宇宙漫遊者

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Wanderers
• 影片來源：視覺：Erik Wernquist; 音樂：Christian Sandquist; 文字 kah 聲音：Carl Sagan
• 台文翻譯：An-Li Tsai (NCU)

[漢羅] 宇宙漫遊者

人類 ê 探險，上遠是到佗位？ 這支影片 是 kā 誠實 ê 太空影像 kah 想像 ê 太空空間 合做這支視覺化影片。 內容是會信–ê，上無 tī 咱 太陽系 ê 部份是合理–ê。 影片 內底較奇幻 ê 部份，是模擬未來人類 浮 tī 太空中 迵過 土星環、用附近 ê 太空船探索 木星、tī 重力足低 ê 天王星 衛星 頂懸 ùi 山崁 跳落去 ê 情形。 雖罔講 未來會按怎，無人知影。 毋過毋管是宇宙漫遊 抑是 探索未知 ê 世界，tùi 人類來講，攏是 身體 上 kah 智力 上 ê 考驗。 這攏是展現 人類精神力 ê 一部份，嘛是過去一直 支持人類活落去 ê 力量。

[POJ] Ú-tiū Bān-iû-chiá

Jîn-lūi ê thàm-hiám, siōng hn̄g sī ē kàu toh-ūi? Chit-ki iáⁿ-phìⁿ sī kā chiâⁿ-si̍t ê thài-khong iáⁿ-siōng kah sióng-siōng ê thài-khong khong-kan ha̍p chò chit-ki sī-kak-hòa iáⁿ-phìⁿ. Lōe-iông sī ē sìn–ê, siōng-bô tī lán Thài-iông-hē ê pō͘-hūn sī ha̍p-lí–ê. Iáⁿ-phìⁿ lāi-té khah kî-hoàn ê pō͘-hūn, sī bô͘-gí bī-lâi jîn-lūi phû tī thài-khong tiong thàng-kòe Thó͘-chheⁿ-khoân, iōng hù-kīn ê thài-khong-chûn thàm-soh Bo̍k-chheⁿ, tī tiōng-le̍k chiok kē ê Thian-ông-chheⁿ ōe-chheⁿ téng-koân ùi soaⁿ-khàm thiàu–lo̍h-khì ê chêng-hêng. Sui-bóng kóng bī-lâi ē án-ná, bô lâng chai-iáⁿ. M̄-koh m̄-koán sī ú-tiū bān-iû ia̍h-sī thàm-soh bī-ti ê sè-kài, tùi jîn-lūi lâi kóng, lóng sī sin-thé siōng kah tì-le̍k siōng ê khó-giām. Che lóng sī tián-hiān jîn-lūi cheng-sîn-le̍k ê chi̍t-pō͘-hūn, mā sī kòe-khì it-ti̍t chi-chhî jîn-lūi oa̍h–lo̍h-khì ê le̍k-liōng.

[KIP] Ú-tiū Bān-iû-tsiá

Jîn-luī ê thàm-hiám, siōng hn̄g sī ē kàu toh-uī? Tsit-ki iánn-phìnn sī kā tsiânn-si̍t ê thài-khong iánn-siōng kah sióng-siōng ê thài-khong khong-kan ha̍p tsò tsit-ki sī-kak-huà iánn-phìnn. Luē-iông sī ē sìn–ê, siōng-bô tī lán Thài-iông-hē ê pōo-hūn sī ha̍p-lí–ê. Iánn-phìnn lāi-té khah kî-huàn ê pōo-hūn, sī bôo-gí bī-lâi jîn-luī phû tī thài-khong tiong thàng-kuè Thóo-tshenn-khuân, iōng hù-kīn ê thài-khong-tsûn thàm-soh Bo̍k-tshenn, tī tiōng-li̍k tsiok kē ê Thian-ông-tshenn uē-tshenn tíng-kuân uì suann-khàm thiàu–lo̍h-khì ê tsîng-hîng. Sui-bóng kóng bī-lâi ē án-ná, bô lâng tsai-iánn. M̄-koh m̄-kuán sī ú-tiū bān-iû ia̍h-sī thàm-soh bī-ti ê sè-kài, tuì jîn-luī lâi kóng, lóng sī sin-thé siōng kah tì-li̍k siōng ê khó-giām. Tse lóng sī tián-hiān jîn-luī tsing-sîn-li̍k ê tsi̍t-pōo-hūn, mā sī kuè-khì it-ti̍t tsi-tshî jîn-luī ua̍h–lo̍h-khì ê li̍k-liōng.

[English] Wanderers

How far out will humanity explore? If this video’s fusion of real space imagery and fictional space visualizations is on the right track, then at least the Solar System. Some of the video’s wondrous sequences depict future humans drifting through the rings of Saturn, exploring Jupiter from a nearby spacecraft, and jumping off a high cliff in the low gravity of a moon of Uranus. Although no one can know the future, wandering and exploring beyond boundaries – both physical and intellectual – is part of the human spirit and has frequently served humanity well in the past.

詞彙學習（漢羅/POJ/KIP/華語/English）

• 【宇宙漫遊者】ú-tiū bān-iû-chiá/ú-tiū bān-iû-tsiá/宇宙漫遊者/wanderer
• 【土星環】Thó͘-chheⁿ-khoân/Thóo-tshenn-khuân/土星環/ring of Saturn
• 【木星】Bo̍k-chheⁿ/Bo̍k-tshenn/木星/Jupiter
• 【天王星衛星】Thian-ông-chheⁿ ōe-chheⁿ/Thian-ông-tshenn uē-tshenn/天王星衛星/moon of Uranus
• 【重力】tiōng-le̍k/tiōng-li̍k/重力/gravity
• 【太陽系】Thài-iông-hē/Thài-iông-hē/太陽系/the Solar System
• 【視覺化】sī-kak-hòa/sī-kak-huà/視覺化/visualizations