火星頂懸 ê 平岩石山

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Flat Rock Hills on Mars
• 影像來源 kah 版權：NASA, JPL-Caltech, MSSS; 資料處理：Neville Thompson
• 台文翻譯：An-Li Tsai (NCU)

[漢羅] 火星頂懸 ê 平岩石山

是按怎火星頂懸有遮爾濟平平 ê 岩石？ 火星 頂懸有一寡平原 kah 山崙 ê 頂懸有足濟岩石，kah 咱地球比起來，看起來是有較平。 其中一个理由，應該就是火星 kah 地球頂懸攏足捷看著 ê 侵蝕作用。 火星頂懸 ê 二酸化炭素 風，tùi 有較大粒 火星沙塗 ê 所在吹過 ê 時陣，就敢若沙紙仝款。 這寡沙會製造無仝程度 ê 侵蝕，予 一寡岩石 表面變甲較光滑，嘛會予一寡長期 chhāi tī 遐 ê 石頭 ui 去。 這張相片 是頂個月 NASA 好奇號探測車 tī 火星翕–ê，內底有 幾若粒山，山頂攏是這款較平 ê 岩石。 這台機器人探測車已經 tī 火星頂懸行十年矣，而且幫贊咱 了解咱 ê 厝邊行星足濟細節，比論講過去較澹 較有風 ê 環境是生做按怎。 好奇號翕 這寡相片 了後，紲落來會較細膩行過石頭 kah 滑溜 ê 沙，去 peh 一个叫做 標誌環谷 ê 所在。

[POJ] Hóe-chheⁿ téng-koân ê Pêⁿ-giâm-chio̍h-soaⁿ

Sī án-ná Hóe-chheⁿ téng-koân ū chiah-nī chōe pêⁿ-pêⁿ ê giâm-chio̍h? Hóe-chheⁿ téng-koân ū chi̍t-kóa pêng-goân kah soaⁿ-lūn ê téng-koân ū chiok-chōe giâm-chio̍h, kah lán Tē-kiû pí–khí-lâi, khòaⁿ–khí-lâi sī ū khah pêⁿ. Kî-tiong chi̍t-ê lí-iû, èng-kai to̍h sī Hóe-chheⁿ kah Tē-kiû téng-koân lóng chiok chia̍p khòaⁿ-tio̍h ê chhim-sit chok-iōng. Hóe-chheⁿ téng-koân ê jī-sng-hòa-thòaⁿ-sò͘ hong, tùi ū khah tōa-lia̍p Hóe-chheⁿ soa-thô͘ ê só͘-chāi chhoe–kòe ê sî-chūn, to̍h ká-ná soa-chóa kāng-khoán. Chit-kóa soa ē chè-chō bô-kâng thêng-tō͘ ê chhim-sit, hō͘ chi̍t-kóa giâm-chio̍h piáu-bīn piàn kah khah kng-ku̍t, mā ē hō͘ chi̍t-kóa tn̂g-kî chhāi tī hiah ê chio̍h-thâu ui–khì. Chit-tiuⁿ siòng-phìⁿ sī téng kò-goe̍h NASA Hóⁿ-kî-hō thàm-chhek-chhia tī Hóe-chheⁿ hip–ê, lāi-té ū kúi-ā lia̍p soaⁿ, soaⁿ-téng lóng sī chit-khoán khah pêⁿ ê giâm-chio̍h. Chit-tâi ki-khì-lâng thàm-chhek-chhia í-keng tī Hóe-chheⁿ téng-koân kiâⁿ cha̍p nî ah, jî-chhiáⁿ pang-chān lán liáu-kái lán ê chhù-piⁿ kiâⁿ-chheⁿ chiok-chōe sè-chiat, pí-lūn kóng kòe-khì khah tâm khah ū-hong ê khoân-kéng sī seⁿ chò án-ná. Hóⁿ-kî-hō thàm-chhek-chhia hip chit-kóa siòng-phìⁿ liáu-āu, sòa-lo̍h-lâi ē khah sè-lī kiâⁿ-kòe chio̍h-thâu kah ku̍t-liu ê soa, khì peh chi̍t-ê kiò-chò Piau-chì-khoân-kok ê só͘-chāi.

