深空影像：大麥哲倫星雲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Deep Field: The Large Magellanic Cloud
• 影像來源 kah 版權：Yuri Beletsky (Carnegie Las Campanas Observatory, TWAN)
• 你 ê 生日禮物：你生日這工 ê APOD 相片是啥物？ (post 1995)
• 台文翻譯：An-Li Tsai (NCU)

[漢羅] 深空影像：大麥哲倫星雲

這个敢是 捲螺仔星系？毋是呢！ 實際上，這个是 大麥哲倫星雲 (LMC)，是咱 銀河系 上大 ê 衛星星系。 LMC 去予 分類 做 不規則矮星系，因為伊 看起來花 kô-kô、鬍 sap-sap。 毋過這張深空闊幅相片，有 kā 這規个 LMC 翕予清楚。 這張長時間感光相片予人感覺意外 ê 是，LMC 看起來較成一个 棍螺仔星系。 大麥哲倫星雲 是 tī 18 萬 光年 遠 ê 所在，就 tī 旗魚 星座 (劍魚座) 遐。 LMC ê 大細差不多是 1 萬 5000 光年大。 是近代 上光 上近 ê 超新星 SN1987A in 兜。 咱若是 tī 地球南半球，會使直接用目睭 看著 LMC kah 小麥哲倫星雲 (SMC)。

[POJ] Chhim-khong iáⁿ-siōng: Tōa Be̍h-tiat-lûn

Chit ê kám sī kńg-lê-á-seng-hē? M̄-sī neh! Si̍t-chè siōng, chit-ê sī Tōa Be̍h-tiat-lûn-seng-hûn (LMC), sī lán Gîn-hô-hē siōng tōa ê ōe-chheⁿ-seng-hē. LMC khì hō͘ hun-lūi chò put-kui-chek é-seng-hē, in-ūi i khòaⁿ–khí-lâi hoe-kô-kô, hô͘-sap-sap。 M̄-koh chit tiuⁿ chhim-khòng khoah-pak siòng-phìⁿ, ū kā chit kui-ê LMC hip hō͘ chheng-chhó. Chit tiuⁿ tn̂g sî-kan kám-kng siòng-phìⁿ hō͘ lâng kám-kak ì-gōa ê sī, LMC khòaⁿ-khí-lâi khah sêng chit ê kùn-lê-á-seng-hē. Tōa Be̍h-tiat-lûn-seng-hûn sī tī 18 bān kng-nî hn̄g ê só͘-chāi, to̍h tī Kî-hî-seng-chō (Kiàm-hî-chō) hiah. LMC ê tōa-sè chha-put-to sī 1 bān 5000 kng-nî tōa. Sī kīn-tāi siōng kng siōng kīn ê chhiau-sin-seng SN1987A in tau. Lán nā-sī tī Tē-kiû lâm-pòaⁿ-kiû, ē-sái ti̍t-chiap iōng ba̍k-chiu khòaⁿ-tio̍h LMC kah Sió Be̍h-tiat-lûn-seng-hûn (SMC).

[KIP] Tshim-khong iánn-siōng: Tuā Be̍h-tiat-lûn

Tsit ê kám sī kńg-lê-á-sing-hē? M̄-sī neh! Si̍t-tsè siōng, tsit-ê sī Tuā Be̍h-tiat-lûn-sing-hûn (LMC), sī lán Gîn-hô-hē siōng tuā ê uē-tshenn-sing-hē. LMC khì hōo hun-luī tsò put-kui-tsik é-sing-hē, in-uī i khuànn–khí-lâi hue-kô-kô, hôo-sap-sap。 M̄-koh tsit tiunn tshim-khòng khuah-pak siòng-phìnn, ū kā tsit kui-ê LMC hip hōo tshing-tshó. Tsit tiunn tn̂g sî-kan kám-kng siòng-phìnn hōo lâng kám-kak ì-guā ê sī, LMC khuànn-khí-lâi khah sîng tsit ê kùn-lê-á-sing-hē. Tuā Be̍h-tiat-lûn-sing-hûn sī tī 18 bān kng-nî hn̄g ê sóo-tsāi, to̍h tī Kî-hî-sing-tsō (Kiàm-hî-tsō) hiah. LMC ê tuā-sè tsha-put-to sī 1 bān 5000 kng-nî tuā. Sī kīn-tāi siōng kng siōng kīn ê tshiau-sin-sing SN1987A in tau. Lán nā-sī tī Tē-kiû lâm-puànn-kiû, ē-sái ti̍t-tsiap iōng ba̍k-tsiu khuànn-tio̍h LMC kah Sió Be̍h-tiat-lûn-sing-hûn (SMC).

[English] Deep Field: The Large Magellanic Cloud

Is this a spiral galaxy? No. Actually, it is the Large Magellanic Cloud (LMC), the largest satellite galaxy of our own Milky Way Galaxy. The LMC is classified as a dwarf irregular galaxy because of its normally chaotic appearance. In this deep and wide exposure, however, the full extent of the LMC becomes visible. Surprisingly, during longer exposures, the LMC begins to resemble a barred spiral galaxy. The Large Magellanic Cloud lies only about 180,000 light-years distant towards the constellation of the Dolphinfish (Dorado). Spanning about 15,000 light-years, the LMC was the site of SN1987A, the brightest and closest supernova in modern times. Together with the Small Magellanic Cloud (SMC), the LMC can be seen in Earth’s southern hemisphere with the unaided eye.

詞彙學習（漢羅/POJ/KIP/華語/English）

• 【大麥哲倫星雲】Tōa Be̍h-tiat-lûn-seng-hûn/Tuā Be̍h-tiat-lûn-sing-hûn/大麥哲倫星雲/the Large Magellanic Cloud (LMC)
• 【小麥哲倫星雲】Sió Be̍h-tiat-lûn-seng-hûn/Sió Be̍h-tiat-lûn-sing-hûn/小麥哲倫星雲/the Small Magellanic Cloud (SMC)
• 【捲螺仔星系】kńg-lê-á-seng-hē/kńg-lê-á-sing-hē/螺旋星系/spiral galaxy
• 【棍螺仔星系】kùn-lê-á-seng-hē/kùn-lê-á-sing-hē/棒旋星系/barred spiral galaxy
• 【銀河系】Gîn-hô-hē/Gîn-hô-hē/銀河系/Milky Way Galaxy
• 【衛星星系】ōe-chheⁿ-seng-hē/uē-tshenn-sing-hē/衛星星系/satellite galaxy
• 【不規則矮星系】put-kui-chek é-seng-hē/put-kui-tsik é-sing-hē/不規則矮星系/irragular dwarf galaxy
• 【劍魚座】Kiàm-hî-chō/Kiàm-hî-tsō/劍魚座/Dorado
• 【超新星】chhiau-sin-seng/tshiau-sin-sing/超新星/supernova
• 【SN1987A】SN it-kiú-pat-chhit/SN it-kiú-pat-tshit/SN1987A/SN1987A
• 【深空】chhim-khong/tshim-khong/深空/deep filed
• 【闊幅】khoah-pak/khuah-pak/廣角/wide-field
• 【南半球】lâm-pòaⁿ-kiû/lâm-puànn-kiû/南半球/southern hemisphere