三裂星雲 ê 中心

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：In the Center of the Trifid Nebula
• 影像來源 kah 版權：Martin Pugh
• 宇宙門：APOD 亂數產生器
• 台文翻譯：An-Li Tsai (NCU)

[漢羅] 三裂星雲 ê 中心

三裂星雲 ê 中心是發生啥物代誌？ 三裂星雲 會叫這个名，就是因為中央有三條足明顯 ê 塗粉帶。 下底有無透光 ê 塗粉山，規个星雲內底嘛有其他烏暗塗粉絲迵過。 中心有一粒大質量恆星，kā 三裂星雲 照予光。 三裂星雲嘛叫做 M20，伊才 30萬歲爾爾，是目前咱知影上少年 ê 發射星雲。 這个 恆星形成星雲 就 tī 9000 光年 遠 ê 射手座（人馬座）遐。 相片翕著 ê 範圍差不多有 20 光年 闊。

[POJ] Saⁿ-li̍h-seng-hûn ê tiong-sim

Saⁿ-li̍h-seng-hûn ê tiong-sim sī hoat-seng siáⁿ-mih tāi-chì? Saⁿ-li̍h-seng-hûn ē kiò chit-ê miâ, tio̍h-sī in-ūi tiong-ng ū saⁿ-tiâu chiok bêng-hián ê thô͘-hún-tòa. Ē-té ū bô thàu-kng ê thô͘-hún-soaⁿ, kui-ê seng-hûn lāi-té mā ū kî-tha o͘-àm thô͘-hún-si thàng--kòe. Tiong-sim ū chi̍t-lia̍p tōa-chit-liōng hêng-chhiⁿ, kā Saⁿ-li̍h-seng-hûn chiàu hō͘ kng. Saⁿ-li̍h-seng-hûn mā kiò-chò Ḿ0, i chiah 30 bān hòe niā-niā, sī bo̍k-chêng lán chai-iáⁿ siōng siàu-liân ê hoat-siā-seng-hûn. Chit-ê hêng-chhiⁿ hêng-sêng seng-hûn to̍h tī 9000 kng-nî hn̄g ê Siā-chhiú-chō (Jîn-má-chō) hia. Siòng-phìⁿ hip--tio̍h ê hoān-ûi chha-put-to ū 20 kng nî khoah.

[KIP] Sann-li̍h-sing-hûn ê tiong-sim

Sann-li̍h-sing-hûn ê tiong-sim sī huat-sing siánn-mih tāi-tsì? Sann-li̍h-sing-hûn ē kiò tsit-ê miâ, tio̍h-sī in-uī tiong-ng ū sann-tiâu tsiok bîng-hián ê thôo-hún-tuà. Ē-té ū bô thàu-kng ê thôo-hún-suann, kui-ê sing-hûn lāi-té mā ū kî-tha oo-àm thôo-hún-si thàng--kuè. Tiong-sim ū tsi̍t-lia̍p tuā-tsit-liōng hîng-tshinn, kā Sann-li̍h-sing-hûn tsiàu hōo kng. Sann-li̍h-sing-hûn mā kiò-tsò M20, i tsiah 30 bān huè niā-niā, sī bo̍k-tsîng lán tsai-iánn siōng siàu-liân ê huat-siā-sing-hûn. Tsit-ê hîng-tshinn hîng-sîng sing-hûn to̍h tī 9000 kng-nî hn̄g ê Siā-tshiú-tsō (Jîn-má-tsō) hia. Siòng-phìnn hip--tio̍h ê huān-uî tsha-put-to ū 20 kng nî khuah.

[English] In the Center of the Trifid Nebula

What's happening at the center of the Trifid Nebula? Three prominent dust lanes that give the Trifid its name all come together. Mountains of opaque dust appear near the bottom, while other dark filaments of dust are visible threaded throughout the nebula. A single massive star visible near the center causes much of the Trifid's glow. The Trifid, cataloged as M20, is only about 300,000 years old, making it among the youngest emission nebulas known. The star forming nebula lies about 9,000 light years away toward the constellation of the Archer (Sagittarius). The region pictured here spans about 20 light years.

詞彙學習