人族一號火箭 用 液氧甲烷 點火發射

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Terran 1 Burns Methalox
• 影像來源：Relativity / John Kraus
• 台文翻譯：An-Li Tsai (NCU)

[漢羅] 人族一號火箭 用 液氧甲烷 點火發射

相對論太空公司製造 ê 人族一號火箭 ê 零件大部份攏是 3D 列印做–出來–ê。 伊提來燒 ê 低溫火箭燃料，是液態甲烷 kah 液態酸素 ê 合成物，叫做 液氧甲烷。 這是 人族一號火箭 tī 3 月 22 暗暝 ùi 美國 Cape Canaveral 發射 ê 特寫相片。 這張夭壽媠 ê 相片，有翕著 9 管 Aeon 一號 iăn-jín 噴出足強 ê 藍色廢氣 kah 做伙落–落來 ê 冰角。 這擺飛，算是有成功。 這隻創新火箭有達成 ê 任務是：有 kā 主 iăn-jín 禁 khiài，嘛有 kā 無仝節火箭分–開。 毋過第二節火箭點火了後發生問題，所以就無飛到按算欲飛入去 ê 軌道。 是講，人族一號火箭 無按算欲 飛去火星。 毋過伊用 ê 燃料是液氧甲烷，是 ùi 甲烷 kah 液態酸素 合成–ê，而且這會當 tī 火星頂懸揣著原料 kā 做–出來。 按呢就會使 tī 火星頂懸製造 液氧甲烷，予欲轉來地球 ê 火箭提來做燃料使用。

[POJ] Jîn-cho̍k-it-hō Hóe-chìⁿ iōng E̍k-ióng Kah-oân tiám-hóe hoat-siā

Siong-tùi-lūn Thài-khong kong-si chè-chō ê Jîn-cho̍k-it-hō hóe-chìⁿ ê lêng-kiāⁿ tāi-pō͘-hūn lóng sī 3D lia̍t-ìn chò–chhut-lâi–ê. I thê-lâi sio ê kē-un hóe-chìⁿ jiân-liāu, sī e̍k-thài kah-oân kah e̍k-thài sàng-sò͘ ê ha̍p-sêng-bu̍t, kiò-chò e̍k-ióng kah-oân. Che sī Jîn-cho̍k-it-hō hóe-chìⁿ tī 3 goe̍h 22 àm-mî ùi Bí-kok Cape Canaveral hoat-siā ê te̍k-siá siòng-phìⁿ. Chit-tiuⁿ iáu-siū súi ê siòng-phìⁿ, ū hip-tio̍h 9 kóng Aeon it-hō iăn-jín phùn-chhut chiok kiông ê nâ-sek hùi-khì kah chò-hóe lak–lo̍h-lâi ê peng-kak. Chit-pái poe, sǹg sī ū sêng-kong. Chit-ki chhòng-sin hóe-chìⁿ ū ta̍t-sêng ê jīm-bū sī: ū kā chú iăn-jín khìm khiài, mā ū kā bô kāng chat hóe-chìⁿ pun–khui M̄-koh tē-jī-chat hóe-chìⁿ tiám-hóe liáu-āu hoat-seng būn-tê, só͘-í to̍h bô poe kàu àn-sǹg beh poe ji̍p-khì ê kúi-tō. Sī kóng, Jîn-cho̍k-it-hō hóe-chìⁿ bô àn-sǹg beh poe khì Hóe-chheⁿ. M̄-koh i iōng ê jiân-liāu sī e̍k-ióng kah-oân, sī ùi kah-oân kah e̍k-thài sàng-sò͘ ha̍p-sêng–ê, jî-chhiáⁿ che ē-tàng tī Hóe-chheⁿ téng-koân chhōe-tio̍h goân-liāu kā chò–chhut-lâi. Án-ni to̍h ē-sái tī Hóe-chheⁿ téng-koân chè-chō e̍k-ióng kah-oân, hō͘ beh tńg-lâi Tē-kiû ê hóe-chìⁿ thê-lâi chò jiân-liāu sú-iōng.

