北船底座星雲

Page(/daily/2023/05/20230501)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 北船底座星雲

大型 ê 船底座星雲 in 兜 有奇怪 ê 恆星 kah 標誌性 ê 星雲。 這个星雲是照伊 徛起 ê 星座號名–ê。 這个大型恆星形成區是比 大型 ê 獵戶座星雲 較大嘛較光。 毋過伊較無遐爾有名,這是因為伊 tiàm 南天,毋過 大部份 ê 人攏蹛 tiàm 北半球這張影像 內底有翕著足濟 船底座星雲 上北爿 ê 細節。 影像倒爿下跤是 Gabriela Mistral 星雲,內底有 發射星雲 IC 2599,伊 ê 發光氣體是踅 tī 較細 ê 開放星團 NGC 3324 外沿。 影像中央頂懸 是較大 ê 星團 NGC 3293,伊 ê 正爿是發射星雲 Loden 153。 毋過 船底座 上有名 ê 成員 是無出現 tī 遮。 伊 tī 影像正爿下跤 較出去 ê 所在,是較光、無穩定、而且注定欲死亡 ê 恆星,叫做 船底座 η。 這粒以前捌是 天頂上光 ê 恆星,毋過這馬科學家預測講,伊會 tī 未來幾若百萬年 ê 時間內,用 超新星 爆炸 ê 方式結束伊 ê 性命。

[POJ] Pak Chûn-té-chō Seng-hûn

Tōa-hêng ê Chûn-té-chō seng-hûn in tau ū kî-koài ê hêng-chhiⁿ kah piau-chì sèng ê seng-hûn. Chit-ê seng-hûn sī chiàu i khiā-khí ê seng-chō hō-miâ–ê. Chit-ê tōa-hêng hêng-chhiⁿ hêng-sêng-khu sī pí tōa-hêng ê La̍h-hō͘-chō seng-hûn khah tōa mā khah kng. M̄-koh i khah bô hiah-nī ū-miâ, che sī in-ūi i tiàm lâm-thian, m̄-koh tōa-pō͘-hūn ê lâng lóng tòa tiàm pak-pòaⁿ-kiû. Chit-tiuⁿ iáⁿ-siōng lāi-té ū hip-tio̍h chiok chōe Chûn-té-chō seng-hûn siōng pak-pêng ê sè-chiat. Iáⁿ-siōng tò-pêng ē-kha sī Gabriela Mistral seng-hûn, lāi-té ū hoat-siā-seng-hûn IC 2599, i ê hoat-kng khì-thé sī se̍h tī khah sè ê khai-hòng-seng-thoân NGC 3324 gōa-iân. Iáⁿ-siōng tiong-ng téng-koân sī khah tōa ê seng-thoân NGC 3293, i ê chiàⁿ-pêng sī hoat-siā-seng-hûn Loden 153. M̄-koh Chûn-té-chō siōng ū-miâ ê sêng-goân sī bô chhut-hiān tī chiah. I tī iáⁿ-siōng chiàⁿ-pêng ē-kha khah chhut-khì ê só͘-chāi, sī khah kng, bô ún-tēng, jî-chhiáⁿ chù-tēng beh sí-bông ê hêng-chhiⁿ, kiò-chò Chûn-té-chō Eta. Chit-lia̍p í-chêng bat sī thiⁿ-téng siōng kng ê hêng-chhiⁿ, m̄-koh chit-má kho-ha̍k-ka ū-chhek kóng, i ē tī bī-lâi kúi-ā pah bān nî ê sî-kan lāi, iōng chhiau-sin-seng po̍k-chà ê hong-sek kiat-sok i ê sìⁿ-miā.

