土星 ê 月娘 土衛七 Hyperion：有古老隕石坑 ê 衛星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Saturn’s Hyperion: A Moon with Odd Craters
• 影像來源：NASA, ESA, JPL, SSI, Cassini Imaging Team
• 台文翻譯：An-Li Tsai (NCU)

[漢羅] 土星 ê 月娘 土衛七 Hyperion：有古老隕石坑 ê 衛星

土衛七 Hyperion 頂懸彼个奇怪 ê 隕石坑下底有啥物？ 為著欲揣出這个答案，過去踅 土星 ê Cassini 機器人太空船 捌 飛倚到 這个看–起來敢若 海綿材質 ê 衛星 附近，才會翕著 這个空前 ê 細節相片。 這張 是 Cassini 太空船 2005 年飛過 土衛七 Hyperion 彼陣翕–ê，是 ùi 六張相片鬥–出來 ê 拼鬥影像。 咱看會著一个足精彩 ê 世界，內底有奇怪 ê 隕石坑 kah 古老 ê 類海綿地表。 Tī 大部份隕石坑底部，攏有一款 咱無啥了解 ê 豬肝紅物質。 這款物質看–起來 kah 崁 tī 土衛八 Iapetus 表面 ê 物質相 siâng。 而且等伊 吸收溫暖 ê 日光 了後，這寡物質可能就會沉入去這粒 冰衛星 下底。 土衛七 Hyperion 差不多有 250 公里闊，伊 ê 自轉足亂–ê，而且伊 ê 密度足低–ê，所以伊 內底可能有 一个足大 ê 岩洞 系統。

[POJ] Thó͘-chheⁿ ê Goe̍h-niû Thó͘-ōe-chhit Hyperion: Ū kó͘-ló ún-se̍k-kheⁿ ê ōe-chheⁿ

Thó͘-ōe-chhit Hyperion téng-koân hit-ê kî-koài ê ún-se̍k-kheⁿ ē-té ū siáⁿ-mi̍h? Ūi-tio̍h beh chhōe-chhut chit-ê tap-àn, kòe-khì se̍h Thó͘-chheⁿ ê Cassini ke-khì-lâng thài-khong-chûn bat poe óa kàu chit-ê khòaⁿ–khí-lâi ká-ná hái-mî châi-chit ê ōe-chheⁿ hù-kīn, chiah ē hip-tio̍h chit-ê khong-chiân ê sè-chiat siòng-phìⁿ. Chit tiuⁿ sī Cassini thài-khong-chûn 2005 nî poe kòe Thó͘-ōe-chhit Hyperion hit-chūn hip–ê, sī ùi la̍k tiuⁿ siòng-phìⁿ tàu–chhut-lâi ê pheng-tàu-iáⁿ-siōng. Lán khòaⁿ-ē-tio̍h chit-ê chiok cheng-chhái ê sè-kài, lāi-té ū kî-koài ê ún-se̍k-kheⁿ kah kó͘-ló ê lūi-hái-mî tē-piáu. Tī tōa-pō͘-hūn ún-se̍k-kheⁿ té-pō͘, lóng ū chi̍t-khoán lán bô saⁿ liáu-kái ê ti-koaⁿ-âng bu̍t-chit. Chit-khoán bu̍t-chit khòaⁿ–khí-lâi kah khàm tī Thó͘-ōe-pat Iapetus piáu-bīn ê bu̍t-chit sio-siâng. Jî-chhiáⁿ tán i khip-siu un-loán ê ji̍t-kng liáu-āu, chit-kóa bu̍t-chit khó-lêng to̍h ē tîm ji̍p-khì chit-lia̍p peng-ōe-chheⁿ ē-té. Thó͘-ōe-chhit Hyperion chha-put-to ū 250 kong-lí khoah, i ê chū-choán chiok loān–ê, jî-chhiáⁿ i ê bi̍t-tō͘ chiok kē–ê, só͘-í i lāi-té khó-lêng ū chi̍t-ê chiok tōa ê giâm-tōng hē-thóng.

