卵星雲 ê 偏振光

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Egg Nebula in Polarized Light
• 影像來源：Hubble Heritage Team (STScI / AURA), W. Sparks (STScI) & R. Sahai (JPL), NASA
• 台文翻譯：An-Li Tsai (NCU)

[漢羅] 卵星雲 ê 偏振光

卵星雲 ê 中央有啥物？ 卵星雲中央有一粒恆星 ùi 這粒宇宙卵生出來，伊 kā 氣體塗粉殼 擲出去，沓沓仔演化做 白矮星。 卵星雲是快速演化 ê 前 行星形星雲，大細差不多有 1 光年，就 tī 北方 ê 天鵝座遐。 較厚 ê 塗粉 kā 視線中央 ê 恆星閘牢矣，毋過較遠 ê 塗粉殼會反射中央恆星 ê 光。 光 ê 偏振 是相對 逐粒塗粉粒、中央恆星、kah 觀測者 定義 ê 平面來講。 光 反射 這个平面造成 ê 效應，就叫做偏振。 咱若是量卵星雲 ê 偏振光角度，就會使知影藏 tī 內底彼粒天體 ê 位置。 這張影像是 2003 年 Hubble 先進巡天 Kha-mé-lah 翕--ê。 科學家 kā 這粒「卵」漆做「復活節卵」ê 色彩 ê 原因，是為著欲 強調 偏振 ê 方向。

[POJ] Nn̄g-seng-hûn ê Phian-chìn-kng

Nn̄g-seng-hûn ê tiong-ng ū siáⁿ-mi̍h? Nn̄g-seng-hûn tiong-ng ū chi̍t-lia̍p hêng-chheⁿ ùi chit-lia̍p ú-tiū-nn̄g seⁿ--chhut-lâi, i kā khì-thé thô͘-hún khak tàn--chhut-khì, tau̍h-tau̍h-á ián-hòa chò pe̍h-é-chheⁿ. Nn̄g-seng-hûn sī khoài-sok ián-hòa ê chiân-kiâⁿ-chheⁿ-hêng seng-hûn, tōa-sè chha-put-to ū 1 kng-nî, to̍h tī pak-hong ê Thian-gô-chō hiah. Khah kāu ê thô͘-hún kā sī-sòaⁿ tiong-ng ê hêng-chheⁿ cha̍h-tiâu--ah, m̄-koh khah hn̄g ê thô͘-hún-khak ē hoán-siā tiong-ng hêng-chheⁿ ê kng. Kng ê phian-chìn sī siong-tùi ta̍k-lia̍p thô͘-hún-lia̍p, tiong-ng hêng-chheⁿ, kah koan-chhek-chiá tēng-gī ê pêⁿ-bīn lâi kóng. Kng hoán-siā chit-ê pêⁿ-bīn chō-sêng ê hāu-èng, to̍h kiò-chò phian-chìn. Lán nā-sī niû Nn̄g-seng-hûn ê phian-chìn-kng kak-tō͘, to̍h ē-sái chai-iáⁿ chhàng tī lāi-té hit-lia̍p thian-thé ê ūi-tì. Chit-tiuⁿ iáⁿ-siōng sī 2003 nî Hubble Sian-chìn Sûn-thian Kha-mé-lah hip--ê. Kho-ha̍k-ka kā chit-lia̍p "Nn̄g" chhat-chò "Koh-oa̍h-chiat-nn̄g" ê goân-in, sī ūi-tio̍h beh kiông-tiāu phian-chìn ê hong-hiòng.

[KIP] Nn̄g-sing-hûn ê Phian-tsìn-kng

Nn̄g-sing-hûn ê tiong-ng ū siánn-mi̍h? Nn̄g-sing-hûn tiong-ng ū tsi̍t-lia̍p hîng-tshenn uì tsit-lia̍p ú-tiū-nn̄g senn--tshut-lâi, i kā khì-thé thôo-hún khak tàn--tshut-khì, ta̍uh-ta̍uh-á ián-huà tsò pe̍h-é-tshenn. Nn̄g-sing-hûn sī khuài-sok ián-huà ê tsiân-kiânn-tshenn-hîng sing-hûn, tuā-sè tsha-put-to ū 1 kng-nî, to̍h tī pak-hong ê Thian-gô-tsō hiah. Khah kāu ê thôo-hún kā sī-suànn tiong-ng ê hîng-tshenn tsa̍h-tiâu--ah, m̄-koh khah hn̄g ê thôo-hún-khak ē huán-siā tiong-ng hîng-tshenn ê kng. Kng ê phian-tsìn sī siong-tuì ta̍k-lia̍p thôo-hún-lia̍p, tiong-ng hîng-tshenn, kah kuan-tshik-tsiá tīng-gī ê pênn-bīn lâi kóng. Kng huán-siā tsit-ê pênn-bīn tsō-sîng ê hāu-ìng, to̍h kiò-tsò phian-tsìn. Lán nā-sī niû Nn̄g-sing-hûn ê phian-tsìn-kng kak-tōo, to̍h ē-sái tsai-iánn tshàng tī lāi-té hit-lia̍p thian-thé ê uī-tì. Tsit-tiunn iánn-siōng sī 2003 nî Hubble Sian-tsìn Sûn-thian Kha-mé-lah hip--ê. Kho-ha̍k-ka kā tsit-lia̍p "Nn̄g" tshat-tsò "Koh-ua̍h-tsiat-nn̄g" ê guân-in, sī uī-tio̍h beh kiông-tiāu phian-tsìn ê hong-hiòng.

[English] The Egg Nebula in Polarized Light

Where is the center of the Egg Nebula? Emerging from a cosmic egg, the star in the center of the Egg Nebula is casting away shells of gas and dust as it slowly transforms itself into a white dwarf star. The Egg Nebula is a rapidly evolving pre-planetary nebula spanning about one light year toward the northern constellation Cygnus. Thick dust blocks the center star from view, while the dust shells farther out reflect light from this star. Light vibrating in the plane defined by each dust grain, the central star, and the observer is preferentially reflected, causing an effect known as polarization. Measuring the orientation of the polarized light for the Egg Nebula gives clues to location of the hidden source. Taken by Hubble's Advanced Camera for Surveys in 2003, this image is rendered in artifical "Easter-Egg" colors coded to highlight the orientation of polarization.

詞彙學習