2024 年 4 月 美國 ê 日全食路線圖

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Map of Total Solar Eclipse Path in 2024 April
• 影像來源：NASA, Science Visualization Studio
• 台文翻譯：An-Li Tsai (NCU)

[漢羅] 2024 年 4 月 美國 ê 日全食路線圖

你有想欲看日全食無？ 若是有，你敢有朋友抑是親情蹛 tiàm 明年 4 月 ê 日全食路線 附近？ 若是有，按呢你可能會使安排一擺日全食旅行。 明年 4 月 8 號，日全食 路線會經過 北美洲，ùi 墨西哥 西部 到 加拿大 東部，中央會經過美國，ùi 南部 ê Texas 州 入來，ùi 北部 ê Maine 州 出去。 規个北美洲攏會 拄--著，上無嘛有 日偏食 通看。 這張地圖 就是 全食 ê 路線圖。 有足濟看過日全食 ê 人，一世人攏會 kah 逐家 分享 日全食 ê 故事。 欲看日全食進前，咱會使先來看 日環食 做準備，就 tī 今年年底，10 月中彼陣。

[POJ] 2024 nî 4 goe̍h Bí-kok ê Ji̍t-choân-si̍t lō͘-sòaⁿ-tô͘

Lí ū siūⁿ beh khòaⁿ ji̍t-choân-si̍t bô? Nā-sī ū, lī kám ū pêng-iú ia̍h-sī chhin-chiâⁿ tòa tiàm môa-nî 4 goe̍h ê ji̍t-choân-si̍t lō͘-sòaⁿ hù-kīn? Nā-sī ū, án-ni lī khó-lêng ē-sái an-pâi chi̍t-pái ji̍t-choân-si̍t lú-hêng. Môa-nî 4 goe̍h 8 hō, ji̍t-choân-si̍t lō͘-sòaⁿ ē keng-kè Pak-bí-chiu, ùi Be̍k-se-ko se-pō͘ kàu Ka-ná-tāi tang-pō͘, tiong-ng ē keng-kè Bí-kok, ùi lâm-pō͘ ê Texas chiu ji̍p-lâi, ùi Pak-pō͘ ê Maine chiu chhut-khì. Kui-ê Pak-bí-chiu lóng ē tú--tio̍h, siōng bô mā ū ji̍t-phián-si̍t thang khòaⁿ. Chit-tiuⁿ tē-tô͘ to̍h sī choân-si̍t ê lō͘-sòaⁿ-tô͘. Ū chiok chōe khòaⁿ-kòe ji̍t-choân-si̍t ê lâng, chi̍t-sì-lâng lóng ē kah ta̍k-ke hun-hióng ji̍t-choân-si̍t ê kò͘-sū. Beh khòaⁿ ji̍t-choân-si̍t chìn-chêng, lán ē-sái seng lâi khòaⁿ ji̍t-khoân-si̍t chò chún-pī, to̍h tī kin-nî nî-té, 10 goe̍h tiong hit-chūn.

[KIP] 2024 nî 4 gue̍h Bí-kok ê Ji̍t-tsuân-si̍t lōo-suànn-tôo

Lí ū siūnn beh khuànn ji̍t-tsuân-si̍t bô? Nā-sī ū, lī kám ū pîng-iú ia̍h-sī tshin-tsiânn tuà tiàm muâ-nî 4 gue̍h ê ji̍t-tsuân-si̍t lōo-suànn hù-kīn? Nā-sī ū, án-ni lī khó-lîng ē-sái an-pâi tsi̍t-pái ji̍t-tsuân-si̍t lú-hîng. Muâ-nî 4 gue̍h 8 hō, ji̍t-tsuân-si̍t lōo-suànn ē king-kè Pak-bí-tsiu, uì Bi̍k-se-ko se-pōo kàu Ka-ná-tāi tang-pōo, tiong-ng ē king-kè Bí-kok, uì lâm-pōo ê Texas tsiu ji̍p-lâi, uì Pak-pōo ê Maine tsiu tshut-khì. Kui-ê Pak-bí-tsiu lóng ē tú--tio̍h, siōng bô mā ū ji̍t-phián-si̍t thang khuànn. Tsit-tiunn tē-tôo to̍h sī tsuân-si̍t ê lōo-suànn-tôo. Ū tsiok tsuē khuànn-kuè ji̍t-tsuân-si̍t ê lâng, tsi̍t-sì-lâng lóng ē kah ta̍k-ke hun-hióng ji̍t-tsuân-si̍t ê kòo-sū. Beh khuànn ji̍t-tsuân-si̍t tsìn-tsîng, lán ē-sái sing lâi khuànn ji̍t-khuân-si̍t tsò tsún-pī, to̍h tī kin-nî nî-té, 10 gue̍h tiong hit-tsūn.

[English] Map of Total Solar Eclipse Path in 2024 April

Would you like to see a total eclipse of the Sun? If so, do any friends or relatives live near the path of next April's eclipse? If yes again, then you might want to arrange a well-timed visit. Next April 8, the path of a total solar eclipse will cross North America from western Mexico to eastern Canada, entering the USA in southern Texas and existing in northern Maine. All of North America will experience, at the least, a partial solar eclipse. Featured here is a map of the path of totality. Many people who have seen a total solar eclipse tell stories about it for the rest of their lives. As a warmup, an annular solar eclipse will be visible later this year -- in mid-October.

詞彙學習