暗頭仔花

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Twilight in a Flower
• 影像來源 kah 版權：Dario Giannobile
• 台文翻譯：An-Li Tsai (NCU)

[漢羅] 暗頭仔花

這張 有創意 ê 縮時攝影天景，是 kā 16 擺 ê 感光 轉做 花瓣，展示 ùi 日時到暗暝 ê 時間變化。 Ùi 頂懸開始、倒剾方向來看，天色是 ùi 天拄暗 轉做紺色，這看起來就親像是一蕊花。 每一張感光攏是 tī 4 月 22 暗頭仔 翕–ê。 欲按怎翕，有先算過，按呢翕出來 ê 光線 kah 色彩才會齊勻。 彼工 tī 西爿地平線附近，月眉 kah 金星是天頂上光 ê 指標天體。 花瓣 ùi 頂一瓣到後一瓣，這兩粒天體那就踅入去花 ê 中心。 這蕊暗頭仔花 中央剪影 ê 部份，是 意大利 Sicily 島 Argimusco 高原 ê 大粒岩石。

[POJ] Àm-thâu-á-hoe

Chit tiuⁿ ū chhòng-ì ê sok-sî-liap-iáⁿ thian-kéng, sī kā 16 pái ê kám-kng choán chò hoe-bān, tián-sī ùi ji̍t-sî kàu àm-mî ê sî-kan piàn-hòa. Ùi téng-koân khai-sí, tò-khau hong-hiòng lâi khòaⁿ, thiⁿ-sek sī ùi thiⁿ-tú-àm choán-chò khóng-sek, che khòaⁿ–khí-lâi to̍h chhin-chhiūⁿ sī chi̍t lúi hoe. Múi chi̍t tiuⁿ kám-kng lóng sī tī 4 goe̍h 22 àm-thâu-á hip–ê. Be̍h án-ná hip, ū seng sǹg–kòe, án-ni hip–chhut-lâi ê kng-sòaⁿ kah sek-chhái chiah ē chiâu-ûn. Hit kang tī sai-pêng tē-pêng-sòaⁿ hù-kīn, goe̍h-bâi kah Kim-chhiⁿ sī thiⁿ-téng siōng kng ê chí-piau thian-thé. Hoe-bān ùi téng chi̍t bān kàu āu chi̍t bān, chit nn̄g lia̍p thian-thé to̍h ná se̍h ji̍p-khì hoe ê tiong-sim. Chit lúi àm-thâu-á-hoe tiong-ng chián-iáⁿ ê pō͘-hūn, sī I-tá-lī Sicily tó Argimusco ko-goân ê tōa-lia̍p giâm-chio̍h.

[KIP] Àm-thâu-á-hue

Tsit tiunn ū tshòng-ì ê sok-sî-liap-iánn thian-kíng, sī kā 16 pái ê kám-kng tsuán tsò hue-bān, tián-sī uì ji̍t-sî kàu àm-mî ê sî-kan piàn-huà. Uì tíng-kuân khai-sí, tò-khau hong-hiòng lâi khuànn, thinn-sik sī uì thinn-tú-àm tsuán-tsò khóng-sik, tse khuànn–khí-lâi to̍h tshin-tshiūnn sī tsi̍t luí hue. Muí tsi̍t tiunn kám-kng lóng sī tī 4 gue̍h 22 àm-thâu-á hip–ê. Be̍h án-ná hip, ū sing sǹg–kuè, án-ni hip–tshut-lâi ê kng-suànn kah sik-tshái tsiah ē tsiâu-ûn. Hit kang tī sai-pîng tē-pîng-suànn hù-kīn, gue̍h-bâi kah Kim-tshinn sī thinn-tíng siōng kng ê tsí-piau thian-thé. Hue-bān uì tíng tsi̍t bān kàu āu tsi̍t bān, tsit nn̄g lia̍p thian-thé to̍h ná se̍h ji̍p-khì hue ê tiong-sim. Tsit luí àm-thâu-á-hue tiong-ng tsián-iánn ê pōo-hūn, sī I-tá-lī Sicily tó Argimusco ko-guân ê tuā-lia̍p giâm-tsio̍h.

[English] Twilight in a Flower

Transformed into the petals of a flower, 16 exposures show the passage of day into night in this creative timelapse skyscape. Start at the top and move counterclockwise to follow consecutive moments as the twilight sky turns an ever darker blue and night blossoms. Each exposure was recorded on the evening of April 22, calculated to maintain a consistent balance of light and color. Close to the western horizon on that date, a crescent Moon and Venus are the two brightest celestial beacons. Petal to petal the pair spiral closer to the flower’s center. In silhouette around the center of the twilight flower are Sicily’s megalithic rocks of Argimusco.

詞彙學習（漢羅/POJ/KIP/華語/English）

• 【縮時攝影】sok-sî-liap-iáⁿ/sok-sî-liap-iánn/縮時攝影/timelapse
• 【倒剾】tò-khau/tò-khau/逆時針/counterclockwise
• 【紺色】khóng-sek/khóng-sik/深藍色/dark blue
• 【花瓣】hoe-bān/hue-bān/花瓣/petal
• 【剪影】chián-iáⁿ/tsián-iánn/剪影/silhouette
• 【月眉】goe̍h-bâi/gue̍h-bâi/新月/crescent
• 【金星】Kim-chhiⁿ/Kim-tshinn/金星/Venus
• 【暗頭仔】àm-thâu-á/àm-thâu-á/傍晚/evening
• 【指標天體】chí-piau thian-thé/tsí-piau thian-thé/指標天體/celestial beacon
• 【地平線】tē-pêng-sòaⁿ/tē-pîng-suànn/地平線/horizon
• 【意大利】I-tá-lī/I-tá-lī/義大利/Italy
• 【高原】ko-goân/ko-guân/高原/plateau