欲離開 ê ZTF 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Outbound Comet ZTF
• 影像來源 kah 版權：Rolando Ligustri
• 台文翻譯：An-Li Tsai (NCU)

[漢羅] 欲離開 ê ZTF 彗星

北天夜空 進前上衝 ê 主角 彗星 C/2022E3 (ZTF 彗星)，這馬已經 愈來愈暗 矣。 二月初 是 ZTF 彗星 kah 咱地球 距離上倚 ê 時陣，彼馬 ê 距離才 2.3 光分遠爾爾。 這位 ùi 外太陽系 ê Oort 雲 來--ê 人客，去 hŏng 叫做青色彗星。 伊這馬離咱是 13.3 光分遠。 這張 kā 幾若張感光相片組合起來 ê 深空影像是 3 月 21 翕--ê。 咱看這粒彗星猶有闊幅 ê 白色彗尾 kah 彎曲 ê 青色彗鬚。 ZTF 彗星 tī 天頂 kah 獵戶座 上光彼粒星 參宿七 ê 視距離，毋是蓋遠。 這張影像 ê 視野範圍內，有 ZTF 彗星、較暗閣厚塗粉 ê 星雲、kah 遙遠 ê 背景星系。 這張用長焦鏡頭向 波江座 方向 翕--ê 景色內底，密密攏是銀河系 ê 恆星。 ZTF 彗鬚愈飛向內太陽系，伊踅太陽 ê 軌道就愈受著木星重力 ê 影響。 按呢可能會予彗星離開了後，就 袂閣轉來矣。

[POJ] Beh lī-khui ê ZTF hūi-chheⁿ

Pak-thian iā-khong chìn-chêng siōng chhèng ê chú-kak Hūi-chheⁿ C/2022E3 (ZTF hūi-chheⁿ), chit-má í-keng lú lâi lú àm--ah. Jī goe̍h chhoe sī ZTF hūi-chheⁿ kah lán Tē-kiû kū-lī siōng óa ê sî-chūn, hit-má ê kū-lī chiah 2.3 kng-hun hn̄g niā-niā. Chit-ūi ùi Gōa Thài-iông-hē ê Oort hûn lâi--ê lâng-kheh, khì hŏng kiò-chò chheⁿ-sek hūi-chheⁿ. I chit-má lī lán sī 13.3 kng-hun hn̄g. Chit-tiuⁿ kā kúi-ā tiuⁿ kám-kng siòng-phìⁿ cho͘-ha̍p khí-lâi ê chhim-khòng iáⁿ-siōng sī 3 goe̍h 21 hip--ê. Lán khòaⁿ chit-lia̍p hūi-chheⁿ iáu ū khoah-pak ê pe̍h-sek hūi-bóe kah oan-khiau ê chheⁿ-sek hūi-chhiu. ZTF hūi-chheⁿ tī thiⁿ-téng kah La̍h-hō͘-chō siōng kng hit-lia̍p chheⁿ Chham-siù-chhit ê sī-kū-lī, m̄-sī kài hn̄g. Chit-tiuⁿ iáⁿ-siōng ê sī-iá hoān-ûi lāi, ū ZTF hūi-chheⁿ, khah àm koh kāu thô͘-hún ê seng-hûn, kah iâu-oán ê pōe-kéng seng-hē. Chit-tiuⁿ siōng tn̂g-chiau kiàⁿ-thâu hiòng Pho-kang-chō hong-hiòng hip--ê kéng-sek lāi-té, ba̍t-ba̍t lóng sī Gîn-hô-hē ê hêng-chheⁿ. ZTF hūi-chhiu lú poe hiòng Lōe Thài-iông-hē, i se̍h Thài-iông ê kúi-tō to̍h lú siū-tio̍h Bo̍k-chheⁿ tiōng-le̍k ê éng-hióng. Án-ni khó-lêng ē hō͘ hūi-chheⁿ lī-khui liáu-āu, to̍h bē koh tńg-lâi--ah.

[KIP] Beh lī-khui ê ZTF huī-tshenn

Pak-thian iā-khong tsìn-tsîng siōng tshìng ê tsú-kak Huī-tshenn C/2022È (ZTF huī-tshenn), tsit-má í-king lú lâi lú àm--ah. Jī gue̍h tshue sī ZTF huī-tshenn kah lán Tē-kiû kū-lī siōng uá ê sî-tsūn, hit-má ê kū-lī tsiah 2.3 kng-hun hn̄g niā-niā. Tsit-uī uì Guā Thài-iông-hē ê Oort hûn lâi--ê lâng-kheh, khì hŏng kiò-tsò tshenn-sik huī-tshenn. I tsit-má lī lán sī 13.3 kng-hun hn̄g. Tsit-tiunn kā kuí-ā tiunn kám-kng siòng-phìnn tsoo-ha̍p khí-lâi ê tshim-khòng iánn-siōng sī 3 gue̍h 21 hip--ê. Lán khuànn tsit-lia̍p huī-tshenn iáu ū khuah-pak ê pe̍h-sik huī-bué kah uan-khiau ê tshenn-sik huī-tshiu. ZTF huī-tshenn tī thinn-tíng kah La̍h-hōo-tsō siōng kng hit-lia̍p tshenn Tsham-siù-tshit ê sī-kū-lī, m̄-sī kài hn̄g. Tsit-tiunn iánn-siōng ê sī-iá huān-uî lāi, ū ZTF huī-tshenn, khah àm koh kāu thôo-hún ê sing-hûn, kah iâu-uán ê puē-kíng sing-hē. Tsit-tiunn siōng tn̂g-tsiau kiànn-thâu hiòng Pho-kang-tsō hong-hiòng hip--ê kíng-sik lāi-té, ba̍t-ba̍t lóng sī Gîn-hô-hē ê hîng-tshenn. ZTF huī-tshiu lú pue hiòng Luē Thài-iông-hē, i se̍h Thài-iông ê kuí-tō to̍h lú siū-tio̍h Bo̍k-tshenn tiōng-li̍k ê íng-hióng. Án-ni khó-lîng ē hōo huī-tshenn lī-khui liáu-āu, to̍h bē koh tńg-lâi--ah.

[English] Outbound Comet ZTF

Former darling of the northern sky Comet C/2022E3 (ZTF) has faded. During its closest approach to our fair planet in early February Comet ZTF was a mere 2.3 light-minutes distant. Then known as the green comet, this visitor from the remote Oort Cloud is now nearly 13.3 light-minutes away. In this deep image, composed of exposures captured on March 21, the comet still sports a broad, whitish dust tail and greenish tinted coma though. Not far on the sky from Orion's bright star Rigel, Comet ZTF shares the field of view with faint, dusty nebulae and distant background galaxies. The telephoto frame is crowded with Milky Way stars toward the constellation Eridanus. The influence of Jupiter's gravity on the comet's orbit as ZTF headed for the inner solar system, may have set the comet on an outbound journey, never to return.

詞彙學習