長蛇座星系團

Page(/daily/2023/02/20230216.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 長蛇座星系團

一个厭 siān ê 暗暝,我人 siān-siān,那睏那想,
是天文學課本?抑是 giōng 欲消失 ê 傳說?
煞雄雄發現 這張速翕相片,是宇宙深空,是奇幻世界,
這个景色,予我滿心敬畏,滿心感慨。

兩粒星,親像咧徛衛兵,chhāi tī 前景,
咱 ê 銀河系,hŏng 讚嘆 ê 景色,
後壁 ê 長蛇座星系團,星系滿滿是,
一億光年遠 ê 所在,欲講一个故事

三个大星系,有長株圓星系,有藍色捲螺仔星系,
In 是主角,是巨人,大細 15 萬光年,
毋過相疊 ê 星系對,顛倒煞著我,
編號 NGC 3314,媠甲無地比。

Abell 1060,長蛇座星系團
是咱銀河附近,三大星系團之一,
重力束縛 ê 宇宙,天體 ê 遊戲,
較大尺度 ê 星系團,攏愛照排,我無通主意。

這幅速翕相片,寸尺 130 百萬光年,
一億光年遠,宇宙級 ê 快樂,
短短影一下, 宇宙 ê 模樣
就算是按呢,伊總是會消失,永遠袂閣出現。

[POJ] Tn̂g-siâ-chō Seng-hē-thoân

Chi̍t-ê ià-siān ê àm-mî, góa lâng siān-siān, ná khùn ná siūⁿ,
Sī thian-bûn-ha̍k khò-pún? Ia̍h-sī giōng beh siau-sit ê thoân-soat?
Soah hiông-hiông hoat-hiān chit-tiuⁿ sok-hip siòng-phìⁿ, sī ú-tiū chhim-khong, sī kî-hoàn sè-kài,
Chit-ê kéng-sek, hō͘ góa móa-sim kèng-ùi, móa-sim kám-khài.

Nn̄g-lia̍p chhiⁿ, chhin-chhiūⁿ leh khiā ūi-peng, chhāi tī chiân-kéng,
Lán ê Gîn-hô-hē, hŏng chàn-thàn ê kéng-sek,
Āu-piah ê Tn̂g-siâ-chō seng-hē-thoân, seng-hē móa-móa sī,
Chi̍t-ek kng-nî hn̄g ê só͘-chāi, beh kóng chi̍t-ê kò͘-sū.

Saⁿ-ê tōa seng-hē, ū tn̂g-tu-îⁿ seng-hē, ū nâ-sek kńg-lê-á seng-hē,
In sī chú-kak, sī kū-jîn, tōa-sè 15 bān kng-nî,
M̄-koh sio-tha̍h ê seng-hē-tùi, tian-tò soah-tio̍h góa,
Pian-hō NGC 3314, súi kah bô-tè-pí.

Abell 1060, Tn̂g-siâ-chō seng-hē-thoân,
Sī lán Gîn-hô-hē hù-kīn, saⁿ tōa seng-hē-thoân chi it,
Tiōng-le̍k sok-pa̍k ê ú-tiū, thian-thé ê iû-hì,
Khah tōa chhioh-tō͘ ê seng-hē-thoân, lóng ài chiàu pâi, góa bô-thang chú-ì.

Chit-pak sok-hip siòng-phìⁿ, chhùn-chhioh 130 pah-bān kng-nî,
Chi̍t-ek kng-nî hn̄g, ú-tiū kip ê khoài-lo̍k,
Té-té iáⁿ chi̍t-ē, ú-tiū ê bô͘-iūⁿ,
To̍h sǹg sī án-ni, i chóng-sī ē siau-sit, éng-oán bē koh chhut-hiān.

[KIP] Tn̂g-siâ-tsō Sing-hē-thuân

Tsi̍t-ê ià-siān ê àm-mî, guá lâng siān-siān, ná khùn ná siūnn,
Sī thian-bûn-ha̍k khò-pún? Ia̍h-sī giōng beh siau-sit ê thuân-suat?
Suah hiông-hiông huat-hiān tsit-tiunn sok-hip siòng-phìnn, sī ú-tiū tshim-khong, sī kî-huàn sè-kài,
Tsit-ê kíng-sik, hōo guá muá-sim kìng-uì, muá-sim kám-khài.

