小行星 Ida kah 伊 ê 衛星 Dactyl

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Ida and Dactyl: Asteroid and Moon
• 影像來源：NASA, JPL, Galileo Mission
• 台文翻譯：An-Li Tsai (NCU)

[漢羅] 小行星 Ida kah 伊 ê 衛星 Dactyl

這粒小行星 有一粒衛星。 1993 年彼陣，欲去 木星 ê Galileo 機器人太空船 tī 行星間長途旅行 ê 時陣，拄著兩粒 小行星，就 kā 翕起來。 太空船翕著 ê 第二粒小行星叫做 243 Ida，煞發現講伊 竟然 有一粒衛星。 Tī 這張 處理過 通看較清楚 ê 影像內底，咱會當看著正爿有一粒細細粒 ê 天體。 伊就是 Ida ê 衛星，叫做 Dactyl，才 1.6 公里大爾爾。 相對來講，這粒 馬鈴薯形 ê Ida 就較大粒，伊有 60 公里長，25 公里闊。 Dactyl 是頭一粒科學家揣著 ê 小行星衛星。 毋過咱這馬已經知影講，有足濟粒小行星 攏有衛星。 Ida kah Dactyl ê 名攏是 ùi 希臘神話 來--ê。

[POJ] Sió-kiâⁿ-chheⁿ Ida kah i ê ūi-chheⁿ Dactyl

Chit-lia̍p sió-kiâⁿ-chheⁿ ū chi̍t-lia̍p ūi-chheⁿ. 1993 nî hit-chūn, beh khì Bo̍k-chheⁿ ê Galileo ke-khì-lâng thài-khong-chûn tī kiâⁿ-chheⁿ-kan tn̂g-tō͘ lú-hêng ê sî-chūn, tú-tio̍h nn̄g-lia̍p sió-kiâⁿ-chheⁿ, to̍h kā hip--khí-lâi. Thài-khong-chûn hip-tio̍h ê tē-jī-lia̍p sió-kiâⁿ-chheⁿ kiò-chò 243 Ida, soah hoat-hiān kóng i ū chi̍t-lia̍p ūi-chheⁿ. Tī chit-tiuⁿ chhú-lí kòe thang khòaⁿ khah chheng-chhó ê iáⁿ-siōng lāi-té, lán ē-tàng khòaⁿ-tio̍h chiàⁿ-pêng ū chi̍t-lia̍p sè-sè-lia̍p ê thian-thé. I to̍h sī Ida ê ūi-chheⁿ, kiò-chò Dactyl, chiah 1.6 kong-lí tōa niā-niā. Siong-tùi lâi-kóng, chit-lia̍p má-lêng-chî-hêng ê Ida to̍h khah tōa-lia̍p, i ū 60 kong-lí tn̂g, 25 kong-lí khoah. Dactyl sī thâu-chi̍t-lia̍p kho-ha̍k-ka chhōe-tio̍h ê sió-kiâⁿ-chheⁿ ūi-chheⁿ. M̄-koh lán chit-má í-keng chai-iáⁿ kóng, ū chiok chē lia̍p sió-kiâⁿ-chheⁿ lóng ū ūi-chheⁿ. Ida kah Dactyl ê miâ lóng sī ùi Hi-la̍h sîn-ōe lâi--ê.

[KIP] Sió-kiânn-tshenn Ida kah i ê uī-tshenn Dactyl

Tsit-lia̍p sió-kiânn-tshenn ū tsi̍t-lia̍p uī-tshenn. 1993 nî hit-tsūn, beh khì Bo̍k-tshenn ê Galileo ke-khì-lâng thài-khong-tsûn tī kiânn-tshenn-kan tn̂g-tōo lú-hîng ê sî-tsūn, tú-tio̍h nn̄g-lia̍p sió-kiânn-tshenn, to̍h kā hip--khí-lâi. Thài-khong-tsûn hip-tio̍h ê tē-jī-lia̍p sió-kiânn-tshenn kiò-tsò 243 Ida, suah huat-hiān kóng i ū tsi̍t-lia̍p uī-tshenn. Tī tsit-tiunn tshú-lí kuè thang khuànn khah tshing-tshó ê iánn-siōng lāi-té, lán ē-tàng khuànn-tio̍h tsiànn-pîng ū tsi̍t-lia̍p sè-sè-lia̍p ê thian-thé. I to̍h sī Ida ê uī-tshenn, kiò-tsò Dactyl, tsiah 1.6 kong-lí tuā niā-niā. Siong-tuì lâi-kóng, tsit-lia̍p má-lîng-tsî-hîng ê Ida to̍h khah tuā-lia̍p, i ū 60 kong-lí tn̂g, 25 kong-lí khuah. Dactyl sī thâu-tsi̍t-lia̍p kho-ha̍k-ka tshuē-tio̍h ê sió-kiânn-tshenn uī-tshenn. M̄-koh lán tsit-má í-king tsai-iánn kóng, ū tsiok tsē lia̍p sió-kiânn-tshenn lóng ū uī-tshenn. Ida kah Dactyl ê miâ lóng sī uì Hi-la̍h sîn-uē lâi--ê.

[English] Ida and Dactyl: Asteroid and Moon

This asteroid has a moon. The robot spacecraft Galileo on route to Jupiter in 1993 encountered and photographed two asteroids during its long interplanetary voyage. The second minor planet it photographed, 243 Ida, was unexpectedly discovered to have a moon. The tiny moon, Dactyl, is only about 1.6 kilometers across and seen as a small dot on the right of the sharpened featured image. In contrast, the potato-shaped Ida is much larger, measuring about 60 kilometers long and 25 km wide. Dactyl is the first moon of an asteroid ever discovered -- now many asteroids are known to have moons. The names Ida and Dactyl are from Greek mythology.

詞彙學習