烏影 Kha-mé-lah 翕著 ê Shackleton 隕石坑

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Shackleton from ShadowCam
• 影像來源：NASA, ShadowCam, Korea Aerospace Research Institute, Arizona State University
• 台文翻譯：An-Li Tsai (NCU)

[漢羅] 烏影 Kha-mé-lah 翕著 ê Shackleton 隕石坑

這是 tī 月球南極 ê Shackleton 隕石坑 。 隕石坑 內底直徑 21 公里 ê 山尖，是照會著光 ê 部份，毋過坑底就是 永暗區 矣。 這張有翕著 Shackleton 隕石坑 坑墘 kah 坑底 ê 影像 是 NASA ShadowCam Kha-mé-lah 翕--ê，這是一台鬥 tī 2022 年 8 月發射 ê 韓國月球揣路者軌道衛星 (KPLO) 頂懸 ê 儀器。 烏影 Kha-mé-lah 是設計欲來翕月球表面 ê 永暗區，伊 ê 敏感度是比 月球探測軌道衛星 ê 狹頻角度 Kha-mé-lah 較懸 200 倍。 因為這寡所在無去予日光直接照著，所以咱想講遮可能會是 水冰 抑是 其他揮發物質 ê 倉庫。 這可能是古早時代 kah 彗星相挵 紮--來--ê，這 tùi 未來 ê 月球任務是足有路用--ê 物件。 是講，這个永暗區嘛是會因為 附近 ê 月球地形 反射日光，才會照著光。 Tī 這張 有足詳細細節 ê 烏影 Kha-mé-lah 影像 內底，有一个箭頭 指出 一粒 ùi Shackleton 隕石坑 坑墘 kō 落來 ê 石頭。 這幅圖 ê 比例尺就 tī 圖 ê 上下底。

[POJ] O͘-iáⁿ Kha-mé-lah hip-tio̍h Shackleton chio̍h-thâu

Che sī tī Goe̍h-kiû lâm-ke̍k ê Shackleton ún-se̍k-kheⁿ. Ún-se̍k-kheⁿ lāi-té ti̍t-kèng 21 kong-lí ê soaⁿ-chiam, sī chiò ē-tio̍h kng ê pō͘-hūn, m̄-koh kheⁿ-té to̍h sī éng-àm-khu ah. Chit-tiuⁿ ū hip-tio̍h Shackleton ún-se̍k-kheⁿ kheⁿ-kîⁿ kah kheⁿ-té ê eng-hiông sī NASA ShadowCam Kha-mé-lah hip--ê, che sī chi̍t-tâi tàu tī 2022 nî 8 goe̍h hoat-siā ê Hân-kok Goe̍h-kiû Chhōe-lō͘-chiá Kúi-tō-ōe-chheⁿ (KPLO) téng-koân ê gî-khì. O͘-iáⁿ Kha-mé-lah sī siat-kè beh lâi hip Goe̍h-kiû piáu-bīn chit-ê éng-àm-khu, i ê bín-kám-tō͘ sī pí Goe̍h-kiû Thàm-chhek Kúi-tō-ōe-chheⁿ ê E̍h-pîn-kak-tō͘ Kha-mé-lah khah koân 200 pōe. In-ūi chit-kóa só͘-chāi bô khì hō͘ ji̍t-kng ti̍t-chiap chiò--tio̍h, só͘-í lán siuⁿ kóng chiah khó-lêng ē sī chúi peng ia̍h-sī kî-tha hui-hoat-bu̍t-chit ê chhng-khò͘. Che khó-lêng sī kó͘-chá sî-tāi kah hūi-chheⁿ sio-lòng chah--lâi--ê, che tùi bī-lâi ê Goe̍h-kiû Jīm-bū sī chiok ū lō͘-iōng--ê mi̍h-kiāⁿ. Sī kóng, chit-ê éng-àm-khu mā sī ē in-ūi hù-kīn ê Goe̍h-kiû tē-hêng hoán-siā ji̍t-kng, chiah ē chiò tio̍h kng. Tī chit-tiuⁿ ū siông-sè sè-chiat ê O͘-iáⁿ Kha-mé-lah iáⁿ-siōng lāi-té, ū chi̍t-ê chìⁿ-thâu chí-chhut chi̍t-lia̍p ùi Shackleton ún-se̍k-kheⁿ kheⁿ-kîⁿ kō--lo̍h-lâi ê chio̍h-thâu. Chit-pak-tô͘ ê pí-lē-chhioh to̍h tī tô͘ ê siōng ē-té.

