恆星 kā 行星 食掉

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Star Eats Planet
• 影片來源 kah 版權：K. Miller & R. Hurt (Caltech, IPAC)
• 台文翻譯：An-Li Tsai (NCU)

[漢羅] 恆星 kā 行星 食掉

咱知影有一个世界咧 滅亡。 講較詳細咧，類太陽恆星 ZTF SLRN-2020 這馬當咧食伊其中一粒行星。 雖罔講有足濟行星 落尾攏會因為踅入去中央恆星內底，結束伊 ê 性命， 毋過頭一擺 直接觀測著 類木星行星去予食去，是發生 tī 2020 年 彼陣。 這粒恆星 ZTF SLRN-2020 kah 咱太陽 ê 距離是 1 萬 2000 光年，就 tī 鴟鴞 ê 星座 (天鷹座) ê 方向。 這支 主題動畫 頭一擺畫出這粒氣體行星 ùi 這粒迷人恆星 ê 外沿飛過去 ê 時陣，伊 ê 大氣去予搝開 ê 畫面。 行星大氣有一寡去予恆星大氣吸去，另外一寡氣體去予 擲到太空去。 影片結束，行星嘛完全去予恆星吞去，落 lŏe 恆星中心，造成恆星外層大氣 tī 足短 ê 時間內脹大、溫度衝懸、閣變較光。 等到有一工，差不多 80 億年 以後，地球 嘛會那踅那落 lŏe 咱 太陽 內底。

[POJ] Hêng-chhiⁿ kā Kiâⁿ-chhiⁿ chia̍h--tiāu

Lán chai-iáⁿ ū chi̍t-ê sè-kài leh bia̍t-bông. Kóng khah siông-sè leh, Lūi-thài-iông hêng-chhiⁿ ZTF SLRN 2020 chit-má tng-leh chia̍h i kî-tiong chi̍t-lia̍p kiâⁿ-chhiⁿ. Sui-bóng kóng ū chiok chē kiâⁿ-chhiⁿ lo̍h-bóe lóng ē in-ūi se̍h-ji̍p-khì tiong-ng hêng-chhiⁿ lāi-té, kiat-sok i ê sìⁿ-miā, m̄-koh thâu-chi̍t-pái ti̍t-chiap koan-chhek tio̍h Lūi-bo̍k-chhiⁿ kiâⁿ-chhiⁿ khì hō͘ chia̍h--khì, sī hoat-seng tī 2020 nî hit-chūn. Chit-lia̍p hêng-chhiⁿ ZTF SLRN 2020 kah lán Thài-iông ê kū-lī sī 1 bān 2000 kng-nî, to̍h tī bā-hio̍h ê seng-chō (Thian-eng-chō) ê hong-hiòng. Chit-ki chú-tê tōng-ōe thâu-chi̍t-pái ōe chhut chit-lia̍p khì-thé kiâⁿ-chhiⁿ ùi chit-lia̍p bê-lâng hêng-chhiⁿ ê gōa-iân poe--kòe-khì ê sî-chūn, i ê tāi-khì khì hō͘ giú--khui ê ōe-bīn. Kiâⁿ-chhiⁿ tāi-khì ū chi̍t-kóa khì hō͘ hêng-chhiⁿ tāi-khì khip--khì, lēng-gōa chi̍t-kóa khì-thé khì hō͘ tàn kàu thài-khong khì. Iáⁿ-phìⁿ kiat-sok, kiâⁿ-chhiⁿ mā oân-choân khì hō͘ hêng-chhiⁿ thun--khì, lak lőe hêng-chhiⁿ tiong-sim, chō-sêng hêng-chhiⁿ gōa-chân tāi-khì tī chiok té ê sî-kan-lāi tiùⁿ-tōa, un-tō͘ chhèng-koân, koh piàn khah kng. Tán kàu ū-chi̍t-kang, chha-put-to 80 ek nî í-āu, Tē-kiû mā ē ná se̍h ná lak lőe lán Thài-iông lāi-té.

[KIP] Hîng-tshinn kā Kiânn-tshinn tsia̍h--tiāu

Lán tsai-iánn ū tsi̍t-ê sè-kài leh bia̍t-bông. Kóng khah siông-sè leh, Luī-thài-iông hîng-tshinn ZTF SLRN 2020 tsit-má tng-leh tsia̍h i kî-tiong tsi̍t-lia̍p kîann-tshinn. Sui-bóng kóng ū tsiok tsē kîann-tshinn lo̍h-bué lóng ē in-uī se̍h-ji̍p-khì tiong-ng hîng-tshinn lāi-té, kiat-sok i ê sìnn-miā, m̄-koh thâu-tsi̍t-pái ti̍t-tsiap kuan-tshik tio̍h Luī-bo̍k-tshinn kîann-tshinn khì hōo tsia̍h--khì, sī huat-sing tī 2020 nî hit-tsūn. Tsit-lia̍p hîng-tshinn ZTF SLRN 2020 kah lán Thài-iông ê kū-lī sī 1 bān 2000 kng-nî, to̍h tī bā-hio̍h ê sing-tsō (Thian-ing-tsō) ê hong-hiòng. Tsit-ki tsú-tê tōng-uē thâu-tsi̍t-pái uē tshut tsit-lia̍p khì-thé kîann-tshinn uì tsit-lia̍p bê-lâng hîng-tshinn ê guā-iân pue--kuè-khì ê sî-tsūn, i ê tāi-khì khì hōo giú--khui ê uē-bīn. Kîann-tshinn tāi-khì ū tsi̍t-kuá khì hōo hîng-tshinn tāi-khì khip--khì, līng-guā tsi̍t-kuá khì-thé khì hōo tàn kàu thài-khong khì. Iánn-phìnn kiat-sok, kîann-tshinn mā uân-tsuân khì hōo hîng-tshinn thun--khì, lak lue̋ hîng-tshinn tiong-sim, tsō-sîng hîng-tshinn guā-tsân tāi-khì tī tsiok té ê sî-kan-lāi tiùnn-tuā, un-tōo tshìng-kuân, koh piàn khah kng. Tán kàu ū-tsi̍t-kang, tsha-put-to 80 ik nî í-āu, Tē-kiû mā ē ná se̍h ná lak lue̋ lán Thài-iông lāi-té.

[English] Star Eats Planet

It’s the end of a world as we know it. Specifically, the Sun-like star ZTF SLRN-2020 was seen eating one of its own planets. Although many a planet eventually dies by spiraling into their central star, the 2020 event, involving a Jupiter-like planet, was the first time it was seen directly. The star ZTF SLRN-2020 lies about 12,000 light years from the Sun toward the constellation of the Eagle (Aquila). In the featured animated illustration of the incident, the gas planet's atmosphere is first pictured being stripped away as it skims along the outskirts of the attracting star. Some of the planet's gas is absorbed into the star's atmosphere, while other gas is expelled into space. By the video's end, the planet is completely engulfed and falls into the star's center, causing the star's outer atmosphere to briefly expand, heat up, and brighten. One day, about eight billion years from now, planet Earth may spiral into our Sun.

詞彙學習