地球 ê 暗暝 II

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Planet Earth at Night II
• 影片來源：NASA, Gateway to Astronaut Photography, ISS Expedition 53; 音樂：The Low Seas (The 126ers)
• 台文翻譯：An-Li Tsai (NCU)

[漢羅] 地球 ê 暗暝 II

這支 leh 翕地球平靜暗暝 ê 影片，是 2017 年 國際太空站 翕 ê 縮時攝影影片。 愛看這款低地球軌道景色 ê 人，會當趁這个機會享受一下仔 地球大氣頂懸 厚 tut-tut ê 青色極光 kah 紅色極光。 這个夜景是 ùi 北美州 ê 西北爿 翕到 東南爿，一直翕到 墨西哥灣 kah Florida 海岸。 第二段影片是 leh 追蹤 歐洲城市 ê 燈火，飛過地中海，kah 北非洲 光爍爍 ê 尼羅河。 Tiàm 太空站頂懸看，下底有 kah 西北雨做伙出現 ê 雷公爍爁。 Tī 遠方，迵過地球表面薄薄 ê 大氣氣輝，閣會當看著天星 tùi 彎彎 ê 地平線下底 peh 起來。 是講，你嘛會使隨時 tī 厝 lih 追蹤 地球這馬發生 ê 自然現象。

[POJ] Tē-kiû ê Àm-mî II

Chit-ki leh hip Tē-kiû pêng-chēng àm-mî ê iáⁿ-phìⁿ, sī 2017 nî kok-chè-thài-khong-chām hip ê sok-sî-liap-iáⁿ iáⁿ-phìⁿ. Ài khòaⁿ chit-khoán kē Tē-kiû kúi-tō kéng-sek ê lâng, ē-tàng thàn chit-ê ki-hōe hiáng-siū chi̍t-ē-á Tē-kiû tāi-khì téng-koân kāu-tut-tut ê chheⁿ-sek ke̍k-kng kah âng-sek ke̍k-kng. Chit-ê iā-kéng sī ùi Pak-bí-chiu ê sai-pak-pêng hip kàu tang-lâm-pêng, it-ti̍t hip kàu Be̍k-se-ko-oan kah Florida hái-hōaⁿ. Tē-jī-tōaⁿ iáⁿ-phìⁿ sī leh tui-chong Au-chiu siâⁿ-chhī ê teng-hóe, poe-kòe Tē-tiong-hái, kah Pak-hui-chiu kng-sih-sih ê Nî-lô-hô. Tiàm thài-khong-chām téng-koân khòaⁿ, ē-té ū kah sai-pak-hō͘ chò-hóe chhut-hiān ê lûi-kong sih-nah. Tī oán-hong, thàng-kòe Tē-kiû piáu-bīn po̍h-po̍h ê tāi-khì khì-hui, koh ē-tàng khòaⁿ-tio̍h thiⁿ-chheⁿ tùi oan-oan ê tē-pêng-sòaⁿ ē-té peh--khí-lâi. Sī-kóng, lí mā ē-sái sûi-sî tī chhù-lih tui-chong Tē-kiû chit-má hoat-seng ê chū-jiân hiān-siōng.

[KIP] Tē-kiû ê Àm-mî II

Tsit-ki leh hip Tē-kiû pîng-tsīng àm-mî ê iánn-phìnn, sī 2017 nî kok-tsè-thài-khong-tsām hip ê sok-sî-liap-iánn iánn-phìnn. Ài khuànn tsit-khuán kē Tē-kiû kuí-tō kíng-sik ê lâng, ē-tàng thàn tsit-ê ki-huē hiáng-siū tsi̍t-ē-á Tē-kiû tāi-khì tíng-kuân kāu-tut-tut ê tshenn-sik ki̍k-kng kah âng-sik ki̍k-kng. Tsit-ê iā-kíng sī uì Pak-bí-tsiu ê sai-pak-pîng hip kàu tang-lâm-pîng, it-ti̍t hip kàu Bi̍k-se-ko-uan kah Florida hái-huānn. Tē-jī-tuānn iánn-phìnn sī leh tui-chong Au-tsiu siânn-tshī ê ting-hué, pue-kuè Tē-tiong-hái, kah Pak-hui-tsiu kng-sih-sih ê Nî-lô-hô. Tiàm thài-khong-tsām tíng-kuân khuànn, ē-té ū kah sai-pak-hōo tsò-hué tshut-hiān ê luî-kong sih-nah. Tī uán-hong, thàng-kuè Tē-kiû piáu-bīn po̍h-po̍h ê tāi-khì khì-hui, koh ē-tàng khuànn-tio̍h thinn-tshenn tuì uan-uan ê tē-pîng-suànn ē-té peh--khí-lâi. Sī-kóng, lí mā ē-sái suî-sî tī tshù-lih tui-tsong Tē-kiû tsit-má huat-sing ê tsū-jiân hiān-siōng.

[English] Planet Earth at Night II

Recorded during 2017, timelapse sequences from the International Space Station are compiled in this serene video of planet Earth at Night. Fans of low Earth orbit can start by enjoying the view as green and red aurora borealis slather up the sky. The night scene tracks from northwest to southeast across North America, toward the Gulf of Mexico and the Florida coast. A second sequence follows European city lights, crosses the Mediterranean Sea, and passes over a bright Nile river in northern Africa. Seen from the orbital outpost, erratic flashes of lightning appear in thunder storms below and stars rise above the planet's curved horizon through a faint atmospheric airglow. Of course, from home you can always check out the vital signs of Planet Earth Now.

詞彙學習