[KIP] Jîn-tso̍k-it-hō Hué-tsìnn iōng I̍k-ióng Kah-uân tiám-hué huat-siā

Siong-tuì-lūn Thài-khong kong-si tsè-tsō ê Jîn-tso̍k-it-hō hué-tsìnn ê lîng-kiānn tāi-pōo-hūn lóng sī 3D lia̍t-ìn tsò–tshut-lâi–ê. I thê-lâi sio ê kē-un hué-tsìnn jiân-liāu, sī i̍k-thài kah-uân kah i̍k-thài sàng-sòo ê ha̍p-sîng-bu̍t, kiò-tsò i̍k-ióng kah-uân. Tse sī Jîn-tso̍k-it-hō hué-tsìnn tī 3 gue̍h 22 àm-mî uì Bí-kok Cape Canaveral huat-siā ê ti̍k-siá siòng-phìnn. Tsit-tiunn iáu-siū suí ê siòng-phìnn, ū hip-tio̍h 9 kóng Aeon it-hō iăn-jín phùn-tshut tsiok kiông ê nâ-sik huì-khì kah tsò-hué lak–lo̍h-lâi ê ping-kak. Tsit-pái pue, sǹg sī ū sîng-kong. Tsit-ki tshòng-sin hué-tsìnn ū ta̍t-sîng ê jīm-bū sī: ū kā tsú iăn-jín khìm khiài, mā ū kā bô kāng tsat hué-tsìnn pun–khui M̄-koh tē-jī-tsat hué-tsìnn tiám-hué liáu-āu huat-sing būn-tê, sóo-í to̍h bô pue kàu àn-sǹg beh pue ji̍p-khì ê kuí-tō. Sī kóng, Jîn-tso̍k-it-hō hué-tsìnn bô àn-sǹg beh pue khì Hué-tshenn. M̄-koh i iōng ê jiân-liāu sī i̍k-ióng kah-uân, sī uì kah-uân kah i̍k-thài sàng-sòo ha̍p-sîng–ê, jî-tshiánn tse ē-tàng tī Hué-tshenn tíng-kuân tshuē-tio̍h guân-liāu kā tsò–tshut-lâi. Án-ni to̍h ē-sái tī Hué-tshenn tíng-kuân tsè-tsō i̍k-ióng kah-uân, hōo beh tńg-lâi Tē-kiû ê hué-tsìnn thê-lâi tsò jiân-liāu sú-iōng.

[English] Terran 1 Burns Methalox

Relativity’s Terran 1 Rocket is mostly 3D-printed. It burns a cryogenic c fuel composed of liquid methane and liquid oxygen (methalox). In this close-up of a Terran 1 launch on the night of March 22 from Cape Canaveral, icy chunks fall through the stunning frame as intense blue exhaust streams from its nine Aeon 1 engines. In a largely successful flight the inovative rocket achieved main engine cutoff and stage separation but fell short of orbit after an anomaly at the beginning of its second stage flight. Of course this Terran 1 rocket was never intended to travel to Mars. Still, the methane and liquid oxygen components of its methalox fuel can be made solely from materials found on the Red Planet. Methalox manufactured on Mars could be used as fuel for rockets returning to planet Earth.

詞彙學習（漢羅/POJ/KIP/華語/English）

• 【人族一號】Jîn-cho̍k-it-hō/Jîn-tso̍k-it-hō/人族一號/Terran 1
• 【火箭】hóe-chìⁿ/hué-tsìnn/火箭/rocket
• 【液氧甲烷】ek-ióng kah-oân/ik-ióng kah-uân/液氧甲烷/Methalox
• 【低溫】kē-un/kē-un/低溫/cryogenic
• 【燃料】jiân-liāu/jiân-liāu/燃料/fuel
• 【液態甲烷】e̍k-thài kah-oân/i̍k-thài kah-uân/液態甲烷/liquid methane
• 【液態酸素】e̍k-thài sàng-sò͘/i̍k-thài sàng-sòo/液態氧/liquid oxygen
• 【Aeon 一號】Aeon it hō/Aeon it hō/Aeon 一號/Aeon 1
• 【iăn-jín】iăn-jín/ia̋n jín/引擎/engines
• 【火星】Hóe-chheⁿ/Hué-tshenn/火星/Mars
• 【相對論太空公司】Siong-tùi-lūn Thài-khong kong-si/Siong-tuì-lūn Thài-khong kong-si/相對論太空公司/Relativity
• 【3D 列印】saⁿ D lia̍t-ìn/sann D lia̍t-ìn/3D 列印/3D-printed