ZTF 彗星 去拄著 ATLAS 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：ZTF meets ATLAS
• 影像來源 kah 版權：Stefan Bemmerl
• 台文翻譯：An-Li Tsai (NCU)

[漢羅] ZTF 彗星 去拄著 ATLAS 彗星

彗星 C/2022 E3 (ZTF 彗星) 飛過 地球北天 ê 時陣，已經無遐爾光矣。 這張相片就是伊 kah 另外一粒 彗星 C/2022 U2 (ATLAS 彗星) ê 合影。 這張相片是 2 月 6 號 tī 德國 ê Bavarian 樹林翕–ê。 這个天星滿滿 ê 天區是 tī 御夫座 ê 方向，視野有 2.5 度闊。 這兩粒彗星是 tī 2022 年 ê 巡天計畫「ZTF 凌星觀測儀器」kah「ATLAS 小行星挵地球 ê 最後警報系統」ê 時陣 揣著–ê。 ZTF 這粒 長週期彗星 頂個月才行到近日點，這馬已經欲離開太陽矣。 ATLAS 彗星是閣較暗，伊 1 月 29 才接近咱這粒 ê 美麗地球。 伊彼陣 kah 地球 ê 距離是 4.6 光分。 是講 ZTF 彗星 tī 2 月 2 號彼陣 kah 地球 ê 距離是 2.4 光分。 ZTF 彗星進前猶會當用目睭直接看，伊 ê 尾溜實在是生了袂䆀。 毋過這粒 ATLAS 彗星，就無遮爾媠 ê 尾溜矣。 這兩粒彗星攏有足明顯 ê 青色彗鬚，這是雙原子炭分子去予日光激發產生 ê 螢光。 ZTF 彗星這馬是雙筒千里鏡上好 ê 觀測目標，因為伊紲落來會迒過地球 ê 天頂。 Eng 暗伊會出現 tī 明亮 ê 火星附近。

[POJ] ZTF Hūi-chhiⁿ khì tú-tio̍h ATLAS Hūi-chhiⁿ

Hūi-chhiⁿ C/2022 E3 (ZTF hūi-chhiⁿ) poe kòe Tē-kiû pak-thian ê sî-chūn, í-keng bô hiah-nī kng–ah. Chit tiuⁿ siòng-phìⁿ to̍h sī i kah lēng-gōa chi̍t lia̍p Hūi-chhiⁿ C/2022 U2 (ATLAS hūi-chhiⁿ) ê ha̍p-iáⁿ. Chit tiuⁿ siòng-phìⁿ sī 2 goe̍h 6 hō tī Tek-kok ê Bavarian chhiū-nâ hip–ê. Chit ê thiⁿ-chhiⁿ móa-móa ê thian-khu sī tī Gū-hu-chō ê hong-hiòng, sī-iá ū 2.5 tō͘ khoah. Chit nn̄g lia̍p hūi-chhiⁿ sī tī 2022 nî ê sûn-thian-kè-ōe “ZTF Lêng-chhiⁿ Koan-chhek gî-khì” kah「ATLAS Sió-kiâⁿ-chhiⁿ lòng Tē-kiû ê chòe-āu Kéng-pò-hē-thóng" ê sî-chūn chhōe-tio̍h–ê. ZTF cddddddhit lia̍p tn̂g-chiu-kî hūi-chhiⁿ sī téng kò goe̍h chiah kiâⁿ kàu kīn-ji̍t-tiám, chit-má í-keng beh lī-khui Thài-iông–ah. ATLAS hūi-chhiⁿ sī koh-khah àm, i 1 goe̍h 29 chiah chiap-kīn lán chit-lia̍p ê bí-lē Tē-kiû. I hit-chūn kah Tē-kiû ê kū-lī sī 4.6 kng-hun. Sī kóng ZTF hūi-chhiⁿ tī 2 goe̍h 2 hō hit-chūn kah Tē-kiû ê kū-lī sī 2.4 kng-hun. ZTF hūi-chhiⁿ chìn-chêng iáu ē-tàng iōng ba̍k-chiu ti̍t-chiap khòaⁿ, i ê hūi-bóe si̍t-chāi sī siⁿ liáu bē-bái. M̄-koh chit lia̍p ATLAS hūi-chhiⁿ, to̍h bô hiah-nī súi ê bóe-liu–ah. Chit nn̄g-lia̍p hūi-chhiⁿ lóng ū chiok bêng-hián ê chhiⁿ-sek hūi-chhiu, che sī siang-goân-chú thòaⁿ-hun-chú khì hō͘ ji̍t-kng kek-hoat sán-seng ê êng-kng. ZTF hūi-chhiⁿ chit-má sī siang-tâng chhian-lí-kiàⁿ siōng hó ê koan-chhek bo̍k-piau, in-ūi i sòa-lo̍h-lâi ē hāⁿ kòe Tē-kiû ê thiⁿ-téng. Eng-àm i ē chhut-hiān tī bêng-liāng ê Hóe-chhiⁿ hù-kīn.

