美國 Florida 州 ê 龍絞水

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Waterspout in Florida
• 影像來源 kah 版權：Joey Mole
• 天頂送你 ê 禮物：你 ê APOD 生日相片是佗一張？ (post 1995)
• 台文翻譯：An-Li Tsai (NCU)

[漢羅] 美國 Florida 州 ê 龍絞水

水是發生啥物代誌？ 這張相片是紀錄 龍絞水 較好 ê 一張相片。 龍絞水 就是一款發生 tī 水面頂懸 ê 絞螺仔風。 一般講來，龍絞水是 tī 較溫暖 ê 水面頂懸 形成–ê，伊是那自旋那咧衝懸 ê 澹空氣柱仔。 龍絞水 kah 絞螺仔風 仝款攏足危險–ê，而且伊 ê 風速是緊甲一點鐘超過 200 公里。 有一寡 龍絞水 tī 離 雷公雨 較遠 ê 所在形成，甚至會 tī 天氣袂䆀 ê 所在出現。 龍絞水 嘛有可能是會透光–ê，而且干焦 tī 水面 頂懸 開始形成 奇怪圖樣 ê 時陣，才看會著。 這張相片 是 2013 年 7 月 ê 時陣 tī 美國 Florida 州 ê Tampa 灣附近翕–ê。 Florida 海岸 ê 大西洋，會當講是世界上 龍絞水 出現上濟 ê 地區，一年內會形成幾若百粒。

[POJ] Bí-kok Florida chiu ê Lêng-ká-chúi

Chúi sī hoat-seng siáⁿ-mi̍h tāi-chì? Chit-tiuⁿ siòng-phìⁿ sī kì-lio̍k lêng-ká-chúi khah hó ê chi̍t-tiuⁿ siòng-phìⁿ. Lêng-ká-chúi to̍h sī chi̍t-khoán hoat-seng tī chúi-bīn téng-koân ê ká-lê-á-hong. It-poaⁿ kóng lâi, lêng-ká-chúi sī tī khah un-loán ê chúi-bīn téng-koân hêng-sêng–ê, i sī ná chū-soân ná leh chhèng-koân ê tâm khong-khì thiāu-á. Lêng-ká-chúi kah ká-lê-á-hong kāng-khoán lóng chiok hûi-hiám–ê, jî-chhiáⁿ i ê hong-sok sī kín kah chi̍t tiám-cheng chhiau-kòe 200 kong-lí. Ū chi̍t-kóa lêng-ká-chúi tī lī lûi-kong-hō͘ khah hn̄g ê só͘-chāi hêng-sêng, sīm-chì ē tī thiⁿ-khì bē-bái ê só͘-chāi chhut-hiān. Lêng-ká-chúi mā ū khó-lêng sī ē thàu-kng–ê, jî-chhiáⁿ kan-na tī chúi-bīn téng-koân khai-sí hêng-sêng kî-koài tô͘-iūⁿ ê sî-chūn, chiah khòaⁿ-ē-tio̍h. Chit-tiuⁿ siòng-phìⁿ sī 2013 nî 7 goe̍h ê sî-chūn tī Bí-kok Florida chiu ê Tampa oan hù-kīn hip–ê. Florida hái-hōaⁿ ê Tōa-se-iûⁿ, ē-tàng kóng sī sè-kài-siōng lêng-ká-chúi chhut-hiān siōng chōe ê tē-khu, chi̍t nî lāi ē hêng-sêng kúi-ā pah lia̍p.

[KIP] Bí-kok Florida tsiu ê Lîng-ká-tsuí

Tsuí sī huat-sing siánn-mi̍h tāi-tsì? Tsit-tiunn siòng-phìnn sī kì-lio̍k lîng-ká-tsuí khah hó ê tsi̍t-tiunn siòng-phìnn. Lîng-ká-tsuí to̍h sī tsi̍t-khuán huat-sing tī tsuí-bīn tíng-kuân ê ká-lê-á-hong. It-puann kóng lâi, lîng-ká-tsuí sī tī khah un-luán ê tsuí-bīn tíng-kuân hîng-sîng–ê, i sī ná tsū-suân ná leh tshìng-kuân ê tâm khong-khì thiāu-á. Lîng-ká-tsuí kah ká-lê-á-hong kāng-khuán lóng tsiok huî-hiám–ê, jî-tshiánn i ê hong-sok sī kín kah tsi̍t tiám-tsing tshiau-kuè 200 kong-lí. Ū tsi̍t-kuá lîng-ká-tsuí tī lī luî-kong-hōo khah hn̄g ê sóo-tsāi hîng-sîng, sīm-tsì ē tī thinn-khì bē-bái ê sóo-tsāi tshut-hiān. Lîng-ká-tsuí mā ū khó-lîng sī ē thàu-kng–ê, jî-tshiánn kan-na tī tsuí-bīn tíng-kuân khai-sí hîng-sîng kî-kuài tôo-iūnn ê sî-tsūn, tsiah khuànn-ē-tio̍h. Tsit-tiunn siòng-phìnn sī 2013 nî 7 gue̍h ê sî-tsūn tī Bí-kok Florida tsiu ê Tampa uan hù-kīn hip–ê. Florida hái-huānn ê Tuā-se-iûnn, ē-tàng kóng sī sè-kài-siōng lîng-ká-tsuí tshut-hiān siōng tsuē ê tē-khu, tsi̍t nî lāi ē hîng-sîng kuí-ā pah lia̍p.

[English] A Waterspout in Florida

What’s happening over the water? Pictured here is one of the better images yet recorded of a waterspout, a type of tornado that occurs over water. Waterspouts are spinning columns of rising moist air that typically form over warm water. Waterspouts can be as dangerous as tornadoes and can feature wind speeds over 200 kilometers per hour. Some waterspouts form away from thunderstorms and even during relatively fair weather. Waterspouts may be relatively transparent and initially visible only by an unusual pattern they create on the water. The featured image was taken in 2013 July near Tampa Bay, Florida. The Atlantic Ocean off the coast of Florida is arguably the most active area in the world for waterspouts, with hundreds forming each year.

詞彙學習（漢羅/POJ/KIP/華語/English）

• 【龍絞水】lêng-ká-chúi/lîng-ká-tsuí/海龍捲風/waterspout
• 【絞螺仔風】ká-lê-á-hong/ká-lê-á-hong/龍捲風/tornado
• 【雷公雨】lûi-kong-hō͘/luî-kong-hōo/雷雨/thunderstorms
• 【自旋】chū-soân/tsū-suân/自旋/spin