捲螺仔星系 NGC 2841

Page(/daily/2023/03/20230323)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 捲螺仔星系 NGC 2841

咱會當 tī 北天 ê 大熊座 方向揣著捲螺仔星系 NGC 2841,伊是 夜空 中算袂䆀揣 ê 天體,離咱才 4600 萬光年遠爾爾。 這張 清楚相片中央 有一个華麗 ê 島宇宙。 前景 ê 光針,其實是銀河系內底 ê 恆星,kah 背景遙遠 ê 星系,做伙出現 tī 仝一个望遠鏡景色內底。 NGC 2841 有一个光 iàⁿ-iàⁿ ê 星系核,坦敧 ê 星系盤,kah 暗淡 ê 外部區域。 星系內底 花貓貓、 絚絚 ê 捲螺仔手骨 頂懸,有塗粉帶、較細區 ê 恆星形成區、kah 少年星團。 相對來講,大部份其他捲螺仔星系 ê 捲螺仔手骨攏較闊、較散,嘛有較大區 ê 恆星形成區。 NGC 2841 ê 直徑超過 15 萬 光年,比咱銀河系閣較大。 X 光影像 表示講,巨星 ê 大尺度噴流 kah 恆星爆炸產生 ê 高溫氣體雲煙,會湠到 NGC 2841 ê 星系暈去。

[POJ] Kńg-lê-á-seng-hē NGC 2841

Lán ē-tàng tī pak-thian ê Tāi-hîm-chō hong-hiòng chhōe-tio̍h kńg-lê-á-seng-hē NGC 2841, i sī iā-khong tiong sǹg bē-bái chhōe ê thian-thé, lī lán chiah 4600 bān kng-nî hn̄g niā-niā. Chit-tiuⁿ chheng-chhó siòng-phìⁿ tiong-ng ū chi̍t-ê hôa-lē ê tó-ú-tiū. Chiân-kéng ê kng-chiam, kî-si̍t sī Gîn-hô-hē lāi-té ê hêng-chheⁿ, kah pōe-kéng iâu-oán ê seng-hē, chòe-hóe chhut-hiān tīkāng chi̍t-ê bōng-oán-kiàⁿ kéng-sek lāi-té. NGC 2841 ū chi̍t-ê kng-iàⁿ-iàⁿ ê seng-hē-he̍k, thán-khi ê seng-hē-pôaⁿ, kah àm-tām ê gōa-pō͘ khu-he̍k. Seng-hē lāi-té hoe niau-niau, se̍h ân-ân ê kńg-lê-á-chhiú-kut téng-koân, ū thô͘-hún-tòa, khah sè-khu ê hêng-chheⁿ hêng-sêng-khu, kah siàu-liân seng-thoân. Siong-tùi lâi kóng, tōa-pō͘-hūn kî-tha kńg-lê-á-seng-hē ê kńg-lê-á-chhiú-kut lóng khah khoah, khah sòaⁿ, mā ū khah tōa-khu ê hêng-chheⁿ hêng-sêng-khu. NGC 2841 ê ti̍t-kèng chhiau-kòe 15 bān kng-nî, pí lán Gîn-hô-hē koh-khah tōa. X kng iáⁿ-siōng piau-sī kóng, kū-chheⁿ ê tōa-chhioh-tō͘ phùn-liû kah hêng-chheⁿ po̍k-chà sán-seng ê ko-un khì-thé hûn-ian, ē thòaⁿ kàu NGC 2841 ê seng-hē-n̄g khì.