[KIP] Hué-tshenn tíng-kuân ê Pênn-giâm-tsio̍h-suann

Sī án-ná Hué-tshenn tíng-kuân ū tsiah-nī tsuē pênn-pênn ê giâm-tsio̍h? Hué-tshenn tíng-kuân ū tsi̍t-kuá pîng-guân kah suann-lūn ê tíng-kuân ū tsiok-tsuē giâm-tsio̍h, kah lán Tē-kiû pí–khí-lâi, khuànn–khí-lâi sī ū khah pênn. Kî-tiong tsi̍t-ê lí-iû, ìng-kai to̍h sī Hué-tshenn kah Tē-kiû tíng-kuân lóng tsiok tsia̍p khuànn-tio̍h ê tshim-sit tsok-iōng. Hué-tshenn tíng-kuân ê jī-sng-huà-thuànn-sòo hong, tuì ū khah tuā-lia̍p Hué-tshenn sua-thôo ê sóo-tsāi tshue–kuè ê sî-tsūn, to̍h ká-ná sua-tsuá kāng-khuán. Tsit-kuá sua ē tsè-tsō bô-kâng thîng-tōo ê tshim-sit, hōo tsi̍t-kuá giâm-tsio̍h piáu-bīn piàn kah khah kng-ku̍t, mā ē hōo tsi̍t-kuá tn̂g-kî tshāi tī hiah ê tsio̍h-thâu ui–khì. Tsit-tiunn siòng-phìnn sī tíng kò-gue̍h NASA Hónn-kî-hō thàm-tshik-tshia tī Hué-tshenn hip–ê, lāi-té ū kuí-ā lia̍p suann, suann-tíng lóng sī tsit-khuán khah pênn ê giâm-tsio̍h. Tsit-tâi ki-khì-lâng thàm-tshik-tshia í-king tī Hué-tshenn tíng-kuân kiânn tsa̍p nî ah, jî-tshiánn pang-tsān lán liáu-kái lán ê tshù-pinn kiânn-tshenn tsiok-tsuē sè-tsiat, pí-lūn kóng kuè-khì khah tâm khah ū-hong ê khuân-kíng sī senn tsò án-ná. Hónn-kî-hō thàm-tshik-tshia hip tsit-kuá siòng-phìnn liáu-āu, suà-lo̍h-lâi ē khah sè-lī kiânn-kuè tsio̍h-thâu kah ku̍t-liu ê sua, khì peh tsi̍t-ê kiò-tsò Piau-tsì-khuân-kok ê sóo-tsāi.

[English] Flat Rock Hills on Mars

Why are there so many flat rocks on Mars? Some views of plains and hills on Mars show many rocks that are unusually flat when compared to rocks on Earth. One reason for this is a process that is common to both Mars and Earth: erosion. The carbon-dioxide wind on Mars can act like sandpaper when it blows around gritty Martian sand. This sand can create differential erosion, smoothing over some rocks, while wearing down the tops of other long-exposed stones. The featured image capturing several hills covered with flat-topped rocks was taken last month by NASA’s Curiosity Rover on Mars. This robotic rover has now been rolling across Mars for ten years and has helped uncover many details of the wet and windy past of Earth’s planetary neighbor. After taking this and other images, Curiosity carefully navigated stones and slippery sand to climb up Marker Band Valley.

詞彙學習（漢羅/POJ/KIP/華語/English）

• 【火星】Hóe-chheⁿ/Hué-tshenn/火星/Mars
• 【侵蝕】chhim-sit/tshim-sit/侵蝕/erosion
• 【二酸化炭素】jī-sng-hòa thòaⁿ-sò͘/jī-sng-huà thuànn-sòo/二氧化碳/carbon-dioxide
• 【沙紙】soa-chóa/sua-tsuá/沙紙/sandpaper
• 【好奇號探測車】Hóⁿ-kî-hō thàm-chhek-chhia/Hónn-kî-hō thàm-tshik-tshia/好奇號探測車/Curiosity Rover
• 【標誌環谷】Piau-chì-khoân-kok/Piau-tsì-khuân-kok/標誌環谷/Marker Band Valley