帆船分子雲脊 內底 ê NGC 2626

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：NGC 2626 along the Vela Molecular Ridge
• 影像來源 kah 版權：Mike Selby & Mark Hanson
• 台文翻譯：An-Li Tsai (NCU)

[漢羅] 帆船分子雲脊 內底 ê NGC 2626

這張彩色宇宙帆布 ê 中央 是 NGC 2626，是 tī 銀河南方、美麗 ê 藍光反射星雲。 伊就 tī 帆船分子雲脊 ê 塗粉分子雲 複合區內底。邊仔有閘光 ê 塗粉雲，週邊是 發出紅光水素發射線 ê 大型 H II 區（水素離子區） RCW 27。 RCW 27 是 tī 帆船分子雲脊 ê 塗粉分子雲 複合區內底。 NGC 2626 是 發藍光 ê 星際塗粉雲，因為伊會反射藏 tī 星雲內底 ê 少年高溫恆星。 是講，天文 探索 會 tī 恆星形成區內底揣著足濟少年恆星，kah 相關 ê 星雲。 NGC 2626 離咱差不多有 3200 光年遠。 照這个距離來算，咱 tī 天文望遠鏡 視野內底看著 ê 帆船分子雲脊，差不多有 30 光年遐爾大。

[POJ] Phâng-chûn Hun-chú-hûn-chit lāi-té ê NGC 2626

Chit tiuⁿ chhái-sek ú-tiū phâng-pò͘ ê tiong-ng sī NGC 2626, sī tī Gîn-hô lâm-hong, bí-lē ê nâ-kng hoán-siā-seng-hûn. I to̍h tī Phâng-chûn Hûn-chuh-hûn-chit ê thô͘-hún hun-chú-hûn ho̍k-ha̍p-khu lāi-té. Piⁿ-á ū cha̍h-kng ê thô͘-hún-hûn, chiu-piⁿ sī hoat-chhut âng-kng chúi-sò͘ hoat-siā-sòaⁿ ê tōa-hêng H II khu (Chúi-sò͘-lī-chú-khu) RCW 27. NGC 2626 sī hoat nâ-kng ê seng-chè-thô͘-hún-hûn, in-ūi i ē hoán-siā chhàng tī seng-hûn lāi-té ê siàu-liân ko-un hêng-chhiⁿ. Sī kóng, thian-bûn thàm-soh ē tī hêng-chhiⁿ hêng-sêng-khu lāi-té chhōe-tio̍h chiok chōe siàu-liân hêng-chhiⁿ, kah siong-koan ê seng-hûn. NGC 2626 lī lán chha-put-to ū 3200 kng-nî hn̄g. Chiàu chit ê kū-lī lâi sǹg, lán tī thian-bûn bōng-oán-kiàⁿ sī-iá lāi-té khòaⁿ–tio̍h–ê Phâng-chûn Hun-chú-hûn-chit, chha-put-to ū 30 kng-nî hiah-nī tōa.

[KIP] Phâng-tsûn Hun-tsú-hûn-tsit lāi-té ê NGC 2626

Tsit tiunn tshái-sik ú-tiū phâng-pòo ê tiong-ng sī NGC 2626, sī tī Gîn-hô lâm-hong, bí-lē ê nâ-kng huán-siā-sing-hûn. Pinn-á ū tsa̍h-kng ê thôo-hún-hûn, tsiu-pinn sī huat-tshut âng-kng tsuí-sòo huat-siā-suànn ê tuā-hîng H II khu (Tsuí-sòo-lī-tsú-khu) RCW 27. NGC 2626 sī huat nâ-kng ê sing-tsè-thôo-hún-hûn, in-uī i ē huán-siā tshàng tī sing-hûn lāi-té ê siàu-liân ko-un hîng-tshinn. Sī kóng, thian-bûn thàm-soh ē tī hîng-tshinn hîng-sîng-khu lāi-té tshuē-tio̍h tsiok tsuē siàu-liân hîng-tshinn, kah siong-kuan ê sing-hûn. NGC 2626 lī lán tsha-put-to ū 3200 kng-nî hn̄g. Tsiàu tsit ê kū-lī lâi sǹg, lán tī thian-bûn bōng-uán-kiànn sī-iá lāi-té khuànn–tio̍h–ê Phâng-tsûn Hun-tsú-hûn-tsit, tsha-put-to ū 30 kng-nî hiah-nī tuā.

[English] NGC 2626 along the Vela Molecular Ridge

Centered in this colorful cosmic canvas, NGC 2626 is a beautiful, bright, blue reflection nebula in the southern Milky Way. Next to an obscuring dust cloud and surrounded by reddish hydrogen emission from large H II region RCW 27 it lies within a complex of dusty molecular clouds known as the Vela Molecular Ridge. NGC 2626 is itself a cloud of interstellar dust reflecting blue light from the young hot embedded star visible within the nebula. But astronomical explorations reveal many other young stars and associated nebulae in the star-forming region. NGC 2626 is about 3,200 light-years away. At that distance this telescopic field of view would span about 30 light-years along the Vela Molecular Ridge.

詞彙學習（漢羅/POJ/KIP/華語/English）

• 【帆船分子雲脊】Phâng-chûn Hun-chú-hûn-chit/Phâng-tsûn Hun-tsú-hûn-tsit/帆船分子雲脊/the Vela Molecular Ridge
• 【NGC 2626】NGC jī-lio̍k-jī-lio̍k/NGC jī-lio̍k-jī-lio̍k/NGC 2626/NGC 2626
• 【反射星雲】hoán-siā-seng-hûn/huán-siā-sing-hûn/反射星雲/reflection nebula
• 【H II 區】H two khu/H two khu/H II 區/H II region
• 【水素離子區】Chúi-sò͘-lī-chú-khu/Tsuí-sòo-lī-tsú-khu/氫離子區/H II region
• 【RCW 27】RCW jī-chhit/RCW jī-tshit/RCW 27/RCW 27
• 【發射線】hoat-siā-sòaⁿ/hoat-siā-suànn/發射線/emission
• 【星際塗粉雲】seng-chè-thô͘-hún-hûn/sing-tsè-thôo-hún-hûn/星際灰塵雲/cloud of interstellar dust
• 【恆星形成區】hêng-chhiⁿ hêng-sêng-khu/hîng-tshinn hîng-sîng-khu/恆星形成區/star-forming region