[KIP] Kńg-lê-á-sing-hē NGC 2841

Lán ē-tàng tī pak-thian ê Tāi-hîm-tsō hong-hiòng tshuē-tio̍h kńg-lê-á-sing-hē NGC 2841, i sī iā-khong tiong sǹg bē-bái tshuē ê thian-thé, lī lán tsiah 4600 bān kng-nî hn̄g niā-niā. Tsit-tiunn tshing-tshó siòng-phìnn tiong-ng ū tsi̍t-ê huâ-lē ê tó-ú-tiū. Tsiân-kíng ê kng-tsiam, kî-si̍t sī Gîn-hô-hē lāi-té ê hîng-tshenn, kah puē-kíng iâu-uán ê sing-hē, tsuè-hué tshut-hiān tīkāng tsi̍t-ê bōng-uán-kiànn kíng-sik lāi-té. NGC 2841 ū tsi̍t-ê kng-iànn-iànn ê sing-hē-hi̍k, thán-khi ê sing-hē-puânn, kah àm-tām ê guā-pōo khu-hi̍k. Sing-hē lāi-té hue niau-niau, se̍h ân-ân ê kńg-lê-á-tshiú-kut tíng-kuân, ū thôo-hún-tuà, khah sè-khu ê hîng-tshenn hîng-sîng-khu, kah siàu-liân sing-thuân. Siong-tuì lâi kóng, tuā-pōo-hūn kî-tha kńg-lê-á-sing-hē ê kńg-lê-á-tshiú-kut lóng khah khuah, khah suànn, mā ū khah tuā-khu ê hîng-tshenn hîng-sîng-khu. NGC 2841 ê ti̍t-kìng tshiau-kuè 15 bān kng-nî, pí lán Gîn-hô-hē koh-khah tuā. X kng iánn-siōng piau-sī kóng, kū-tshenn ê tuā-tshioh-tōo phùn-liû kah hîng-tshenn po̍k-tsà sán-sing ê ko-un khì-thé hûn-ian, ē thuànn kàu NGC 2841 ê sing-hē-n̄g khì.

[English] Spiral Galaxy NGC 2841

A mere 46 million light-years distant, spiral galaxy NGC 2841 can be found in planet Earth’s night sky toward the northern constellation of Ursa Major. This sharp image centered on the gorgeous island universe also captures spiky foreground Milky Way stars and more distant background galaxies within the same telescopic field of view. It shows off the bright nucleus of NGC 2841, along with its inclined galactic disk, and faint outer regions. Dust lanes, small star-forming regions, and young star clusters are embedded in the galaxy’s patchy, tightly wound spiral arms. In contrast, many other spirals exhibit broader, sweeping arms with large star-forming regions. NGC 2841 has a diameter of over 150,000 light-years, making it even larger than our own Milky Way. X-ray images suggest that extreme outflows from giant stars and stellar explosions create plumes of hot gas extending into a halo around NGC 2841.

詞彙學習(漢羅/POJ/KIP/華語/English)

  • 【捲螺仔星系】kńg-lê-á-seng-hē/kńg-lê-á-sing-hē/螺旋星系/spiral galaxy
  • 【捲螺仔手骨】kńg-lê-á-chhiú-kut/kńg-lê-á-tshiú-kut/旋臂/spiral arms
  • 【NGC 2841】NGC jī-pat-sù-it/NGC jī-pat-sù-it/NGC 2841/NGC 2841
  • 【大熊座】Tāi-hîm-chō/Tāi-hîm-tsō/大熊座/Ursa Major
  • 【島宇宙】tó-ú-tiū/tó-ú-tiū/島宇宙/island universe
  • 【銀河系】Gîn-hô-hē/Gîn-hô-hē/銀河系/Milky Way
  • 【星系核】seng-hē-he̍k/sing-hē-hi̍k/星系核/galactic nucleus
  • 【星系盤】seng-hē-pôaⁿ/sing-hē-puânn/星系盤/galactic disk
  • 【光針】kng-chiam/kng-tsiam/針狀光芒/spike
  • 【塗粉帶】thô͘-hún-tòa/thôo-hún-tuà/灰塵帶/dust lane
  • 【恆星形成區】hêng-chheⁿ hêng-sêng-khu/hîng-tshenn hîng-sîng-khu/恆星形成區/star-forming regions
  • 【星團】seng-thoân/sing-thuân/星團/star cluster
  • 【大尺度噴流】tōa-chhioh-tō͘ phùn-liû/tuā-tshioh-tōo phùn-liû/大尺度噴流/outflows
  • 【雲煙】hûn-ian/hûn-ian/羽狀流/plumes
  • 【星系暈】seng-hē-n̄g/sing-hē-n̄g/星系暈/halo
  • 【直徑】ti̍t-kèng/ti̍t-kìng/直徑/diameter
  • 【巨星】kū-chheⁿ/kū-tshenn/巨星/giant star

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:M31:仙女座星系 明仔載 ê 圖:欲離開 ê ZTF 彗星