室女座星系團

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Virgo Cluster Galaxies
• 影像來源 kah 版權：Abdullah Alharbi
• 台文翻譯：An-Li Tsai (NCU)

[漢羅] 室女座星系團

室女座星系團 佔 這規幅 望遠鏡 視野 差不多有 4 度闊。 室女座星系團 tī 差不多 5000 萬光年遠 ê 所在，是 kah 咱本星系群 上倚 ê 大型星系團。 室女座星系團內底特別光 ê 長株圓星系，是中央下跤 ê M87，倒爿頂懸 ê M84，kah 倒爿下跤 ê M86，in 攏是 Messier 目錄 內底 ê 天體。 M84 kah M86 去 hŏng 認為是 Markarian 鍊仔 ê 一部份。 鍊仔就是這張相片倒爿 排做一條 ê 彼陣星系。 鍊仔中央彼搭有一對足趣味 ê 交互作用星系，NGC 4438 kah NGC 4435，in 就叫做 Markarian ê 目睭。 是講 大型長株圓星系 M87 是 室女座星系團內底上顯目–ê。 伊是頭一粒用咱地球 ê 事件視界望遠鏡 揣著 ê 超大質量烏洞 in 兜。

[POJ] Sek-lú-chō seng-hē-thoân

Sek-lú-chō seng-hē-thoân chiàm che kui-pak bōng-oán-kiàⁿ sī-iá chha-put-to ū 4 tō͘ khoah. Sek-lú-chō seng-hē-thoân tī chha-put-to 5000 bān kng-nî hn̄g ê só͘-chāi, sī kah lán Pún-seng-hē-kûn siōng óa ê tōa-hêng seng-hē-thoân. Sek-lú-chō seng-hē-thoân lāi-té te̍k-pia̍t kng ê tn̂g-tu-îⁿ seng-hē, sī tiong-ng ē-kha ê M87, tò-pêng téng-koân ê M84, kah tò-pêng ē-kha ê M86, in lóng sī Messier bo̍k-lio̍k lāi-té ê thian-thé. M84 kah M86 khì hŏng jīn-ûi sī Markarian liān-á ê chi̍t-pō͘-hūn. Liān-á to̍h sī chit-tiuⁿ siòng-phìⁿ tò-pêng pâi chò chi̍t-tiâu ê hit-tīn seng-hē. Liān-á tiong-ng hit-tah ū chi̍t-tùi chiok chhù-bī ê kau-hō͘-chok-iōng seng-hē, NGC 4438 kah NGC 4435, in to̍h kiò-chò Markarian ê ba̍k-chiu. Sī-kóng tōa-hêng tn̂g-tu-îⁿ seng-hē M87 sī Sek-lú-chō seng-hē-thoân lāi-té siōng hiáⁿ-ba̍k–ê. I sī thâu chi̍t-lia̍p iōng lán Tē-kiû ê sū-kiāⁿ-sī-kài bōng-oán-kiàⁿ chhōe–tio̍h ê chhiau-tōa-chit-liōng-o͘-tōng in tau.

[KIP] Sik-lú-tsō sing-hē-thuân

Sik-lú-tsō sing-hē-thuân tsiàm tse kui-pak bōng-uán-kiànn sī-iá tsha-put-to ū 4 tōo khuah. Sik-lú-tsō sing-hē-thuân tī tsha-put-to 5000 bān kng-nî hn̄g ê sóo-tsāi, sī kah lán Pún-sing-hē-kûn siōng uá ê tuā-hîng sing-hē-thuân. Sik-lú-tsō sing-hē-thuân lāi-té ti̍k-pia̍t kng ê tn̂g-tu-înn sing-hē, sī tiong-ng ē-kha ê M87, tò-pîng tíng-kuân ê M84, kah tò-pîng ē-kha ê M86, in lóng sī Messier bo̍k-lio̍k lāi-té ê thian-thé. M84 kah M86 khì hŏng jīn-uî sī Markarian liān-á ê tsi̍t-pōo-hūn. Liān-á to̍h sī tsit-tiunn siòng-phìnn tò-pîng pâi tsò tsi̍t-tiâu ê hit-tīn sing-hē. Liān-á tiong-ng hit-tah ū tsi̍t-tuì tsiok tshù-bī ê kau-hōo-tsok-iōng sing-hē, NGC 4438 kah NGC 4435, in to̍h kiò-tsò Markarian ê ba̍k-tsiu. Sī-kóng tuā-hîng tn̂g-tu-înn sing-hē M87 sī Sik-lú-tsō sing-hē-thuân lāi-té siōng hiánn-ba̍k–ê. I sī thâu tsi̍t-lia̍p iōng lán Tē-kiû ê sū-kiānn-sī-kài bōng-uán-kiànn tshuē–tio̍h ê tshiau-tuā-tsit-liōng-oo-tōng in tau.

