彩色 ê 土衛十二 Helene

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Saturn's Moon Helene in Color
• 影像來源：NASA, JPL-Caltech, SSI; 資料處理：Daniel Macháček
• 台文翻譯：An-Li Tsai (NCU)

[漢羅] 彩色 ê 土衛十二 Helene

雖罔講這个色彩毋是遐爾清楚，毋過土衛十二 Helene 毋管 tī 佗一款光線下底，攏是一个謎。 這張頭一擺 翕甲遮爾清楚 ê 土星 衛星，是踅土星 ê Cassini 機器人太空船 tī 2012 年 ê 時陣，衝 到 伊 kah 這粒 細細粒衛星 ê 距離賰無一粒地球直徑 ê 時陣翕--ê。 雖罔講有翕著定定 看著 ê 隕石坑 kah 山崙，這張 相片 閣有 翕著 傷平 ê 地形 kah 一逝一逝 ê 地形。 行星天文學家 這馬當 leh 檢查 這寡 Helene ê 詳細相片，就是為著欲 收集線索，通好研究這粒 30 公里大 ê 太空冰山 ê 起源 kah 演化。 Helene 實在是足特別--ê，因為伊踅土星 leh 行 ê 時陣，是行 tiàm 土星 ê 大粒衛星，土衛四 Dione ê 頭前。 伊行 tiàm 一个叫做 Lagrange 點 ê 穩定引力井 彼位。 目前有 4 粒 土星衛星 攏行 tiàm Lagrange 點，Helene 就是其中一粒。

[POJ] Chhái-sek ê Thó͘-ūi-cha̍p-jī Helene

Sui-bóng kóng chit-ê sek-chhái m̄-sī hiah-nī chheng-chhó, m̄-koh Thó͘-ūi-cha̍p-jī Helene m̄-koán tī to̍h chi̍t-khoán kng-sòaⁿ ē-té, lóng sī chi̍t-ê bê. Chit-tiuⁿ thâu-chi̍t-pái hip kah chiah-nī chheng-chhó ê Thó͘-chheⁿ-ūi-chheⁿ, sī se̍h Thó͘-chheⁿ ê Cassini ke-khì-lâng thài-khong-chûn tī 2012 nî ê sî-chūn, chhiong kàu i kah chit-lia̍p sè-sè-lia̍p ūi-chheⁿ ê kū-lī chhun bô chi̍t-lia̍p Tē-kiû ti̍t-kèng ê sî-chūn hip--ê. Sui-bóng kóng ū hip-tio̍h tiāⁿ-tiāⁿ khòaⁿ-ē-tio̍h ê ún-se̍k-kheⁿ kah soaⁿ-lūn, chit-tiuⁿ siòng-phìⁿ koh ū hip-tio̍h siuⁿ pêⁿ ê tē-hêng kah chi̍t-chōa chi̍t-chōa ê tē-hêng. Kiâⁿ-chheⁿ thian-bûn ha̍k-ka chit-má tng-leh kiám-cha chit-kóa Helene ê siông-sè siòng-phìⁿ, to̍h sī ūi-tio̍h beh siu-chi̍p sòaⁿ-soh, thang hó gián-kiù chit-lia̍p 30 kong-lí tōa ê thài-khong peng-soaⁿ ê khí-goân kah ián-hòa. Helene si̍t-chāi sī chiok te̍k-pia̍t--ê, in-ūi i se̍h Thó͘-chheⁿ leh kiâⁿ ê sî-chūn, sī kiâⁿ tiàm Thó͘-chheⁿ ê tōa-lia̍p ūi-chheⁿ, Thó͘-ūi-sì Dione ê thâu-chêng. I kiâⁿ tiàm chi̍t-ê kiò-chò Lagrange tiám ê ún-tēng ín-le̍k-chéⁿ hit-ūi. Bo̍k-chêng ū 4 lia̍p Thó͘-chheⁿ-ūi-chheⁿ lóng kiâⁿ tiàm Lagrange tiám, Helene to̍h sī kî-tiong chi̍t-lia̍p.

[KIP] Tshái-sik ê Thóo-uī-tsa̍p-jī Helene

Sui-bóng kóng tsit-ê sik-tshái m̄-sī hiah-nī tshing-tshó, m̄-koh Thóo-uī-tsa̍p-jī Helene m̄-kuán tī to̍h tsi̍t-khuán kng-suànn ē-té, lóng sī tsi̍t-ê bê. Tsit-tiunn thâu-tsi̍t-pái hip kah tsiah-nī tshing-tshó ê Thóo-tshenn-uī-tshenn, sī se̍h Thóo-tshenn ê Cassini ke-khì-lâng thài-khong-tsûn tī 2012 nî ê sî-tsūn, tshiong kàu i kah tsit-lia̍p sè-sè-lia̍p uī-tshenn ê kū-lī tshun bô tsi̍t-lia̍p Tē-kiû ti̍t-kìng ê sî-tsūn hip--ê. Sui-bóng kóng ū hip-tio̍h tiānn-tiānn khuànn-ē-tio̍h ê ún-si̍k-khenn kah suann-lūn, tsit-tiunn siòng-phìnn koh ū hip-tio̍h siunn pênn ê tē-hîng kah tsi̍t-tsuā tsi̍t-tsuā ê tē-hîng. Kiânn-tshenn thian-bûn ha̍k-ka tsit-má tng-leh kiám-tsa tsit-kuá Helene ê siông-sè siòng-phìnn, to̍h sī uī-tio̍h beh siu-tsi̍p suànn-soh, thang hó gián-kiù tsit-lia̍p 30 kong-lí tuā ê thài-khong ping-suann ê khí-guân kah ián-huà. Helene si̍t-tsāi sī tsiok ti̍k-pia̍t--ê, in-uī i se̍h Thóo-tshenn leh kiânn ê sî-tsūn, sī kiânn tiàm Thóo-tshenn ê tuā-lia̍p uī-tshenn, Thóo-uī-sì Dione ê thâu-tsîng. I kiânn tiàm tsi̍t-ê kiò-tsò Lagrange tiám ê ún-tīng ín-li̍k-tsénn hit-uī. Bo̍k-tsîng ū 4 lia̍p Thóo-tshenn-uī-tshenn lóng kiânn tiàm Lagrange tiám, Helene to̍h sī kî-tiong tsi̍t-lia̍p.

[English] Saturn's Moon Helene in Color

Although its colors may be subtle, Saturn's moon Helene is an enigma in any light. The moon was imaged in unprecedented detail in 2012 as the robotic Cassini spacecraft orbiting Saturn swooped to within a single Earth diameter of the diminutive moon. Although conventional craters and hills appear, the above image also shows terrain that appears unusually smooth and streaked. Planetary astronomers are inspecting these detailed images of Helene to glean clues about the origin and evolution of the 30-km across floating iceberg. Helene is also unusual because it circles Saturn just ahead of the large moon Dione, making it one of only four known Saturnian moons to occupy a gravitational well known as a stable Lagrange point.

詞彙學習