虯毛 ê 捲螺仔星系 M63

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Curly Spiral Galaxy M63
• 影像來源 kah 版權：Sophie Paulin, Jens Unger, Jakob Sahner
• 台文翻譯：An-Li Tsai (NCU)

[漢羅] 虯毛 ê 捲螺仔星系 M63

Messier 63 是 tī 北天一个足光 ê 捲螺仔星系。 伊 kah 附近 彼个忠心 ê 星座獵犬座 ê 距離，差不多是 3000 萬光年左右。 伊嘛去予編做 NGC 5055，這个雄偉 ê 島宇宙 差不多有 10 萬光年大，kah 咱 銀河 ê 大細是差不多。 這个星系有明亮 ê 星系核 kah 雄偉 ê 捲螺仔手骨，所以伊才會提著一个足奅 ê 名，日頭花星系。 這張感光特別深 ê 相片，嘛有翕著較暗 ê 弧形 恆星流，流 tùi 星系暈 內底去。 這个恆星流 ùi 星系中心延伸出去，一直到 18 萬光年遠 ê 所在。 這敢若是 M63 ê 衛星星系 去予潮汐力 搝甲弄家散宅 ê 殘骸。 M63 ê 其他衛星星系嘛會當 tī 這張出色 ê 闊幅影像 內底揣著。 像一寡較暗 ê 矮星系，嘛會 tī 紲落來幾若十億年 ê 時間內，變做 M63 ê 恆星流 ê 一部份。

[POJ] Khiû-mô͘ ê Kńg-lê-á Seng-hē M63

Messier 63 sī tī pak-thian chi̍t-ê chiok kng ê kńg-lê-á seng-hē. I kah hù-kīn hit-ê tiong-sim ê seng-chō La̍h-khián-chō ê kū-lī, chha-put-to sī 3000 bān kng-nî chò-ûi. I mā khì hô͘ pian chòe NGC 5055, chit-ê hiông-úi ê tó-ú-tiū chha-put-to ū 10 bān kng-nî tōa, kah lán Gûn-hô ê tōa-sòe sī chha-put-to. Chit-ê seng-hē ū bêng-liōng ê seng-hē-he̍k kah hiông-úi ê kńg-lê-á chhiú-kut, só͘-í i chiah ē the̍h-tio̍h chi̍t-ê chiok phāⁿ ê miâ, Ji̍t-thâu-hoe seng-hē. Chit-tiuⁿ kám-kng te̍k-pia̍t chhim ê siòng-phìⁿ, mā ū hip-tio̍h khah àm ê hô͘-hêng hêng-chhiⁿ-liû, lâu tùi seng-hē-n̄g lāi-té khì. Chit-ê hêng-chhiⁿ-liû ùi seng-hē tiong-sim iân-sin chhut-khì, it-ti̍t kàu 18 bān kng-nî hn̄g ê só͘-chāi. Che ká-ná sī M63 ê ūi-chhiⁿ-seng-hē khì hô͘ tiâu-se̍k-le̍k giú kah lōng-ke-sòaⁿ-the̍h ê chân-hâi. M63 ê kî-tha ūi-chhiⁿ-seng-hē mā ē-tàng tī chit-tiuⁿ chhut-sek ê khoah-ba̍k iáⁿ-siōng lāi-té chhōe–tio̍h. Chhiūⁿ chi̍t-kóa khah àm ê é-seng-hē, mā ē tī sòa-lo̍h-lâi kúi-ā cha̍p-ek nî ê sî-kan lāi, piàn-chòe M63 ê hêng-chhiⁿ-liû ê chi̍t-pō͘-hūn.

