銀河中心電波弧

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Galactic Center Radio Arc
• 影像來源：Ian Heywood (Oxford U.), SARAO;
• 台文翻譯：An-Li Tsai (NCU)

[漢羅] 銀河中心電波弧

是啥毋造成咱銀河中心附近有這个奇怪 ê 彎曲結構？ 這張電波影像 倚頂懸遐，有幾若逝長長趨趨 ê 平行光線，ùi 銀河盤 伸–出來，伊就叫做 銀河中心電波弧。 電波弧 kah 銀河中心 之間，有一條 拗彎 ê 奇怪雲絲，咱 kā 叫做 銀河弧。 正爿下底彼丸 足光 ê 電波結構 ê 中心，是 銀河中心 ê 烏洞，人馬座 A*。 有一款解說這个結構 是按怎來 ê 假說是講，這个電波弧 kah 銀河弧會生做這形，是因為內底有高溫 電漿，綴 仝款強度 ê 磁場咧行。 這張影像是 NASA Chandra X 光 太空天文台 翕–ê。 影像表示講，這个 電漿 kah 附近 ê 低溫氣體雲咧相挵。

[POJ] Gîn-hô-tiong-sim Tiān-pho-hô͘

Sī siáⁿ-mi̍h chō-sêng lán Gîn-hô-tiong-sim hù-kīn ū chit-ê kî-koài ê oan-khiau kiat-kò͘? Chit-tiuⁿ tiān-pho iáⁿ-siōng óa téng-koân hiah, ū kúi-ā chōa tn̂g-tn̂g chhu-chhu ê pêng-hêng kng-sòaⁿ, ùi Gîn-hô-pôaⁿ chhun–chhut-lâi, i to̍h kiò-chò Gîn-hô-tiong-sim Tiān-pho-hô͘. Tiān-pho-hô͘ kah Gîn-hô-tiong-sim chi-kan, ū chi̍t-tiâu áu-oan ê kî-koài hûn-si, lán kā kiò-chò Gîn-hô-hô͘. Chiàⁿ-pêng ē-té hit-oân chiok kng ê tiān-pho kiat-kò͘ ê tiong-sim, sī Gîn-hô-tiong-sim ê o͘-tōng, Jîn-má-chō A*. Ū chi̍t-khoán kái-soeh chit-ê kiat-kò͘ sī án-ná lâi ê ká-soat sī kóng, chit-ê tiān-pho-hô͘ kah Gîn-hô-hô͘ ē seⁿ chò chit-hêng, sī in-ūi lāi-té ū ko-un tiān-chiūⁿ, tòe kāng-khoán kiông-tō͘ ê chû-tiûⁿ leh kiâⁿ. Chit-tiuⁿ iáⁿ-siōng sī NASA Chandra X kng Thài-khong Thian-bûn-tâi hip–ê. Iáⁿ-siōng piau-sī kóng, chit-ê tiān-chiūⁿ kah hù-kīn ê kē-un khì-thé-hûn leh sio-lòng.

[KIP] Gîn-hô-tiong-sim Tiān-pho-hôo

Sī siánn-mi̍h tsō-sîng lán Gîn-hô-tiong-sim hù-kīn ū tsit-ê kî-kuài ê uan-khiau kiat-kòo? Tsit-tiunn tiān-pho iánn-siōng uá tíng-kuân hiah, ū kuí-ā tsuā tn̂g-tn̂g tshu-tshu ê pîng-hîng kng-suànn, uì Gîn-hô-puânn tshun–tshut-lâi, i to̍h kiò-tsò Gîn-hô-tiong-sim Tiān-pho-hôo. Tiān-pho-hôo kah Gîn-hô-tiong-sim tsi-kan, ū tsi̍t-tiâu áu-uan ê kî-kuài hûn-si, lán kā kiò-tsò Gîn-hô-hôo. Tsiànn-pîng ē-té hit-uân tsiok kng ê tiān-pho kiat-kòo ê tiong-sim, sī Gîn-hô-tiong-sim ê oo-tōng, Jîn-má-tsō A*. Ū tsi̍t-khuán kái-sueh tsit-ê kiat-kòo sī án-ná lâi ê ká-suat sī kóng, tsit-ê tiān-pho-hôo kah Gîn-hô-hôo ē senn tsò tsit-hîng, sī in-uī lāi-té ū ko-un tiān-tsiūnn, tuè kāng-khuán kiông-tōo ê tsû-tiûnn leh kiânn. Tsit-tiunn iánn-siōng sī NASA Chandra X kng Thài-khong Thian-bûn-tâi hip–ê. Iánn-siōng piau-sī kóng, tsit-ê tiān-tsiūnn kah hù-kīn ê kē-un khì-thé-hûn leh sio-lòng.

[English] The Galactic Center Radio Arc

What causes this unusual curving structure near the center of our Galaxy? The long parallel rays slanting across the top of the featured radio image are known collectively as the Galactic Center Radio Arc and point out from the Galactic plane. The Radio Arc is connected to the Galactic Center by strange curving filaments known as the Arches. The bright radio structure at the bottom right surrounds a black hole at the Galactic Center and is known as Sagittarius A*). One origin hypothesis holds that the Radio Arc and the Arches have their geometry because they contain hot plasma flowing along lines of a constant magnetic field. Images from NASA’s Chandra X-ray Observatory appear to show this plasma colliding with a nearby cloud of cold gas.

詞彙學習（漢羅/POJ/KIP/華語/English）

• 【銀河中心】Gîn-hô-tiong-sim/Gîn-hô-tiong-sim/銀河中心/the Galactic Center
• 【電波弧】Tiān-pho-hô͘/Tiān-pho-hôo/電波弧/the Radio Arc
• 【銀河盤】Gîn-hô-pôaⁿ/Gîn-hô-puânn/銀河盤/Galactic plane
• 【銀河】Gîn-hô/Gîn-hô/銀河/our Galaxy
• 【雲絲】hûn-si/hûn-si/絲狀結構/filaments
• 【銀河弧】Gîn-hô-hô͘/Gîn-hô-hôo/銀河弧/Arches
• 【烏洞】o͘-tōng/oo-tōng/黑洞/black hole
• 【人馬座 A】Jîn-má-chō/Jîn-má-tsō/人馬座 A/Sagittarius A
• 【電漿】tiān-chiūⁿ/tiān-tsiūnn/電漿/plasma
• 【磁場】chû-tiûⁿ/tsû-tiûnn/磁場/magnetic field
• 【Chandra X 光 太空天文台】Chandra X kng Thài-khong-bōng-oán-kiàⁿ/Chandra X kng Thài-khong-bōng-uán-kiànn/錢卓拉X射線天文台/Chandra X-ray Observatory (CXO)
• 【假說】ká-soat/ká-suat/假說/hypothesis