凱旋門 中央 ê 月圓

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Moon through the Arc de Triomphe
• 影像來源 kah 版權：Stefano Zanarello
• 今仔日 ê 探險：巴黎
• 台文翻譯：An-Li Tsai (NCU)

[漢羅] 凱旋門 中央 ê 月圓

翕出這張相片是毋是足好運--ê？ 雖罔講有足濟精彩 ê 相片攏是因為有人拄仔好 tī 彼个時間出現 tī 遐，毋過欲翕 這張相片 真正是愛技術嘛愛足細膩 ê 計畫。 頭一項愛考慮 ê 是角比例：若是 kah 這个 tī 法國 巴黎 足出名 ê 凱旋門 傷倚，這粒月娘就會看起來傷細粒。 若是傷保守，ùi 傷遠 ê 所在翕，月娘 就會看起來 傷大粒，袂拄仔好卡 tī 凱旋門 內底。 第二項愛考慮 ê 是翕 ê 時機：月娘干焦會 tī 足短 ê 時間內 出現 tī 凱旋門 中央，像 tī 這个距離，是無夠 1 分鐘。 其他愛 考慮 ê 部份親像是城市 ê 燈火、相對 輝度、懸度、前景有媠無、kah 數位處理 ê 問題。 閣有，嘛愛小可仔運氣運氣，比論講，天氣 愛袂䆀。 這擺 ê 計畫確實有成功，有 kā 人類上有名 ê 兩項標誌攏翕做伙，予逐家 欣賞。

[POJ] Khái-soân-mn̂g tiong-ng ê Goe̍h-îⁿ

Hip-chhut chit-tiuⁿ siòng-phìⁿ sī-m̄-sī chiok hó-ūn--ê? Sui-bóng kóng ū chiok-chōe cheng-chhái ê siòng-phìⁿ lóng sī in-ūi ū-lâng tú-á-hó tī hit-ê sî-kan chhut-hiān tī hiah, m̄-koh beh hip chit-tiuⁿ siòng-phìⁿ chin-chiàⁿ sī ài ki-su̍t mā ài chiok sè-lī ê kè-ōe. Thâu-chi̍t-hāng ài khó-lū ê sī kak-pí-lē: Nā-sī kah chit-ê tī Hoat-kok Pa-lê chiok chhut-miâ ê Khái-soân-mn̂g siuⁿ óa, chit-lia̍p goe̍h-niû to̍h ē khòaⁿ--khí-lâi siuⁿ sè-lia̍p. Nā-sī siuⁿ pó-siú, ùi siuⁿ hn̄g ê só͘-chāi hip, goe̍h-niû to̍h ē khòaⁿ-khí-lâi siuⁿ tōa-lia̍p, bē tú-á-hó khah tī Khái-soân-mn̂g lāi-té. Tē-jī-hāng ài khó-lū ê sī hip ê sî-ki: Goe̍h-niû kan-na ē tī chiok té ê sî-kan lāi chhut-hiān tī Khái-soân-mn̂g tiong-ng, chhiūⁿ tī chit-ê kū-lī, sī bô-kàu 1 hun-cheng. Kî-tha ài khó-lū ê pō͘-hūn chhiⁿ-chhiūⁿ sī siâⁿ-chhī ê teng-hóe, siong-tùi hui-tō͘, koân-tō͘, chiân-kéng ū súi--bô, kah só͘-ūi chhú-lí ê būn-tê. Koh ū, mā ài sió-khóa-á ūn-khì-ūn-khì, pí-lūn kóng, thiⁿ-khì ài bē-bái. Chit-pái ê kè-ōe khak-si̍t ū sêng-kong, ū kā jī-lūi siōng ū-miâ ê nn̄g-hāng piau-chì lóng hip chò-hóe, hō͘ ta̍k-ke him-sióng.

[KIP] Khái-suân-mn̂g tiong-ng ê Gue̍h-înn

Hip-tshut tsit-tiunn siòng-phìnn sī-m̄-sī tsiok hó-ūn--ê? Sui-bóng kóng ū tsiok-tsuē tsing-tshái ê siòng-phìnn lóng sī in-uī ū-lâng tú-á-hó tī hit-ê sî-kan tshut-hiān tī hiah, m̄-koh beh hip tsit-tiunn siòng-phìnn tsin-tsiànn sī ài ki-su̍t mā ài tsiok sè-lī ê kè-uē. Thâu-tsi̍t-hāng ài khó-lū ê sī kak-pí-lē: Nā-sī kah tsit-ê tī Huat-kok Pa-lê tsiok tshut-miâ ê Khái-suân-mn̂g siunn uá, tsit-lia̍p gue̍h-niû to̍h ē khuànn--khí-lâi siunn sè-lia̍p. Nā-sī siunn pó-siú, uì siunn hn̄g ê sóo-tsāi hip, gue̍h-niû to̍h ē khuànn-khí-lâi siunn tuā-lia̍p, bē tú-á-hó khah tī Khái-suân-mn̂g lāi-té. Tē-jī-hāng ài khó-lū ê sī hip ê sî-ki: Gue̍h-niû kan-na ē tī tsiok té ê sî-kan lāi tshut-hiān tī Khái-suân-mn̂g tiong-ng, tshiūnn tī tsit-ê kū-lī, sī bô-kàu 1 hun-tsing. Kî-tha ài khó-lū ê pōo-hūn tshinn-tshiūnn sī siânn-tshī ê ting-hué, siong-tuì hui-tōo, kuân-tōo, tsiân-kíng ū suí--bô, kah sóo-uī tshú-lí ê būn-tê. Koh ū, mā ài sió-khuá-á ūn-khì-ūn-khì, pí-lūn kóng, thinn-khì ài bē-bái. Tsit-pái ê kè-uē khak-si̍t ū sîng-kong, ū kā jī-luī siōng ū-miâ ê nn̄g-hāng piau-tsì lóng hip tsò-hué, hōo ta̍k-ke him-sióng.

[English] The Moon through the Arc de Triomphe

Was this a lucky shot? Although many amazing photographs are taken by someone who just happened to be in the right place at the right time, this image took skill and careful planning. First was the angular scale: if you shoot too close to the famous Arc de Triomphe in Paris, France, the full moon will appear too small. Conversely, if you shoot from too far away, the moon will appear too large and not fit inside the Arc. Second is timing: the Moon only appears centered inside the Arc for small periods of time -- from this distance less than a minute. Other planned features include lighting, relative brightness, height, capturing a good foreground, and digital processing. And yes, there is some luck involved -- for example, the sky must be clear. This time, the planning was successful, bringing two of humanity's most famous icons photographically together for all to enjoy.

詞彙學習