-tōo tsha, án-ne tō ē sán-sing hong-tsián, tsō-sîng lāu-á-hîng ê hûn. Tsit-tiunn siòng-phìnn ê tuā-sè ū 15 kng-nî khuah, sī kā se̍h Tē-kiû leh pue ê Hubble thài-khong bōng-uán-kiànn hip-tio̍h ê 4 khuán bô-kâng sik ê iánn-siōng, ha̍p-sîng tsò tsi̍t-tiunn–ê. Lāi-hái-á sing-hûn mā kiò-tsò M8, tō tī Siā-tshiú-tsō (Jîn-má-tsō) hong-hiòng tsha-put-to 5000 kng-nî hn̄g ê sóo-tsāi.

[English] The Busy Center of the Lagoon Nebula

The center of the Lagoon Nebula is a whirlwind of spectacular star formation. Visible near the image center, at least two long funnel-shaped clouds, each roughly half a light-year long, have been formed by extreme stellar winds and intense energetic starlight. A tremendously bright nearby star, Herschel 36, lights the area. Vast walls of dust hide and redden other hot young stars. As energy from these stars pours into the cool dust and gas, large temperature differences in adjoining regions can be created generating shearing winds which may cause the funnels. This picture, spanning about 15 light years, combines images taken in four colors by the orbiting Hubble Space Telescope. The Lagoon Nebula, also known as M8, lies about 5000 light years distant toward the constellation of the Archer (Sagittarius).

詞彙學習（漢羅/POJ/KIP/華語/English）

• 【內海仔星雲】Lāi-hái-á seng-hûn/Lāi-hái-á sing-hûn/潟湖星雲/the Lagoon Nebula
• 【漏仔形雲】lāu-á-hêng hûn/lāu-á-hîng hûn/漏斗型雲/funnel-shaped cloud
• 【恆星風】hêng-chheⁿ-hong/hîng-tshenn-hong/恆星風/stellar wind
• 【恆星光】hêng-chheⁿ-kng/hîng-tshenn-kng/恆星光/starlight
• 【塗粉牆】thô͘-hún-chhiûⁿ/thôo-hún-tshiûnn/灰塵牆/dust wall
• 【風剪】hong-chián/hong-tsián/剪切風/shearing winds
• 【Hubble 太空望遠鏡】Hubble thài-khong bōng-oán-kiàⁿ/Hubble thài-khong bōng-uán-kiànn/哈伯太空望遠鏡/Hubble Space Telescope
• 【射手座】Siā-chhiú-chō/Siā-tshiú-tsō/射手座/the constellation of the Archer
• 【人馬座】Jîn-má-chō/Jîn-má-tsō/人馬座/Sagittarius