來看土衛六 Titan

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Seeing Titan
• 影像來源：VIMS Team, U. Arizona, U. Nantes, ESA, NASA
• 台文翻譯：An-Li Tsai (NCU)

[漢羅] 來看土衛六 Titan

土星上大粒 ê 衛星 土衛六 Titan 實在是真歹看–著，因為伊去予足厚 ê 大氣層閘牢矣。 細粒粒子浮 tī 頂層大氣內底，造成足歹透光 ê 雲霧，kā 可見光波段 ê 光線散射，kā 土衛六 Titan ê 表面崁–起來，按呢逐家就攏看無。 毋過土衛六 Titan ê 表面 tī 紅外線看是會較清楚，因為這个波段 ê 散射較無遐爾強，大氣吸收嘛較少。 排 tī 中央彼張是土衛六 Titan ê 可見光影像，排 tī 外口彼輾是紅外線影像。 遮是目前為止 土衛六 Titan 上清楚 上迷人 ê 全球影像。 外口這六幅假色圖，是裝 tī Cassini 太空船 頂懸 ê 視覺佮紅外線影像光譜儀 (VIMS) 翕–ê。 Cassini 太空船是自 2004 到 2017 年 踅 土星咧行 ê 太空船。 這寡影像是 kā 13 年來 ê 紅外線影像資料，規个閣重新處理過 ê 影像。 這寡紅外線影像 kah Cassini 太空船翕 ê 可見光影像，形成強烈對比。 NASA 降落 土衛六 Titan ê 任務按算欲 tī 2027 年進行。 這是一个 革命性 ê 降落任務，按算欲用 自旋飛行器 來降落 Titan，這是一款 敢若 直升機 閣 敢若 飛龍機 ê 航空器。

[POJ] Lâi khòaⁿ Thó͘-ūi-la̍k Titan

Thó͘-chheⁿ siōng tōa-lia̍p ê ōe-chheⁿ Thó͘-ūi-la̍k Titan si̍t-chāi sī chin phái khòaⁿ–tio̍h, in-ūi i khì hō͘ chiok kāu ê tāi-khì-chân cha̍h-tiâu–ah. Sè-lia̍p lia̍p-chú phú tī téng-chân tāi-khì lāi-té, chō-sêng chiok phái thàu-kng ê hûn-bū, kā khó-kiàn-kng pho-tōaⁿ ê kng-sòaⁿ sàn-siā, kā Thó͘-ūi-la̍k Titan ê piáu-bīn khàm–khí-lâi, án-ni ta̍k-ke to̍h lóng khòaⁿ-bô. M̄-koh Thó͘-ūi-la̍k Titan ê piáu-bīn tī âng-gōa-sòaⁿ khòaⁿ sī ē khah chheng-chhó͘, in-ūi chit-ê pho-tōaⁿ ê sàn-siā khah bô hiah-nī kiông, tāi-khì khip-siu mā khah chió. Pâi tī tiong-ng hit-tiuⁿ sī Thó͘-ūi-la̍k Titan ê khó-kiàn-kng iáⁿ-siōng, pâi tī gōa-kháu hit-liàn sī âng-gōa-sòaⁿ iáⁿ-siōng. Chia sī bo̍k-chêng ûi-chí Thó͘-ūi-la̍k Titan siōng chheng-chhó͘ siōng bê-lâng ê choân-kiû iáⁿ-siōng. Gōa-kháu chit la̍k pak ká-sek-tô͘, sī chng tī Cassini thài-khong-chûn téng-koân ê Sī-kak kah Âng-gōa-sòaⁿ iáⁿ-siōng kng-phó͘-gî (VIMS) hip–ê. Cassini thài-khong-chûn sī chū 2004 kāu 2017 nî se̍h Thó͘-chheⁿ leh kiâⁿ ê thài-khong-chûn. Chit-kóa iáⁿ-siōng sī kā 13 nî lâi ê âng-gōa-sòaⁿ iáⁿ-siōng chu-liāu, kui-ê koh tiông-sin chhú-lí kòe ê iáⁿ-siōng. Chit-kóa âng-gōa-sòaⁿ iáⁿ-siōng kah Cassini thài-khong-chûn hip–ê khó-kiàn-kng iáⁿ-siōng, hêng-sêng kiông-lia̍t tùi-pí. NASA kàng-lo̍h Thó͘-ūi-la̍k Titan ê jīm-bū àn-sǹg beh tī 2027 nî chìn-hêng. Che sī chit-ê kek-bēng-sèng ê kàng-lo̍h jīm-bū, àn-sǹg beh iōng chū-soân hui-hêng-khì lâi kàng-lo̍h, che sī chi̍t-khoán ká-ná ti̍t-seng-ki mā ká-ná poe-lêng-ki ê hâng-khong-khì.

[KIP]

[English] Seeing Titan

Shrouded in a thick atmosphere, Saturn’s largest moon Titan really is hard to see. Small particles suspended in the upper atmosphere cause an almost impenetrable haze, strongly scattering light at visible wavelengths and hiding Titan’s surface features from prying eyes. But Titan’s surface is better imaged at infrared wavelengths where scattering is weaker and atmospheric absorption is reduced. Arrayed around this visible light image (center) of Titan are some of the clearest global infrared views of the tantalizing moon so far. In false color, the six panels present a consistent processing of 13 years of infrared image data from the Visual and Infrared Mapping Spectrometer (VIMS) on board the Cassini spacecraft orbiting Saturn from 2004 to 2017. They offer a stunning comparison with Cassini’s visible light view. NASA’s revolutionary rotorcraft mission to Titan is due to launch in 2027.

詞彙學習（漢羅/POJ/KIP/華語/English）

• 【土星】Thó͘-chheⁿ/Thóo-tshenn/土星/Saturn
• 【土衛六 Titan】Thó͘-ūi-la̍k Titan/Thóo-uī-la̍k Titan/土衛六泰坦/Titan
• 【大氣層】tāi-khì-chân/tāi-khì-tsân/大氣層/atmosphere
• 【自旋飛行器】chū-soân hui-hêng-khì/tsū-suân hui-hîng-khì/自轉旋翼機/rotorcraft
• 【視覺佮紅外線影像光譜儀】Sī-kak kah Âng-gōa-sòaⁿ iáⁿ-siōng kng-phó͘-gî/Sī-kak kah Âng-guā-suànn iánn-siōng kng-phóo-gî/視覺與紅外線影像光譜儀/Visual and Infrared Mapping Spectrometer (VIMS)
• 【散射】sàn-siā/sàn-siā/散射/scatter
• 【可見光】khó-kiàn-kng/khó-kiàn-kng/可見光/visible light
• 【假色圖】ká-sek-tô͘/ká-sik-tôo/假色圖/false color image
• 【Cassini 太空船】Cassini thài-khong-chûn/Cassini thài-khong-tsûn/卡西尼太空船/Cassini spacecraft
• 【直升機】ti̍t-seng-ki/ti̍t-sing-ki/直升機/helicopter
• 【飛龍機】poe-lêng-ki/pue-lîng-ki/飛機/airplane
• 【航空器】hâng-khong-khì/hâng-khong-khì/航空器/aircraft