[KIP] ZTF Huī-tshinn khì tú-tio̍h ATLAS Huī-tshinn

Huī-tshinn C/2022 È (ZTF huī-tshinn) pue kuè Tē-kiû pak-thian ê sî-tsūn, í-king bô hiah-nī kng–ah. Tsit tiunn siòng-phìnn to̍h sī i kah līng-guā tsi̍t lia̍p Huī-tshinn C/2022 Ú (ATLAS huī-tshinn) ê ha̍p-iánn. Tsit tiunn siòng-phìnn sī 2 gue̍h 6 hō tī Tik-kok ê Bavarian tshiū-nâ hip–ê. Tsit ê thinn-tshinn muá-muá ê thian-khu sī tī Gū-hu-tsō ê hong-hiòng, sī-iá ū 2.5 tōo khuah. Tsit nn̄g lia̍p huī-tshinn sī tī 2022 nî ê sûn-thian-kè-uē “ZTF Lîng-tshinn Kuan-tshik gî-khì” kah「ATLAS Sió-kiânn-tshinn lòng Tē-kiû ê tsuè-āu Kíng-pò-hē-thóng" ê sî-tsūn tshuē-tio̍h–ê. ZTF tsit lia̍p tn̂g-tsiu-kî huī-tshinn sī tíng kò gue̍h tsiah kiânn kàu kīn-ji̍t-tiám, tsit-má í-king beh lī-khui Thài-iông–ah. ATLAS huī-tshinn sī koh-khah àm, i 1 gue̍h 29 tsiah tsiap-kīn lán tsit-lia̍p ê bí-lē Tē-kiû. I hit-tsūn kah Tē-kiû ê kū-lī sī 4.6 kng-hun. Sī kóng ZTF huī-tshinn tī 2 gue̍h 2 hō hit-tsūn kah Tē-kiû ê kū-lī sī 2.4 kng-hun. ZTF huī-tshinn tsìn-tsîng iáu ē-tàng iōng ba̍k-tsiu ti̍t-tsiap khuànn, i ê huī-bué si̍t-tsāi sī sinn liáu bē-bái. M̄-koh tsit lia̍p ATLAS huī-tshinn, to̍h bô hiah-nī suí ê bué-liu–ah. Tsit nn̄g-lia̍p huī-tshinn lóng ū tsiok bîng-hián ê tshinn-sik huī-tshiu, tse sī siang-guân-tsú thuànn-hun-tsú khì hōo ji̍t-kng kik-huat sán-sing ê îng-kng. ZTF huī-tshinn tsit-má sī siang-tâng tshian-lí-kiànn siōng hó ê kuan-tshik bo̍k-piau, in-uī i suà-lo̍h-lâi ē hānn kuè Tē-kiû ê thinn-tíng. Ing-àm i ē tshut-hiān tī bîng-liāng ê Hué-tshinn hù-kīn.