Nn̄g-lia̍p tshinn, tshin-tshiūnn leh khiā uī-ping, tshāi tī tsiân-kíng,
Lán ê Gîn-hô-hē, hŏng tsàn-thàn ê kíng-sik,
Āu-piah ê Tn̂g-siâ-tsō sing-hē-thuân, sing-hē muá-muá sī,
Tsi̍t-ik kng-nî hn̄g ê sóo-tsāi, beh kóng tsi̍t-ê kòo-sū.

Sann-ê tuā sing-hē, ū tn̂g-tu-înn sing-hē, ū nâ-sik kńg-lê-á sing-hē,
In sī tsú-kak, sī kū-jîn, tuā-sè 15 bān kng-nî,
M̄-koh sio-tha̍h ê sing-hē-tuì, tian-tò suah-tio̍h guá,
Pian-hō NGC 3314, suí kah bô-tè-pí.

Abell 1060, Tn̂g-siâ-tsō sing-hē-thuân,
Sī lán Gîn-hô-hē hù-kīn, sann tuā sing-hē-thuân tsi it,
Tiōng-li̍k sok-pa̍k ê ú-tiū, thian-thé ê iû-hì,
Khah tuā tshioh-tōo ê sing-hē-thuân, lóng ài tsiàu pâi, guá bô-thang tsú-ì.

Tsit-pak sok-hip siòng-phìnn, tshùn-tshioh 130 pah-bān kng-nî,
Tsi̍t-ik kng-nî hn̄g, ú-tiū kip ê khuài-lo̍k,
Té-té iánn tsi̍t-ē, ú-tiū ê bôo-iūnn,
To̍h sǹg sī án-ni, i tsóng-sī ē siau-sit, íng-uán bē koh tshut-hiān.

[English] The Hydra Cluster of Galaxies

Once upon a midnight dreary, while I pondered weak and weary,
O’er volumes of astronomy and forgotten lore,
I stumbled upon this snapshot, cosmic and eerie,
A sight that filled my heart with awe and more.

Two stars, like sentinels, anchored the foreground,
Of our Milky Way galaxy, a sight to behold,
Beyond them, a cluster of Hydra, galaxies abound,
100 million light-years away, a story to be told.

Three large galaxies, ellipticals and a spiral blue,
Dominant and grand, each 150,000 light-years wide,
But it was the overlapping pair that caught my view,
Cataloged as NGC 3314, a sight I cannot hide.

Abell 1060, the Hydra galaxy cluster’s name,
One of three large galaxy clusters close to our Milky Way,
A universe bound by gravity, a celestial game,
Where clusters align over larger scales, I cannot sway.

At a distance of 100 million light-years, this snapshot’s size,
1.3 million light-years across, a cosmic delight,
A momentary glimpse into the universe’s guise,
But even this shall fade, and be nevermore in sight.

詞彙學習(漢羅/POJ/KIP/華語/English)

  • 【長蛇座星系團】Tn̂g-siâ-chō seng-hē-thoân/Tn̂g-siâ-tsō sing-hē-thuân/長蛇座星系團/the Hydra Cluster of Galaxies
  • 【星系團】seng-hē-thoân/sing-hē-thuân/星系團/galaxy cluster
  • 【長株圓星系】tn̂g-tu-îⁿ seng-hē/tn̂g-tu-înn sing-hē/橢圓星系/elliptical galaxy
  • 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
  • 【星系對】seng-hē-tùi/sing-hē-tuì/星系對/pair of galaxies
  • 【NGC 3314】NGC sam-sam-it-sù/NGC sam-sam-it-sù/NGC 3314/NGC 3314
  • 【Abell 1060】Abell it-khòng-lio̍k-khòng/Abell it-khòng-lio̍k-khòng/Abell 1060/Abell 1060
  • 【銀河系】Gîn-hô-hē/Gîn-hô-hē/銀河系/Milky Way galaxy
  • 【速翕相片】sok-hip siòng-phìⁿ/sok-hip siòng-phìnn/快照/snapshot

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:法國天頂 ê 氣輝 明仔載 ê 圖:2023 CX1 流星爍