木星 ê 衛星 ùi 木星 面頭前行過

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Moons Across Jupiter
• 影像來源：NASA; ESA, JPL, Cassini Imaging Team, SSI; 資料處理：Kevin M. Gill
• 台文翻譯：An-Li Tsai (NCU)

[漢羅] 木星 ê 衛星 ùi 木星 面頭前行過

木星 ê 衛星 踅 木星 leh 行。 這支影片 紀錄著 兩粒 木星上大粒 ê 衛星，木衛二 Europa kah 木衛一 Io，ùi 這粒大行星 ê 大紅斑 面頭前行過 ê 模樣。 大紅斑是咱所知影 tī 太陽系 內底上大 ê 風暴。 這支影片是 機器人太空船 Cassini 欲飛去土星進前，tī 2000 年彼陣 飛過木星 ê 時陣翕--ê。 這兩粒衛星，較遠彼粒是 有火山 ê 木衛一 Io，較近彼粒是 攏是冰 ê 木衛二 Europa。 Tī 這支縮時攝影影片內底，木衛二 Europa 行甲超過 木衛一 Io。 這 足奇怪--ê，因為 木衛一 Io kah 木星 較倚，應該愛行較緊才著。 這个理由是因為 飛足緊 ê Cassini 太空船 飛過 ê 時陣 改變 kha-mé-lah 翕相 ê 角度。 木星是目前 NASA ê 機器人 太空船 Juno leh 觀測 ê 對象。 ESA tī 4 月 發射 ê 木星冰衛星探測船 (JUICE) 這馬當 leh 飛過去。

[POJ] Bo̍k-chheⁿ ê ūi-chhiⁿ ùi Bo̍k-chheⁿ bīn-thâu-chêng kiâⁿ-kòe

Bo̍k-chheⁿ ê ūi-chheⁿ se̍h Bo̍k-chheⁿ leh kiâⁿ Chit-ki iáⁿ-phìⁿ kì-lio̍k tio̍h nn̄g-lia̍p Bo̍k-chheⁿ siōng tōa-lia̍p ê ūi-chheⁿ, Bo̍k-ūi-jī Europa kah Bo̍k-ūi-chi̍t Io, ùi chit-lia̍p tōa-kiâⁿ-chheⁿ ê Tōa-âng-pan bīn-thâu-chêng kiâⁿ-kòe ê bô͘-iūⁿ. Tōa-âng-pan sī lán só͘ chai-iáⁿ tī Thài-iông-hē lāi-té siōng tōa ê hong-pō. Chit-ki iáⁿ-phìⁿ sī ke-khì-lâng thài-khong-chûn Cassini beh poe-khì Thó͘-chheⁿ chìn-chêng, tī 2000 nî hit-chūn poe-kòe Bo̍k-chheⁿ ê sî-chūn hip--ê. Chit-nn̄g-lia̍p ūi-chheⁿ, khah hn̄g hit-lia̍p sī ū hóe-soaⁿ ê Bo̍k-ūi-chi̍t Io, khah kīn hit-lia̍p sī lóng-sī-peng ê Bo̍k-ūi-jī Europa. Tī chit-ki sok-sî-liap-iáⁿ iáⁿ-phìⁿ lāi-té, Bo̍k-ūi-jī Europa kiâⁿ chhiau-kòe Bo̍k-ūi-chi̍t Io. Che chiok kî-koài--ê, in-ūi Bo̍k-ūi-chi̍t Io kah Bo̍k-chheⁿ khah óa, èng-kai ài kiâⁿ khah kín chiah tio̍h. Ē án-ne sī in-ūi poe chiok kín ê Cassini thài-khong-chûn poe--kòe ê sî-chūn kái-piàn kha-mé-lah hip-siòng ê kak-tō͘. Bo̍k-chheⁿ sī bo̍k-chiân NASA ê ke-khì-lâng thài-khong-chûn Juno leh koan-chhek ê tùi-siōng. ESA tī 4 goe̍h hoat-siā ê Bo̍k-chheⁿ Peng-ūi-chheⁿ Thàm-chhek-chûn (JUICE) chit-má tng leh poe kòe-khì.

[KIP] Bo̍k-tshenn ê uī-tshinn uì Bo̍k-tshenn bīn-thâu-tsîng kiânn-kuè

Bo̍k-tshenn ê uī-tshenn se̍h Bo̍k-tshenn leh kiânn Tsit-ki iánn-phìnn kì-lio̍k tio̍h nn̄g-lia̍p Bo̍k-tshenn siōng tuā-lia̍p ê uī-tshenn, Bo̍k-uī-jī Europa kah Bo̍k-uī-tsi̍t Io, uì tsit-lia̍p tuā-kîann-tshenn ê Tuā-âng-pan bīn-thâu-tsîng kiânn-kuè ê bôo-iūnn. Tuā-âng-pan sī lán sóo tsai-iánn tī Thài-iông-hē lāi-té siōng tuā ê hong-pō. Tsit-ki iánn-phìnn sī ke-khì-lâng thài-khong-tsûn Cassini beh pue-khì Thóo-tshenn tsìn-tsîng, tī 2000 nî hit-tsūn pue-kuè Bo̍k-tshenn ê sî-tsūn hip--ê. Tsit-nn̄g-lia̍p uī-tshenn, khah hn̄g hit-lia̍p sī ū hué-suann ê Bo̍k-uī-tsi̍t Io, khah kīn hit-lia̍p sī lóng-sī-ping ê Bo̍k-uī-jī Europa. Tī tsit-ki sok-sî-liap-iánn iánn-phìnn lāi-té, Bo̍k-uī-jī Europa kiânn tshiau-kuè Bo̍k-uī-tsi̍t Io. Tse tsiok kî-kuài--ê, in-uī Bo̍k-uī-tsi̍t Io kah Bo̍k-tshenn khah uá, ìng-kai ài kiânn khah kín tsiah tio̍h. Ē án-ne sī in-uī pue tsiok kín ê Cassini thài-khong-tsûn pue--kuè ê sî-tsūn kái-piàn kha-mé-lah hip-siòng ê kak-tōo. Bo̍k-tshenn sī bo̍k-tsiân NASA ê ke-khì-lâng thài-khong-tsûn Juno leh kuan-tshik ê tuì-siōng. ESA tī 4 gue̍h huat-siā ê Bo̍k-tshenn Ping-uī-tshenn Thàm-tshik-tsûn (JUICE) tsit-má tng leh pue kuè-khì.

[English] Moons Across Jupiter

Jupiter's moons circle Jupiter. The featured video depicts Europa and Io, two of Jupiter's largest moons, crossing in front of the grand planet's Great Red Spot, the largest known storm system in our Solar System. The video was composed from images taken by the robotic Cassini spacecraft as it passed Jupiter in 2000, on its way to Saturn. The two moons visible are volcanic Io, in the distance, and icy Europa. In the time-lapse video, Europa appears to overtake Io, which is odd because Io is closer to Jupiter and moves faster. The explanation is that the motion of the fast Cassini spacecraft changes the camera location significantly during imaging. Jupiter is currently being visited by NASA's robotic Juno spacecraft, while ESA's Jupiter Icy Moons Explorer (JUICE), launched in April, is enroute.

詞彙學習