南歐天頂 ê 北極光

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Northern Lights over Southern Europe
• 影像來源 kah 版權：Lorenzo Cordero
• 台文翻譯：An-Li Tsai (NCU)

[漢羅] 南歐天頂 ê 北極光

你過去這兩工敢有看著極光？ 有足濟無蹛踮北極區 ê 人有看著喔！ 極光報告 講，極光毋但出現 tī 美國 北部，像 Alaska 州，嘛出現 tī 美國南部，像 Texas 州 kah Arizona 州。 這擺 ê 大型極光，嘛有湠到 歐洲 kah 亞洲。 相片內底 hŏng 印象足深 ê 紅色極光，是 chăng 暝 tī 西班牙 中部 Cáceres 庄 附近翕--ê。 極光報告嘛有報講，極光出現 tī 西班牙南部 一寡所在。 極光其實是 幾若工前 太陽表面發生強烈 ê 日冕物質噴出事件 (CME) 引起--ê 地球現象。 CME 產生 ê 粒子湠到規个 內太陽系，了後 kah 地球 磁層 相激。 這个時陣，電子 kah 質子 綴 地球北極 ê 磁力線 那捲那踅入去，kah 地球大氣層 ê 酸素、窒素相挵，產生這極光 美景。 因為太陽活動比以前攏較強，所以咱未來嘛有 機會 tiàm 南天 看著 北極光。

[POJ] Lâm-au thiⁿ-téng ê Pak-ke̍k-kng

Lí kòe-khì chit nn̄g-kang kám ū khòaⁿ-tio̍h ke̍k-kng? Ū chiok-chōe bô tòa tiàm pak-ke̍k-khu ê lâng ū khòaⁿ--tio̍h o͘h! Ke̍k-kng pò-kò kóng, ke̍k-kng m̄-nā chhut-hiān tī Bí-kok pak-pō͘, chhiūⁿ Alaska chiu, mā chhut-hiān tī Bí-kok lâm-pō͘, chhiūⁿ Texas chiu kah Arizona chiu. Chit-pái ê tōa-hêng ke̍k-kng, mā ū thòaⁿ kàu Au-chiu kah A-chiu. Siòng-phìⁿ lāi-té hŏng ìn-siōng chiok chhim ê âng-sek ke̍k-kng, sī chăng-mî tī Se-pan-gâ tiong-pō͘ Cáceres chng hù-kīn hip--ê. Ke̍k-kng pò-kò mā ū pò kóng, ke̍k-kng chhut-hiān tī Se-pan-gâ lâm-pō͘ chi̍t-kóa só͘-chāi. Ke̍k-kng kî-si̍t sī kúi-ā kang chêng Thài-iông piáu-bīn hoat-seng kiông-lia̍t ê Ji̍t-bián Bu̍t-chit Phùn-chhut sū-kiāⁿ (CME) ín-khí--ê Tē-kiû hiān-siōng. CME sán-seng ê lia̍p-chú thòaⁿ kàu kui-ê Lōe Thài-iông-hē, liáu-āu kah Tē-kiû chû-chân sio kek. Chit-ê sî-chūn, tiān-chú kah chit-chú tòe Tē-kiû pak-ke̍k ê chû-le̍k-sòaⁿ ná kńg ná se̍h--ji̍p-khì, kah Tē-kiû tāi-khì-chân ê sàng-sò͘, chi̍t-sò͘ sio-lòng, sán-seng chit-tiuⁿ ke̍k-kng bí-kéng. In-ūi Thài-iông oa̍h-tāng pí í-chêng lòng khah kiông, só͘-í lán bī-lâi mā ū ki-hōe tiàm lâm-thian khòaⁿ--tio̍h pak-ke̍k-kng.

[KIP] Lâm-au thinn-tíng ê Pak-ki̍k-kng

Lí kuè-khì tsit nn̄g-kang kám ū khuànn-tio̍h ki̍k-kng? Ū tsiok-tsuē bô tuà tiàm pak-ki̍k-khu ê lâng ū khuànn--tio̍h ooh! Ki̍k-kng pò-kò kóng, ki̍k-kng m̄-nā tshut-hiān tī Bí-kok pak-pōo, tshiūnn Alaska tsiu, mā tshut-hiān tī Bí-kok lâm-pōo, tshiūnn Texas tsiu kah Arizona tsiu. Tsit-pái ê tuā-hîng ki̍k-kng, mā ū thuànn kàu Au-tsiu kah A-tsiu. Siòng-phìnn lāi-té hŏng ìn-siōng tsiok tshim ê âng-sik ki̍k-kng, sī chăng-mî tī Se-pan-gâ tiong-pōo Cáceres tsng hù-kīn hip--ê. Ki̍k-kng pò-kò mā ū pò kóng, ki̍k-kng tshut-hiān tī Se-pan-gâ lâm-pōo tsi̍t-kuá sóo-tsāi. Ki̍k-kng kî-si̍t sī kuí-ā kang tsîng Thài-iông piáu-bīn huat-sing kiông-lia̍t ê Ji̍t-bián Bu̍t-tsit Phùn-tshut sū-kiānn (CME) ín-khí--ê Tē-kiû hiān-siōng. CME sán-sing ê lia̍p-tsú thuànn kàu kui-ê Luē Thài-iông-hē, liáu-āu kah Tē-kiû tsû-tsân sio kik. Tsit-ê sî-tsūn, tiān-tsú kah tsit-tsú tuè Tē-kiû pak-ki̍k ê tsû-li̍k-suànn ná kńg ná se̍h--ji̍p-khì, kah Tē-kiû tāi-khì-tsân ê sàng-sòo, tsi̍t-sòo sio-lòng, sán-sing tsit-tiunn ki̍k-kng bí-kíng. In-uī Thài-iông ua̍h-tāng pí í-tsîng lòng khah kiông, sóo-í lán bī-lâi mā ū ki-huē tiàm lâm-thian khuànn--tio̍h pak-ki̍k-kng.

[English] Northern Lights over Southern Europe

Did you see an aurora over the past two nights? Many people who don't live in Earth's far north did. Reports of aurora came in not only from northern locales in the USA as Alaska, but as far south as Texas and Arizona. A huge auroral oval extended over Europe and Asia, too. Pictured, an impressively red aurora was captured last night near the town of Cáceres in central Spain. Auroras were also reported in parts of southern Spain. The auroras resulted from a strong Coronal Mass Event (CME) that occurred on the Sun a few days ago. Particles from the CME crossed the inner Solar System before colliding with the Earth's magnetosphere. From there, electrons and protons spiraled down the Earth's northern magnetic field lines and collided with oxygen and nitrogen in Earth's atmosphere, causing picturesque auroral glows. Our unusually active Sun may provide future opportunities to see the northern lights in southern skies.

詞彙學習