太陽烏子 kah 光橋

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Sunspot with Light Bridge
• 影像來源 kah 版權：Mark Johnston
• 予你 ê 天頂禮物：你 ê APOD 生日相片是佗一張？ (post 1995)
• 台文翻譯：An-Li Tsai (NCU)

[漢羅] 太陽烏子 kah 光橋

是按怎太陽表面有一葩較烏？ 這張是 太陽烏子 ê 特寫相片，是太陽表面 naih--lòe ê 部份，伊 ê 溫度較低、kah 太陽表面其他所在比起來較無遐爾光。 太陽複雜 ê 磁場 會製造這寡低溫區，是因為這搭阻止了高溫物質走入來烏子內底。 太陽烏子 有可能比地球閣較大，一般講來是會活一禮拜左右。 活跳區 AR 3297 有一部份會 tī 5 月初 ê 時陣出現 tī 太陽 表面。 較倚下面彼个大型 ê 太陽烏子頂懸有一條足明顯 ê 光橋，是浮 tī 頂懸 ê 高溫氣體組成--ê。 Tī 這張懸解析度相片內底，咱嘛會當清楚看著 太陽表面 規片 ê 氣泡，面頂攏是一包一包獨立 ê 高溫氣體包。 這款氣體包咱 kā 叫做 米粒組織。 太陽米粒組織 ê 大細差不多有 1000 公里大，毋過干焦會 擋 15 分鐘久爾爾。

[POJ] Thài-iông-o͘-chú kah Kng-kiô

Sī án-ná Thài-iông piáu-bīn ū chi̍t-pha khah o͘? Chit-tiuⁿ sī thài-iông-o͘-chú ê te̍k-siá siòng-phìⁿ, sī Thài-iông piáu-bīn naih--lòe ê pō͘-hūn, i ê un-tō͘ khah kē, kah Thài-iông piáu-bīn kî-tha só͘-chāi pí--khí-lâi khah bô hiah-nī kng. Thài-iông ho̍k-cha̍p ê chû-tiûⁿ ē chè-chō chit-kóa kē-un-khu, sī in-ūi chit-tah chó͘-chí liáu ko-un bu̍t-chit cháu-ji̍p-lâi o͘-chú lāi-té. Thài-iông-o͘-chú ū khó-lêng pí Tē-kiû koh khah tōa, it-poaⁿ kóng-lâi sī ē oa̍h chi̍t lé-pài chó-iū. Oa̍h-thiàu-khu AR 3297 ū chi̍t-pō͘-hūn ē tī 5 ge̍h chhoe ê sî-chūn chhut-hiān tī Thài-iông piáu-bīn. Khah óa ē-bīn hit-ê tōa-hêng ê thài-iông-o͘-chú téng-koân ū chi̍t-tiâu chiok bêng-hián ê kng-kiô, sī phû tī téng-koân ê ko-un khì-thé cho͘-sêng--ê. Tī chit-tiuⁿ koân-kái-sek-tô͘ siòng-phìⁿ lāi-té, lán mā ē-tàng chheng-chhó khòaⁿ-tio̍h Thài-iông piáu-bīn kui-phìⁿ ê khì-phàu, bīn-téng lóng sī chi̍t-pau-chi̍t-pau to̍k-li̍p ê ko-un khì-thé-pau. Chit-khoán khì-thé-pau lán kā kiò-chòe bí-lia̍p-cho͘-chit. Thài-iông bí-lia̍p-cho͘-chit ê tōa-sè chha-put-to ū 1000 kong-lí tōa, m̄-koh kan-na ē tòng 15 hun-chú kú niā-niā.

[KIP] Thài-iông-oo-tsú kah Kng-kiô

Sī án-ná Thài-iông piáu-bīn ū tsi̍t-pha khah oo? Tsit-tiunn sī thài-iông-oo-tsú ê ti̍k-siá siòng-phìnn, sī Thài-iông piáu-bīn naih--luè ê pōo-hūn, i ê un-tōo khah kē, kah Thài-iông piáu-bīn kî-tha sóo-tsāi pí--khí-lâi khah bô hiah-nī kng. Thài-iông ho̍k-tsa̍p ê tsû-tiûnn ē tsè-tsō tsit-kuá kē-un-khu, sī in-uī tsit-tah tsóo-tsí liáu ko-un bu̍t-tsit tsáu-ji̍p-lâi oo-tsú lāi-té. Thài-iông-oo-tsú ū khó-lîng pí Tē-kiû koh khah tuā, it-puann kóng-lâi sī ē ua̍h tsi̍t lé-pài tsó-iū. Ua̍h-thiàu-khu AR 3297 ū tsi̍t-pōo-hūn ē tī 5 ge̍h tshue ê sî-tsūn tshut-hiān tī Thài-iông piáu-bīn. Khah uá ē-bīn hit-ê tuā-hîng ê thài-iông-oo-tsú tíng-kuân ū tsi̍t-tiâu tsiok bîng-hián ê kng-kiô, sī phû tī tíng-kuân ê ko-un khì-thé tsoo-sîng--ê. Tī tsit-tiunn kuân-kái-sik-tôo siòng-phìnn lāi-té, lán mā ē-tàng tshing-tshó khuànn-tio̍h Thài-iông piáu-bīn kui-phìnn ê khì-phàu, bīn-tíng lóng sī tsi̍t-pau-tsi̍t-pau to̍k-li̍p ê ko-un khì-thé-pau. Tsit-khuán khì-thé-pau lán kā kiò-tsuè bí-lia̍p-tsoo-tsit. Thài-iông bí-lia̍p-tsoo-tsit ê tuā-sè tsha-put-to ū 1000 kong-lí tuā, m̄-koh kan-na ē tòng 15 hun-tsú kú niā-niā.

[English] Sunspot with Light Bridge

Why would a small part of the Sun appear slightly dark? Visible is a close-up picture of sunspots, depressions on the Sun's surface that are slightly cooler and less bright than the rest of the Sun. The Sun's complex magnetic field creates these cool regions by inhibiting hot material from entering the spots. Sunspots can be larger than the Earth and typically last for about a week. Part of active region AR 3297 crossing the Sun in early May, the large lower sunspot is spanned by an impressive light bridge of hot and suspended solar gas. This high-resolution picture also shows clearly that the Sun's surface is a bubbling carpet of separate cells of hot gas. These cells are known as granules. A solar granule is about 1000 kilometers across and lasts for only about 15 minutes.

詞彙學習