[KIP] Pak Tsûn-té-tsō Sing-hûn

Tuā-hîng ê Tsûn-té-tsō sing-hûn in tau ū kî-kuài ê hîng-tshinn kah piau-tsì sìng ê sing-hûn. Tsit-ê sing-hûn sī tsiàu i khiā-khí ê sing-tsō hō-miâ–ê. Tsit-ê tuā-hîng hîng-tshinn hîng-sîng-khu sī pí tuā-hîng ê La̍h-hōo-tsō sing-hûn khah tuā mā khah kng. M̄-koh i khah bô hiah-nī ū-miâ, tse sī in-uī i tiàm lâm-thian, m̄-koh tuā-pōo-hūn ê lâng lóng tuà tiàm pak-puànn-kiû. Tsit-tiunn iánn-siōng lāi-té ū hip-tio̍h tsiok tsuē Tsûn-té-tsō sing-hûn siōng pak-pîng ê sè-tsiat. Iánn-siōng tò-pîng ē-kha sī Gabriela Mistral sing-hûn, lāi-té ū huat-siā-sing-hûn IC 2599, i ê huat-kng khì-thé sī se̍h tī khah sè ê khai-hòng-sing-thuân NGC 3324 guā-iân. Iánn-siōng tiong-ng tíng-kuân sī khah tuā ê sing-thuân NGC 3293, i ê tsiànn-pîng sī huat-siā-sing-hûn Loden 153. M̄-koh Tsûn-té-tsō siōng ū-miâ ê sîng-guân sī bô tshut-hiān tī tsiah. I tī iánn-siōng tsiànn-pîng ē-kha khah tshut-khì ê sóo-tsāi, sī khah kng, bô ún-tīng, jî-tshiánn tsù-tīng beh sí-bông ê hîng-tshinn, kiò-tsò Tsûn-té-tsō Eta. Tsit-lia̍p í-tsîng bat sī thinn-tíng siōng kng ê hîng-tshinn, m̄-koh tsit-má kho-ha̍k-ka ū-tshik kóng, i ē tī bī-lâi kuí-ā pah bān nî ê sî-kan lāi, iōng tshiau-sin-sing po̍k-tsà ê hong-sik kiat-sok i ê sìnn-miā.

[English] Carina Nebula North

The Great Carina Nebula is home to strange stars and iconic nebulas. Named for its home constellation, the huge star-forming region is larger and brighter than the Great Orion Nebula but less well known because it is so far south – and because so much of humanity lives so far north. The featured image shows in great detail the northernmost part of the Carina Nebula. On the bottom left is the Gabriela Mistral Nebula consisting of an emission nebula of glowing gas (IC 2599) surrounding the small open cluster of stars NGC 3324. Above the image center is the larger star cluster NGC 3293, while to its right is the emission nebula Loden 153. The most famous occupant of the Carina Nebula, however, is not shown. Off the image to the lower right is the bright, erratic, and doomed star known as Eta Carinae – a star once one of the brightest stars in the sky and now predicted to explode in a supernova sometime in the next few million years.

詞彙學習(漢羅/POJ/KIP/華語/English)

  • 【船底座星雲】Chûn-té-chō seng-hûn/Tsûn-té-tsō sing-hûn/船底座星雲/Carina Nebula
  • 【獵戶座星雲】La̍h-hō͘-chō seng-hûn/La̍h-hōo-tsō sing-hûn/獵戶座星雲/Orion Nebula
  • 【發射星雲】hoat-siā-seng-hûn/huat-siā-sing-hûn/發射星雲/emission nebula
  • 【開放星團】khai-hòng-seng-thoân/khai-hòng-sing-thuân/開放星團/open cluster
  • 【IC 2599】IC jī-ngó͘-kiú-kiú/IC jī-ngóo-kiú-kiú/IC 2599/IC 2599
  • 【NGC 3324】NGC sam-sam-jī-sù/NGC sam-sam-jī-sù/NGC 3324/NGC 3324
  • 【Loden 153】Loden it-ngó͘-sam/Loden it-ngóo-sam/Loden 153/Loden 153
  • 【船底座 η】Chûn-té-chō Eta/Tsûn-té-tsō Eta/船底座 η/Eta Carinae
  • 【超新星】chhiau-sin-seng/tshiau-sin-sing/超新星/supernova
  • 【超新星爆炸】chhiau-sin-seng po̍k-chà/tshiau-sin-sing po̍k-tsà/超新星爆炸/supernova explosion
  • 【Gabriela Mistral 星雲】Gabriela Mistral seng-hûn/Gabriela Mistral sing-hûn/加夫列拉·米斯特拉爾星雲/Gabriela Mistral Nebula

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:彩色 ê 土衛十二 Helene 明仔載 ê 圖:火星頂懸 ê 平岩石山