意大利天頂 ê 木星 kah 金星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Jupiter and Venus over Italy
• 影像來源 kah 版權：Giovanni Tumino
• 木金合相 ê 相簿:投稿到 APOD
• 台文翻譯：An-Li Tsai (NCU)

[漢羅] 意大利天頂 ê 木星 kah 金星

天頂彼兩个光點是啥物？是行星啦！ 幾若工前，這兩粒 tī 夜空 上光 ê 行星，tī 天頂才拄行到無到 1 度遠 ê 距離，這就是咱講 ê 合相。 全世界攏會使 tī 日落無偌久看著這个現象。 這兩个光點就是 木星 (倒爿彼粒) kah 金星 (正爿彼粒)。 這張相片 是 金木合相前後 tī 意大利 Sicily 島 ê Cirica 海邊仔翕--ê。 翕相 ê 前一禮拜，金星 tī 日落 彼陣 tī 天頂是愈來愈懸，去拄著欲落去 ê 木星。 毋過這馬 in 已經 換位 矣。 是講，kah 木星比--起來，金星 是離 太陽、嘛離 地球 kah 近。 所以咱看 金星 kah 木星 tī 天頂 ê 視距離，其實是 角度上 ê 距離。 這個月，你猶是會當 tī 日落了後一點鐘左右 ê 時間，看著 這兩粒熱門天體。 毋過 in 會愈行愈遠，木星 逐暗嘛會愈來愈早落去。

[POJ] I-tá-lī thiⁿ-téng ê Bo̍k-chheⁿ kah Kim-chheⁿ

Thiⁿ-téng hit nn̄g ê kng-tiám sī siáⁿ-mi̍h? Sī kiâⁿ-chheⁿ lah! Kúi-ā kang chêng, chit nn̄g lia̍p tī iā-khong siōng kng ê kiâⁿ-chheⁿ, tī thiⁿ-téng chiah tú kiâⁿ kàu bô kàu 1 tō͘ hn̄g ê kū-lī, che to̍h sī lán kóng ê ha̍p-siòng. Choân sè-kài lóng ē-sái tī ji̍t-lo̍h bô gōa-kú khòaⁿ-tio̍h chit-ê hiān-siōng. Chit nn̄g ê kng-tiám to̍h sī Bo̍k-chheⁿ (tò-pêng hit-lia̍p) kah Kim-chheⁿ (chiàⁿ-pêng hit-lia̍p). Chit tiuⁿ siòng-phìⁿ sī Kim-bo̍k-ha̍p-siòng chêng-āu tī I-tá-lī Sicily tó ê Cirica hái-piⁿ-á hip--ê. Hip-siòng ê chêng chi̍t lé-pài, Kim-chheⁿ tī ji̍t-lo̍h hit-chūn tī thiⁿ-téng sī lú lâi lú koân, khì tú-tio̍h beh lo̍h-khì ê Bo̍k-chheⁿ. M̄-koh chit-má in í-keng ōaⁿ ūi ah. Sī kóng, kah Bo̍k-chheⁿ pí--khí-lâi, Kim-chheⁿ sī lī Thài-iông, mā lī Tē-kiû kah kīn. Só͘-í lán khòaⁿ Kim-chheⁿ kah Bo̍k-chheⁿ tī thiⁿ-téng ê sī-kū-lī, kî-si̍t sī kak-tō͘ siōng ê kū-lī. Chit kò goe̍h, lí iáu-sī ē-tàng tī ji̍t-lo̍h liáu-āu chi̍t tiám-cheng chó-iū ê sî-kan, khòaⁿ-tio̍h chit nn̄g lia̍p jia̍t-mn̂g thian-thé. M̄-koh in ē lú kiâⁿ lú hn̄g, Bo̍k-chheⁿ ta̍k-àm mā ē lú lâi lú chá lo̍h-khì.

[KIP] I-tá-lī thinn-tíng ê Bo̍k-tshenn kah Kim-tshenn

Thinn-tíng hit nn̄g ê kng-tiám sī siánn-mi̍h? Sī kiânn-tshenn lah! Kuí-ā kang tsîng, tsit nn̄g lia̍p tī iā-khong siōng kng ê kiânn-tshenn, tī thinn-tíng tsiah tú kiânn kàu bô kàu 1 tōo hn̄g ê kū-lī, tse to̍h sī lán kóng ê ha̍p-siòng. Tsuân sè-kài lóng ē-sái tī ji̍t-lo̍h bô guā-kú khuànn-tio̍h tsit-ê hiān-siōng. Tsit nn̄g ê kng-tiám to̍h sī Bo̍k-tshenn (tò-pîng hit-lia̍p) kah Kim-tshenn (tsiànn-pîng hit-lia̍p). Tsit tiunn siòng-phìnn sī Kim-bo̍k-ha̍p-siòng tsîng-āu tī I-tá-lī Sicily tó ê Cirica hái-pinn-á hip--ê. Hip-siòng ê tsîng tsi̍t lé-pài, Kim-tshenn tī ji̍t-lo̍h hit-tsūn tī thinn-tíng sī lú lâi lú kuân, khì tú-tio̍h beh lo̍h-khì ê Bo̍k-tshenn. M̄-koh tsit-má in í-king uānn uī ah. Sī kóng, kah Bo̍k-tshenn pí--khí-lâi, Kim-tshenn sī lī Thài-iông, mā lī Tē-kiû kah kīn. Sóo-í lán khuànn Kim-tshenn kah Bo̍k-tshenn tī thinn-tíng ê sī-kū-lī, kî-si̍t sī kak-tōo siōng ê kū-lī. Tsit kò gue̍h, lí iáu-sī ē-tàng tī ji̍t-lo̍h liáu-āu tsi̍t tiám-tsing tsó-iū ê sî-kan, khuànn-tio̍h tsit nn̄g lia̍p jia̍t-mn̂g thian-thé. M̄-koh in ē lú kiânn lú hn̄g, Bo̍k-tshenn ta̍k-àm mā ē lú lâi lú tsá lo̍h-khì.

[English] Jupiter and Venus over Italy

What are those two bright spots? Planets. A few days ago, the two brightest planets in the night sky passed within a single degree of each other in what is termed a conjunction. Visible just after sunset in much of the world, the two bright spots were Jupiter (left) and Venus (right). The featured image was taken near closest approach from Cirica, Sicily, Italy. The week before, Venus was rising higher in the sunset sky to meet the dropping Jupiter. Now they have switched places. Of course, Venus remains much closer to both the Sun and the Earth than Jupiter -- the apparent closeness between the planets in the sky of Earth was only angular. You can still see the popular pair for an hour or so after sunset this month although they continue to separate, and Jupiter continues to set earlier each night.

詞彙學習