[English] ZTF meets ATLAS

Fading as it races across planet Earth’s northern skies comet C/2022 E3 (ZTF) shares this telescopic frame with comet C/2022 U2 (ATLAS). Captured on the night of February 6 from a garden observatory in Germany’s Bavarian Forest, the starry field of view toward the constellation Auriga spans about 2.5 degrees. Discovered by sky survey projects in 2022 (the Zwicky Transient Facility and the Asteroid Terrestrial-impact Last Alert System these long-period comets are outbound, reaching perihelion just last month. The much fainter comet ATLAS made its closest approach to our fair planet on January 29 at a distance of about 4.6 light-minutes, compared to a mere 2.4 light-minutes for comet ZTF on February 2. This comet ATLAS lacks the well-developed tails of the formerly naked-eye comet ZTF. But both comets sport greenish tinted comas, emission from diatomic carbon molecules fluorescing in sunlight. Continuing its dash across planet Earth’s sky, the good-binocular comet ZTF will appear close to bright planet Mars tonight.

詞彙學習（漢羅/POJ/KIP/華語/English）

• 【彗星 C/2022 E3】hūi-chhiⁿ C jī-khòng-jī-jī E-saⁿ/huī-tshinn C jī-khòng-jī-jī E-sann/ 彗星 C/2022 E3 / Comet C/2022 E3
• 【ATLAS 彗星】ATLAS hūi-chhiⁿ/ATLAS/ATLAS 彗星/comet ATLAS
• 【彗星 C/2022 U2】hūi-chhiⁿ C jī-khòng-jī-jī U jī/huī-tshinn C jī-khòng-jī-jī U jī/彗星 C/2022 U2/ Comet C/2022 U2
• 【ZTF 彗星】ZTF hūi-chhiⁿ/ZTF huī-tshinn/ZTF 彗星/Comet ZTF
• 【雙筒千里鏡】siang-tâng-chhian-lí-kiàⁿ/siang-tâng-tshian-lí-kiànn/雙筒望遠鏡/binoculars
• 【彗尾】hūi-bóe/huī-bué/彗尾/comet tail
• 【御夫座】Gū-hu-chō/Gū-hu-tsō/御夫座/Auriga
• 【巡天計畫】sûn-thian-kè-ōe/sûn-thian-kè-uē/巡天計畫/sky survey
• 【ZTF 凌星觀測儀器】Zwicky Lêng-chhiⁿ Koan-chhek gî-khì/Zwicky Lîng-tshinn Kuan-tshik gî-khì/ZTF 凌星觀測儀器/Zwicky Transient Facility
• 【ATLAS 小行星挵地球 ê 最後警報系統】ATLAS Sió-kiâⁿ-chhiⁿ lòng Tē-kiû ê chòe-āu Kéng-pò-hē-thóng/ATLAS Sió-kiânn-tshinn lòng Tē-kiû ê tsuè-āu Kíng-pò-hē-thóng/小行星撞地球之最後警報系統/Asteroid Terrestrial-impact Last Alert System
• 【近日點】kīn-ji̍t-tiám/kīn-ji̍t-tiám/近日點/perihelion
• 【長週期彗星】tn̂g-chiu-kî hūi-chhiⁿ/tn̂g-tsiu-kî huī-tshinn/長週期彗星/long-period comets
• 【彗鬚】hūi-chhiu/huī-tshiu/彗髮/coma
• 【雙原子】siang-goân-chú/siang-guân-tsú/雙原子/diatomic
• 【炭分子】thòaⁿ-hun-chú/thuànn-hun-tsú/碳分子/carbon molecules
• 【螢光】êng-kng/îng-kng/螢光/fluorescing
• 【火星】Hóe-chhiⁿ/Hué-tshinn/火星/Mars
• 【光分】kng-hun/kng-hun/光分/light-minutes