[English] Virgo Cluster Galaxies

Galaxies of the Virgo Cluster are scattered across this nearly 4 degree wide telescopic field of view. About 50 million light-years distant, the Virgo Cluster is the closest large galaxy cluster to our own local galaxy group. Prominent here are Virgo’s bright elliptical galaxies Messier catalog, M87 at bottom center, and M84 and M86 (top to bottom) near top left. M84 and M86 are recognized as part of Markarian’s Chain, a visually striking line-up of galaxies on the left side of this frame. Near the middle of the chain lies an intriguing interacting pair of galaxies, NGC 4438 and NGC 4435, known to some as Markarian’s Eyes. Of course giant elliptical galaxy M87 dominates the Virgo cluster. It’s the home of a super massive black hole, the first black hole ever imaged by planet Earth’s Event Horizon Telescope.

詞彙學習（漢羅/POJ/KIP/華語/English）

• 【室女座星系團】Sek-lú-chō seng-hē-thoân/Sik-lú-tsō sing-hē-thuân/室女座星系團/Virgo Cluster
• 【星系團】seng-hē-thoân/sing-hē-thuân/星系團/galaxy cluster
• 【本星系群】pún-seng-hē-kûn/pún-sing-hē-kûn/本星系群/local galaxy group
• 【超大質量烏洞】chhiau-tōa-chit-liōng-o͘-tōng/tshiau-tuā-tsit-liōng-oo-tōng/超大質量烏洞/super massive black hole
• 【長株圓星系】tn̂g-tu-îⁿ seng-hē/tn̂g-tu-înn sing-hē/橢圓星系/elliptical galaxy
• 【M87】M peh-cha̍p-chhit/M peh-tsa̍p-tshit/M87/M87
• 【M84】M peh-cha̍p-sì/M peh-tsa̍p-sì/M84/M84
• 【M86】M peh-cha̍p-la̍k/M peh-tsa̍p-la̍k/M86/M86
• 【Messier 目錄】Messier bo̍k-lio̍k/Messier bo̍k-lio̍k/梅西爾目錄/Messier catalog
• 【Markarian 鍊仔】Markarian liān-á/Markarian liān-á/馬卡萊恩長鏈/Markarian’s Chain
• 【Markarian ê 目睭】Markarian ê ba̍k-chiu/Markarian ê ba̍k-tsiu/馬卡萊恩的眼睛/Markarian’s Eyes
• 【交互作用星系】kau-hō͘-chok-iōng seng-hē/kau-hōo-tsok-iōng sing-hē/交互作用星系/interacting galaxies
• 【NGC 4438】NGC sù-sù-sam-pat/NGC sù-sù-sam-pat/NGC 4438/NGC 4438
• 【NGC 4435】NGC sù-sù-sam-ngó͘/NGC sù-sù-sam-ngóo/NGC 4435/NGC 4435
• 【事件視界望遠鏡】sū-kiāⁿ-sī-kài bōng-oán-kiàⁿ/sū-kiānn-sī-kài bōng-uán-kiànn/事件視界望遠鏡/Event Horizon Telescope
• 【視野】sī-iá/sī-iá/視野/field of view