[KIP] Thóo-tshenn ê Gue̍h-niû Thóo-uē-tshit Hyperion: Ū kóo-ló ún-si̍k-khenn ê uē-tshenn

Thóo-uē-tshit Hyperion tíng-kuân hit-ê kî-kuài ê ún-si̍k-khenn ē-té ū siánn-mi̍h? Uī-tio̍h beh tshuē-tshut tsit-ê tap-àn, kuè-khì se̍h Thóo-tshenn ê Cassini ke-khì-lâng thài-khong-tsûn bat pue uá kàu tsit-ê khuànn–khí-lâi ká-ná hái-mî tsâi-tsit ê uē-tshenn hù-kīn, tsiah ē hip-tio̍h tsit-ê khong-tsiân ê sè-tsiat siòng-phìnn. Tsit tiunn sī Cassini thài-khong-tsûn 2005 nî pue kuè Thóo-uē-tshit Hyperion hit-tsūn hip–ê, sī uì la̍k tiunn siòng-phìnn tàu–tshut-lâi ê phing-tàu-iánn-siōng. Lán khuànn-ē-tio̍h tsit-ê tsiok tsing-tshái ê sè-kài, lāi-té ū kî-kuài ê ún-si̍k-khenn kah kóo-ló ê luī-hái-mî tē-piáu. Tī tuā-pōo-hūn ún-si̍k-khenn té-pōo, lóng ū tsi̍t-khuán lán bô sann liáu-kái ê ti-kuann-âng bu̍t-tsit. Tsit-khuán bu̍t-tsit khuànn–khí-lâi kah khàm tī Thóo-uē-pat Iapetus piáu-bīn ê bu̍t-tsit sio-siâng. Jî-tshiánn tán i khip-siu un-luán ê ji̍t-kng liáu-āu, tsit-kuá bu̍t-tsit khó-lîng to̍h ē tîm ji̍p-khì tsit-lia̍p ping-uē-tshenn ē-té. Thóo-uē-tshit Hyperion tsha-put-to ū 250 kong-lí khuah, i ê tsū-tsuán tsiok luān–ê, jî-tshiánn i ê bi̍t-tōo tsiok kē–ê, sóo-í i lāi-té khó-lîng ū tsi̍t-ê tsiok tuā ê giâm-tōng hē-thóng.

[English] Saturn’s Hyperion: A Moon with Odd Craters

What lies at the bottom of Hyperion’s strange craters? To help find out, the robot Cassini spacecraft that once orbited Saturn swooped past the sponge-textured moon and took images of unprecedented detail. A six-image mosaic from the 2005 pass, featured here in scientifically assigned colors, shows a remarkable world strewn with strange craters and an odd, sponge-like surface. At the bottom of most craters lies some type of unknown dark reddish material. This material appears similar to that covering part of another of Saturn’s moons, Iapetus, and might sink into the ice moon as it better absorbs warming sunlight. Hyperion is about 250 kilometers across, rotates chaotically, and has a density so low that it likely houses a vast system of caverns inside.

詞彙學習（漢羅/POJ/KIP/華語/English）

• 【土星】Thó͘-chheⁿ/Thóo-tshenn/土星/Saturn
• 【衛星】ōe-chheⁿ/uē-tshenn/衛星/moon
• 【土衛七 Hyperion】Thó͘-ōe-chhit/Thóo-uē-tshit/土衛七海柏利昂/Hyperion
• 【Cassini 太空船】Cassini thài-khong-chûn/Cassini thài-khong-tsûn/卡西尼號太空船/Cassini spacecraft
• 【類海綿】lūi-hái-mî/luī-hái-mî/類海綿/sponge-like
• 【拼鬥影像】pheng-tàu-iáⁿ-siōng/phing-tàu-iánn-siōng/馬賽克/mosaic
• 【隕石坑】ún-se̍k-kheⁿ/ún-si̍k-khenn/隕石坑/craters
• 【冰衛星】peng-ōe-chheⁿ/ping-uē-tshenn/冰衛星/ice moon
• 【岩洞】giâm-tōng/giâm-tōng/岩洞/caverns
• 【土衛八 Iapetus】Thó͘-ōe-pat/Thóo-uē-pat/土衛八伊阿珀托斯/Iapetus
• 【自轉】chū-choán/tsū-tsuán/自轉/rotate
• 【密度】bi̍t-tō͘/bi̍t-tōo/密度/density