[KIP] Khiû-môo ê Kńg-lê-á Sing-hē M̌3

Messier 63 sī tī pak-thian tsi̍t-ê tsiok kng ê kńg-lê-á sing-hē. I kah hù-kīn hit-ê tiong-sim ê sing-tsō La̍h-khián-tsō ê kū-lī, tsha-put-to sī 3000 bān kng-nî tsò-uî. I mā khì hôo pian tsuè NGC 5055, tsit-ê hiông-uí ê tó-ú-tiū tsha-put-to ū 10 bān kng-nî tuā, kah lán Gûn-hô ê tuā-suè sī tsha-put-to. Tsit-ê sing-hē ū bîng-liōng ê sing-hē-hi̍k kah hiông-uí ê kńg-lê-á tshiú-kut, sóo-í i tsiah ē the̍h-tio̍h tsi̍t-ê tsiok phānn ê miâ, Ji̍t-thâu-hue sing-hē. Tsit-tiunn kám-kng ti̍k-pia̍t tshim ê siòng-phìnn, mā ū hip-tio̍h khah àm ê hôo-hîng hîng-tshinn-liû, lâu tuì sing-hē-n̄g lāi-té khì. Tsit-ê hîng-tshinn-liû uì sing-hē tiong-sim iân-sin tshut-khì, it-ti̍t kàu 18 bān kng-nî hn̄g ê sóo-tsāi. Tse ká-ná sī M̌3 ê uī-tshinn-sing-hē khì hôo tiâu-si̍k-li̍k giú kah lōng-ke-suànn-the̍h ê tsân-hâi. M̌3 ê kî-tha uī-tshinn-sing-hē mā ē-tàng tī tsit-tiunn tshut-sik ê khuah-ba̍k iánn-siōng lāi-té tshuē–tio̍h. Tshiūnn tsi̍t-kuá khah àm ê é-sing-hē, mā ē tī suà-lo̍h-lâi kuí-ā tsa̍p-ik nî ê sî-kan lāi, piàn-tsuè M̌3 ê hîng-tshinn-liû ê tsi̍t-pōo-hūn.

[English] Curly Spiral Galaxy M63

A bright spiral galaxy of the northern sky, Messier 63 is nearby, about 30 million light-years distant toward the loyal constellation Canes Venatici. Also cataloged as NGC 5055, the majestic island universe is nearly 100,000 light-years across, about the size of our own Milky Way. Its bright core and majestic spiral arms lend the galaxy its popular name, The Sunflower Galaxy. This exceptionally deep exposure also follows faint, arcing star streams far into the galaxy’s halo. Extending nearly 180,000 light-years from the galactic center the star streams are likely remnants of tidally disrupted satellites of M63. Other satellite galaxies of M63 can be spotted in the remarkable wide-field image, including faint dwarf galaxies, which could contribute to M63’s star streams in the next few billion years.

詞彙學習（漢羅/POJ/KIP/華語/English）

• 【M63】M la̍k-cha̍p-saⁿ/M la̍k-tsa̍p-sann/M63/M63
• 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
• 【獵犬座】La̍h-khián-chō/La̍h-khián-tsō/獵犬座/Canes Venatici
• 【島宇宙】tó-ú-tiū/tó-ú-tiū/島宇宙/island universe
• 【銀河系】Gûn-hô/Gûn-hô/銀河/the Milky Way
• 【捲螺仔手骨】kńg-lê-á chhiú-kut/kńg-lê-á tshiú-kut/旋臂/spiral arms
• 【星系核】seng-hē-he̍k/sing-hē-hi̍k/星系核/galactic core
• 【日頭花星系】Ji̍t-thâu-hoe seng-hē/Ji̍t-thâu-hue sing-hē/向日葵星系/the Sunflower Galaxy
• 【恆星流】hêng-chhiⁿ-liû/hîng-tshinn-liû/恆星流/star streams
• 【星系暈】seng-hē-n̄g/sing-hē-n̄g/星系暈/galatic halo
• 【潮汐力】tiâu-se̍k-le̍k/tiâu-si̍k-li̍k/潮汐力/tidal force
• 【衛星星系】ūi-chhiⁿ-seng-hē/tiâu-si̍k-li̍k/衛星星系/satellite galaxies
• 【矮星系】é-seng-hē/é-sing-hē/矮星系/dwarf galaxies
• 【闊幅】khoah-pak/khuah-pak/廣角/wide-field