[KIP] Oo-iánn Kha-mé-lah hip-tio̍h Shackleton tsio̍h-thâu

Tse sī tī Gue̍h-kiû lâm-ki̍k ê Shackleton ún-si̍k-khenn. Ún-si̍k-khenn lāi-té ti̍t-kìng 21 kong-lí ê suann-tsiam, sī tsiò ē-tio̍h kng ê pōo-hūn, m̄-koh khenn-té to̍h sī íng-àm-khu ah. Tsit-tiunn ū hip-tio̍h Shackleton ún-si̍k-khenn khenn-kînn kah khenn-té ê ing-hiông sī NASA ShadowCam Kha-mé-lah hip--ê, tse sī tsi̍t-tâi tàu tī 2022 nî 8 gue̍h huat-siā ê Hân-kok Gue̍h-kiû Tshuē-lōo-tsiá Kuí-tō-uē-tshenn (KPLO) tíng-kuân ê gî-khì. Oo-iánn Kha-mé-lah sī siat-kè beh lâi hip Gue̍h-kiû piáu-bīn tsit-ê íng-àm-khu, i ê bín-kám-tōo sī pí Gue̍h-kiû Thàm-tshik Kuí-tō-uē-tshenn ê E̍h-pîn-kak-tōo Kha-mé-lah khah kuân 200 puē. In-uī tsit-kuá sóo-tsāi bô khì hōo ji̍t-kng ti̍t-tsiap tsiò--tio̍h, sóo-í lán siunn kóng tsiah khó-lîng ē sī tsuí ping ia̍h-sī kî-tha hui-huat-bu̍t-tsit ê tshng-khòo. Tse khó-lîng sī kóo-tsá sî-tāi kah huī-tshenn sio-lòng tsah--lâi--ê, tse tuì bī-lâi ê Gue̍h-kiû Jīm-bū sī tsiok ū lōo-iōng--ê mi̍h-kiānn. Sī kóng, tsit-ê íng-àm-khu mā sī ē in-uī hù-kīn ê Gue̍h-kiû tē-hîng huán-siā ji̍t-kng, tsiah ē tsiò tio̍h kng. Tī tsit-tiunn ū siông-sè sè-tsiat ê Oo-iánn Kha-mé-lah iánn-siōng lāi-té, ū tsi̍t-ê tsìnn-thâu tsí-tshut tsi̍t-lia̍p uì Shackleton ún-si̍k-khenn khenn-kînn kō--lo̍h-lâi ê tsio̍h-thâu. Tsit-pak-tôo ê pí-lē-tshioh to̍h tī tôo ê siōng ē-té.

[English] Shackleton from ShadowCam

Shackleton crater lies at the lunar south pole. Peaks along the 21 kilometer diameter are in sunlight, but Shackleton's floor is in dark permanent shadow. Still, this image of the shadowed rim wall and floor of Shackleton crater was captured from NASA's ShadowCam, an instrument on board the Korea Pathfinder Lunar Orbiter (KPLO) launched in August 2022. About 200 times more sensitive than, for example, the Lunar Reconnaissance Orbiter's Narrow Angle Camera, ShadowCam was designed image the permanently shadowed regions of the lunar surface. Avoiding direct sunlight, those regions are expected to be reservoirs of water-ice and other volatiles deposited by ancient cometary impacts and useful to future Moon missions. Of course, the permanently shadowed regions are still illuminated by reflections of sunlight from nearby lunar terrain. In this stunningly detailed ShadowCam image, an arrow marks the track made by a single boulder rolling down Shackleton crater's wall. The image scale is indicated at the bottom of the frame.

詞彙學習